Vidya Balan On Trollers: સોશિયલ મીડિયા પર સેલિબ્રિટીઝની બોડી શેમિંગ અને તેમના વજનને લઈને થતી ટ્રોલિંગ હાલ ચર્ચાનો મુખ્ય વિષય બની છે. તાજેતરમાં જ અભિનેત્રી કેટરીના કૈફના પોસ્ટ પ્રેગ્નેન્સી વધેલા વજનને લઈને ઈન્ટરનેટ પર ભારે ટ્રોલિંગ જોવા મળ્યું હતું. આવી જ રીતે રૅમ્પ વૉક બાદ ઐશ્વર્યા રાય બચ્ચનના લુક અને વજન અંગે પણ યુઝર્સ દ્વારા મશ્કરી કરવામાં આવી હતી.
આ તમામ વિવાદો વચ્ચે અગાઉ સલમાન ખાને બિગ બોસ 20 દરમિયાન ટ્રોલર્સને કડક જવાબ આપ્યો હતો અને હવે બોલિવૂડની દમદાર અભિનેત્રી વિદ્યા બાલને પણ આ મુદ્દે અવાજ ઉઠાવતા ટ્રોલર્સને જડબાતોડ જવાબ આપ્યો છે. દૈનિક જાગરણ સાથેની ખાસ વાતચીતમાં વિદ્યા બાલને ઓનલાઈન ટ્રોલ કરનારાઓની બરાબરની ક્લાસ લીધો છે.
ઓનલાઈન ટ્રોલિંગ પર ભડકી વિદ્યા બાલન
ઓનલાઈન ટ્રોલર્સને સણસણતો જવાબ આપતા વિદ્યા બાલને જણાવ્યું હતું કે- આ અત્યંત બકવાસ બાબત છે. જે લોકો બીજાની નિંદા કે આલોચના કરી રહ્યા છે, તેમણે પહેલાં પોતાને અરીસામાં જોવાની જરૂર છે. સૌથી મોટી વાત એ છે કે આવા લોકો ક્યાંક ને ક્યાંક પોતાના અંગત જીવનથી અસંતુષ્ટ છે અને તેમનામાં જ કંઈક ખામી છે, જેથી તેઓ બીજા લોકોમાં કમીઓ શોધતા રહે છે.
તેણે વધુમાં આકરા પ્રહાર કરતા કહ્યું કે- જો લોકોને એ વાતથી આટલી જ તકલીફ હોય કે મહિલાઓ બાળકોને જન્મ આપ્યા પછી જાડી થઈ જાય છે, તો પછી આ જે આખો દિવસ 'AI-AI' (આર્ટિફિશિયલ ઇન્ટેલિજન્સ) કરતા રહો છો, તો AIથી જ બાળકો પેદા કરાવી લો!
બીજાના શરીરની મશ્કરી કરવાનો હક કોઈને નથી
મહિલાઓના શરીરમાં થતા કુદરતી ફેરફારો અંગે વાત કરતા વિદ્યાએ ઉમેર્યું હતું કે- બાળકને જન્મ આપ્યા પછી (પોસ્ટ પ્રેગ્નેન્સી) મહિલાઓના શરીરમાં અનેક પ્રકારના હોર્મોનલ ફેરફારો થતા હોય છે. તમને કોઈએ એ હક નથી આપ્યો કે તમે કોઈ પણ મહિલાના શારીરિક દેખાવ કે લુકને લઈને તેનો મજાક ઉડાવો કે તેને સોશિયલ મીડિયા પર ટ્રોલ કરો.
વિદ્યા બાલનનું વર્કફ્રન્ટ અને આગામી પ્રોજેક્ટ્સ
વિદ્યા બાલનની છેલ્લી રિલીઝ થયેલી ફિલ્મ 'રાજા શિવાજી' હતી, જેમાં રીતેશ દેશમુખ મુખ્ય ભૂમિકામાં જોવા મળ્યો હતો. 1 મે 2026ના રોજ સિનેમાઘરોમાં રિલીઝ થયેલી આ ફિલ્મે બોક્સ ઓફિસ પર શાનદાર સફળતા હાસિલ કરી હતી. આ ફિલ્મમાં સંજય દત્ત, જેનેલિયા ડિસૂઝા અને અભિષેક બચ્ચન જેવા દિગ્ગજ કલાકારોએ પણ મહત્વના રોલ ભજવ્યા હતા.
હવે વિદ્યા બાલનની આગામી મોટો પ્રોજેક્ટ 'જેલર 2' (Jailer 2) છે, જેમાં તે 'કાંતા'ના રોલમાં નજરે પડશે. તાજેતરમાં રિલીઝ થયેલા ટ્રેલરમાં દર્શકોને તેનો લુક અને કેરેક્ટર ખૂબ જ પસંદ પડ્યા છે. આ સિવાય તે અનિસ બઝમીની એક અનટાઇટલ કોમેડી ફિલ્મમાં પણ જોવા મળશે, જેમાં તેની સાથે અક્ષય કુમાર સ્ક્રીન શેર કરશે.
ફિલ્મ 'જેલર 2' વિશે
બહુપ્રતિક્ષિત એક્શન-ડ્રામા ફિલ્મ 'જેલર 2'માં સાઉથના સુપરસ્ટાર રજનીકાંત, વિદ્યા બાલન, મિથુન ચક્રવર્તી ઉપરાંત એસ. જે. સૂર્યા, રમ્યા કૃષ્ણન, શિવ રાજકુમાર અને યોગી બાબુ જેવા બહુવિધ સ્ટાર્સ સામેલ છે. આ ફિલ્મ 15 ઓક્ટોબરના રોજ સિનેમાઘરોમાં રિલીઝ થઈ છે.