Adani CNG Gas Price Hike News: અમદાવાદ શહેર સહિત સમગ્ર રાજ્યમાં મોંઘવારીનો માર સહન કરી રહેલી જનતાને વધુ એક આર્થિક ઝાટકો વાગ્યો છે. મોંઘવારીના આ યુગમાં સસ્તું અને પર્યાવરણને અનુકૂળ ઈંધણ ગણાતા CNG ના ભાવમાં અચાનક મોટો વધારો ઝીંકવામાં આવ્યો છે. અદાણી ગેસ (Adani Total Gas) દ્વારા અમદાવાદમાં CNG ઈંધણના ભાવમાં પ્રતિ કિલો દીઠ ₹4 નો સીધો વધારો કરવામાં આવ્યો છે.
અદાણી સીએનજી ભાવમાં વધારો
આ ભાવવધારા બાદ હવે અમદાવાદમાં CNG નો નવો ભાવ ₹98.47 પ્રતિ કિલો થઈ ગયો છે. ઈંધણના ભાવમાં થયેલા આ અચાનક વધારાને કારણે સામાન્ય વાહનચાલકો અને રિક્ષાચાલકોના ખિસ્સા પર મોટો બોજ પડવાનો નક્કી છે.
જનતા અને રિક્ષાચાલકોના બજેટ પર સીધી અસર
અમદાવાદ જેવા મેટ્રો શહેરમાં દૈનિક ધોરણે લાખો લોકો સવારી માટે CNG વાહનો, રિક્ષા અને કેબ પર નિર્ભર રહે છે. સીએનજીના ભાવમાં એકસાથે ₹4 નો વધારો થવાને કારણે ઓટોરિક્ષા ચાલકો, ટેક્સી ચાલકો અને ખાનગી સીએનજી વાહન ધરાવતા મધ્યમ વર્ગીય પરિવારોનું માસિક બજેટ સંપૂર્ણપણે ખોરવાઈ જશે.
રિક્ષાચાલકોના જણાવ્યા મુજબ, છેલ્લા કેટલાક સમયથી પેટ્રોલ અને ડીઝલની સાથે સીએનજીના ભાવ પણ સતત વધી રહ્યા છે, જેનાથી તેમની દૈનિક કમાણી પર વિપરીત અસર પડે છે. સીએનજી મોંઘો થવાને કારણે આગામી દિવસોમાં મુસાફરીના ભાડામાં પણ વધારો થાય તો નવાઈ નહીં.
શા માટે થયો ભાવવધારો?
આંતરરાષ્ટ્રીય સ્તરે નેચરલ ગેસના ભાવમાં થતા ઉતાર-ચડાવ અને સપ્લાય ચેઈનની પ્રક્રિયાને કારણે ઈંધણ કંપનીઓ દ્વારા સમયઅંતરે ભાવ સમીક્ષા કરવામાં આવે છે. જોકે, તહેવારો અને મોંઘવારી વચ્ચે સીધો ₹4 નો વધારો સામાન્ય નાગરિકો માટે આંચકારૂપ સાબિત થયો છે.