india longest railway platform: ભારતમાં ઘણા એવા રેલવે સ્ટેશન છે, જે પોતાની અનોખી વિશેષતાઓ માટે જાણીતા છે. પરંતુ શું તમે જાણો છો કે ભારતમાં જ એક એવું રેલવે પ્લેટફોર્મ છે, જે માત્ર દેશનું જ નહીં પરંતુ સમગ્ર વિશ્વનું સૌથી લાંબું પ્લેટફોર્મ ગણાય છે? તેની લંબાઈ એટલી વિશાળ છે કે તેમાં એકસાથે લગભગ 14થી 15 ફૂટબોલ મેદાન સમાઈ શકે. આ અનોખી સિદ્ધિ માટે તેનું નામ ગિનેસ વર્લ્ડ રેકોર્ડમાં પણ નોંધાયું છે.
દુનિયાનું સૌથી લાંબું રેલવે પ્લેટફોર્મ
કર્ણાટક રાજ્યમાં આવેલું શ્રી સિદ્ધારૂઢ સ્વામીજી હુબ્બલ્લી જંક્શન (Shri Siddharoodha Swamiji Hubballi Junction) દુનિયાનું સૌથી લાંબું રેલવે પ્લેટફોર્મ ધરાવે છે. આ પ્લેટફોર્મની કુલ લંબાઈ 1,507 મીટર છે. વર્ષ 2023માં આ પ્લેટફોર્મે ઉત્તર પ્રદેશના ગોરખપુર જંક્શનનો રેકોર્ડ તોડીને વિશ્વમાં પ્રથમ સ્થાન મેળવ્યું હતું.
આ સ્ટેશનનું નામ પ્રસિદ્ધ હિંદુ સંત શ્રી સિદ્ધારૂઢ સ્વામીજીના સન્માનમાં રાખવામાં આવ્યું છે. દક્ષિણ પશ્ચિમ રેલવે માટે આ જંક્શન ખૂબ મહત્વનું માનવામાં આવે છે અને દક્ષિણ ભારતના સૌથી વ્યસ્ત રેલવે સ્ટેશનોમાં તેનું સ્થાન છે.
પ્લેટફોર્મની વિશાળ લંબાઈ વિશે સાંભળીને ઘણા લોકોના મનમાં સવાલ થાય છે કે શું ખરેખર તેમાં 14 ફૂટબોલ મેદાન સમાઈ શકે? સામાન્ય રીતે આંતરરાષ્ટ્રીય ફૂટબોલ મેદાનની લંબાઈ લગભગ 105 મીટર હોય છે. આ પ્રમાણે જો ગણતરી કરવામાં આવે તો 1,507 મીટર લાંબા પ્લેટફોર્મમાં આશરે 14થી 15 ફૂટબોલ મેદાન સરળતાથી સમાઈ શકે છે.
હુબ્બલ્લી જંક્શન દક્ષિણ ભારતનું એક મહત્વપૂર્ણ રેલવે હબ છે. અહીં ઉત્તર-દક્ષિણ તેમજ પૂર્વ-પશ્ચિમ દિશામાંથી અનેક ટ્રેનોનું સંચાલન થાય છે. અગાઉ સ્ટેશનના જૂના માળખાને કારણે ઘણી ટ્રેનોને સિગ્નલની રાહમાં બહાર ઊભી રહેવું પડતું હતું, જેના કારણે મુસાફરોને વિલંબનો સામનો કરવો પડતો હતો. આ સમસ્યાને દૂર કરવા માટે યાર્ડના પુનર્વિકાસ પ્રોજેક્ટ હેઠળ લાંબા પ્લેટફોર્મનું નિર્માણ કરવામાં આવ્યું.
આ પ્લેટફોર્મના નિર્માણથી ટ્રેન સંચાલનમાં વધુ કાર્યક્ષમતા આવી છે, સુરક્ષા સુધરી છે અને મુસાફરોને વધુ સારી સુવિધાઓ મળી રહી છે. ખાસ કરીને લાંબી ટ્રેનોને એકસાથે હેન્ડલ કરવામાં હવે સરળતા રહે છે.
ગિનેસ વર્લ્ડ રેકોર્ડ્સે પણ આ સિદ્ધિને માન્યતા આપી છે. રેકોર્ડ મુજબ, 12 જાન્યુઆરી 2023ના રોજ 1,507 મીટર લાંબા આ પ્લેટફોર્મને દુનિયાનું સૌથી લાંબું રેલવે પ્લેટફોર્મ તરીકે પ્રમાણિત કરવામાં આવ્યું હતું. આજે આ સ્ટેશન માત્ર રેલવે મુસાફરો માટે જ નહીં પરંતુ પ્રવાસીઓ અને રેકોર્ડપ્રેમીઓ માટે પણ આકર્ષણનું કેન્દ્ર બની ગયું છે.