Adani CNG Price Hike: તહેવારોની સિઝન વચ્ચે સામાન્ય જનતાના ખિસ્સા પર વધુ એક બોઝ વધી ગયો છે. દિવાળીના તહેવાર પહેલાં અદાણી ગેસ દ્વારા CNGના ભાવમાં ઝીંકાયેલા વધારાથી લોકોની મુશ્કેલીઓમાં વધારો થયો છે. અમદાવાદ શહેરમાં અદાણી CNGના પ્રતિ કિલો ભાવમાં સીધો ₹2.30 નો વધારો કરવામાં આવ્યો છે, જેના કારણે હવે CNGનો નવો ભાવ વધીને ₹100.77 પ્રતિ કિલો થઈ ગયો છે. અગાઉ આ ભાવ પ્રતિ કિલો ₹98.47 હતો. આ વધારા સાથે જ અમદાવાદમાં CNGનો ભાવ ₹100ની સપાટી વટાવી ગયો છે, જેનાથી વાહનચાલકો અને સામાન્ય નાગરિકોમાં નારાજગી જોવા મળી રહી છે.
વધતા ભાવથી મધ્યમ વર્ગ અને રિક્ષાચાલકો ચિંતિત
દિવાળી જેવા પવિત્ર અને મોટા તહેવાર ટાણે જ ઈંધણના ભાવમાં થયેલો આ વધારો મધ્યમ વર્ગના પરિવારનું બજેટ ખોરવી નાખવા માટે પૂરતો છે. ખાસ કરીને રોજિંદા જીવનમાં CNG વાહનો પર નિર્ભર રહેતા રિક્ષાચાલકો, ટેક્સી ડ્રાઇવરો અને નોકરીયાત વર્ગને આર્થિક ફટકો પડ્યો છે.
શહેરમાં હજારો વાહનચાલકો પેટ્રોલ અને ડીઝલના ઊંચા ભાવ સામે રાહત મેળવવા માટે CNG વાહનોનો ઉપયોગ કરે છે. પરંતુ હવે CNGના ભાવ પણ ₹100 પ્રતિ કિલોની સપાટી વટાવી જતાં મુસાફરી અને માલસામાનની હેરફેર મોંઘી બનશે. સ્થાનિક રિક્ષાચાલકોનું કહેવું છે કે મોંઘવારીના આ સમયમાં ઈંધણના ભાવ સતત વધવાથી તેમનો નફો ઘટી રહ્યો છે અને પરિવારનું ગુજરાન ચલાવવું મુશ્કેલ બની રહ્યું છે.
ગ્રાહકો પર આર્થિક બોઝ અને અન્ય ચીજવસ્તુઓ પર અસર
CNG ના ભાવ વધારાની સીધી અસર પરિવહન ખર્ચ પર પડે છે, જેના કારણે શાકભાજી, દૂધ અને અન્ય રોજિંદી વપરાશની વસ્તુઓની વહન કિંમતમાં પણ વધારો થવાની સંભાવના રહે છે. તહેવારોની ખરીદી વચ્ચે લોકો પહેલાથી જ મોંઘવારીનો સામનો કરી રહ્યા હતા, ત્યારે આ નવા ભાવ વધારાએ આગમાં ઘી હોમવાનું કામ કર્યું છે. નાગરિકો સરકાર અને સંબંધી કંપનીઓ પાસે આ ભાવ વધારા પર પુનર્વિચાર કરવાની માંગ કરી રહ્યા છે, જેથી તહેવારોની મોસમે સામાન્ય જનતાને થોડી રાહત મળી શકે.