Pen cap hole reason: તમે બોલપેન કે અન્ય પેનના ઢાંકણને ધ્યાનથી જોશો તો તેમાં એક નાનું છિદ્ર જોવા મળશે. મોટાભાગના લોકો આ છિદ્રને માત્ર પેનની ડિઝાઇનનો ભાગ માને છે. પરંતુ પેનના ઢાંકણ બનાવવામાં આવતું આ નાનું હોલ સેફ્ટી સાથે જોડાયેલું મહત્વનું કારણ ધરાવે છે. ખાસ કરીને જો ભૂલથી કોઈ વ્યક્તિ પેનનું ઢાંકણ મોઢામાં લઈ લે અથવા તેને ગળી જાય તો આ છિદ્ર ઉપયોગી બની શકે છે.
પેનના કેપમાં છિદ્ર કેમ હોય છે?
પેનના નાના ઢાંકણને કારણે બાળકોમાં તેને મોઢામાં લેવાનો કે ભૂલથી ગળી જવાનો ખતરો રહે છે. જો આવું ઢાંકણ શ્વાસની નળીમાં ફસાઈ જાય તો શ્વાસ લેવામાં મુશ્કેલી ઊભી થઈ શકે છે. આ જોખમને ધ્યાનમાં રાખીને ઘણા પેનના ઢાંકણમાં નાનું છિદ્ર રાખવામાં આવે છે.
જો કેપ શ્વાસની નળીમાં ફસાઈ જાય તો તેમાં રહેલું છિદ્ર હવાના પ્રવાહ માટે થોડો રસ્તો આપી શકે છે. એટલે સંપૂર્ણ રીતે શ્વાસનો માર્ગ બંધ થઈ જવાનો ખતરો ઓછો કરવામાં મદદ મળી શકે છે. આ કારણે પેનના ઢાંકણમાં રહેલું નાનું હોલ માત્ર ડિઝાઇન માટે નહીં પરંતુ સેફ્ટી ફીચર તરીકે પણ મહત્વનું છે.
આ સિવાય કેપમાં રહેલું છિદ્ર પેનના ઢાંકણને લગાવવા અને કાઢવાની પ્રક્રિયામાં પણ મદદરૂપ થઈ શકે છે. ઢાંકણની અંદર અને બહાર હવાનું દબાણ સંતુલિત રહેતું હોવાથી તે પેન પર સરળતાથી ફિટ થઈ શકે છે અને કાઢતી વખતે પણ સરળતા રહે છે.
ઘણા લોકોના મનમાં એ સવાલ પણ આવે છે કે ઢાંકણમાં છિદ્ર હોવાથી પેનની સ્યાહી ઝડપથી સૂકાઈ જશે કે નહીં. સામાન્ય રીતે આ છિદ્રનું કદ અને પેનની ડિઝાઇન એવી રીતે રાખવામાં આવે છે કે તેનો હેતુ સેફ્ટી જળવાઈ રહે અને પેનની કાર્યક્ષમતા પર પણ અસર ન પડે.
એટલે હવે જ્યારે પણ તમે પેનના ઢાંકણમાં નાનું છિદ્ર જુઓ, ત્યારે તેને માત્ર સામાન્ય હોલ ન સમજતા. તેની પાછળ સુરક્ષા અને પેનની કાર્યક્ષમતા સાથે જોડાયેલું કારણ પણ છે. ખાસ કરીને બાળકો પેનના કેપને મોઢામાં ન મૂકે તેનું ધ્યાન રાખવું જરૂરી છે.