Ahmedabad News: અમદાવાદમાં ટ્રાફિકની ધમધમતી ધમની સમાન નારોલથી વિશાલા તરફના માર્ગ પર આવેલા શાસ્ત્રી બ્રિજનું સમારકામ ટૂંક સમયમાં શરૂ થવા જઈ રહ્યું છે. તાજેતરમાં હાથ ધરાયેલા સ્ટ્રક્ચરલ સ્ટેબિલિટી ટેસ્ટના રિપોર્ટમાં ચોંકાવનારો ખુલાસો થયો છે, જેને કારણે નેશનલ હાઇવે ઓથોરિટી વિભાગ દ્વારા મોટા પાયે સમારકામની કામગીરી હાથ ધરવાનો નિર્ણય લેવામાં આવ્યો છે.
રિપોર્ટ અનુસાર, આ બ્રિજના 15 વર્ષ કરતાં જૂના 180 બેરિંગ્સ બદલવાની તાત્કાલિક જરૂરિયાત છે. આ બેરિંગ્સ બ્રિજની સ્થિરતા અને ભાર વહન ક્ષમતા માટે મહત્ત્વપૂર્ણ છે. આથી, નેશનલ હાઇવે ઓથોરિટીએ ખાનગી કંપનીને ટેન્ડર આપીને આ કામગીરી શરૂ કરવાની તૈયારી કરી છે.
પાંચ મહિના માટે બ્રિજ સંપૂર્ણ બંધ
આ સમારકામની કામગીરી નવેમ્બર મહિનામાં શરૂ થવાની સંભાવના છે અને તેને પૂર્ણ થતાં લગભગ પાંચ મહિના લાગશે. આ સમયગાળા દરમિયાન, નારોલથી વિશાલા તરફનો બ્રિજનો રસ્તો સંપૂર્ણપણે બંધ કરી દેવામાં આવશે. બેરિંગ બદલવાની મુખ્ય કામગીરી ઉપરાંત, બ્રિજની પેરાફેટ (સુરક્ષા) દીવાલને પણ નવી બનાવવામાં આવશે અને બ્રિજના એક્સપાન્શન જોઇન્ટ્સનું પણ સમારકામ કરવામાં આવશે.
ટ્રાફિક માટે ડાઇવર્ઝન પ્લાન
બ્રિજ બંધ રહેવાના કારણે વાહનવ્યવહારને અસુવિધા ન થાય તે માટે ટ્રાફિક ડાઇવર્ઝન પ્લાન તૈયાર કરવામાં આવ્યો છે. ટુ-વ્હીલર અને ફોર-વ્હીલર (હળવા વાહનો): આ વાહનોને અવર-જવર માટે વિશાલાથી નારોલ તરફના સામેના બ્રિજ પરથી ડાઇવર્ઝન આપવામાં આવશે.
હાલમાં પણ બ્રિજ પરથી મોટાં વાહનોનો પ્રવેશ પ્રતિબંધિત છે. આથી તમામ મોટા વાહનોને દાણીલીમડા થઈને અંજલિ ચાર રસ્તા તરફના વૈકલ્પિક માર્ગનો ઉપયોગ કરવો પડશે. ભૂતકાળમાં જ્યારે આ બ્રિજને બંધ કરાયો હતો, ત્યારે પણ આ જ ડાઇવર્ઝન અમલમાં મૂકવામાં આવ્યું હતું.
નોંધનીય છે કે, આ બ્રિજનું સમારકામ એક વર્ષ પહેલાં પણ કરાયું હતું, પરંતુ ત્યારે માત્ર રસ્તાના સરફેસિંગની જ કામગીરી કરવામાં આવી હતી, સ્ટ્રક્ચરલ બેરિંગ્સ બદલવામાં આવ્યા નહોતા. સ્ટ્રક્ચરલ સ્ટેબિલિટી રિપોર્ટ આવ્યા બાદ હવે મૂળભૂત સમારકામ કરવાનું અનિવાર્ય બન્યું છે, જેથી બ્રિજની સુરક્ષા અને ટકાઉપણું જાળવી શકાય.