Varun Dhawan Border 2 Ghar Kab Aaoge: બોર્ડર 2 ફિલ્મના ગીત 'ઘર કબ આવોગે'ના લોન્ચ દરમિયાન અભિનેતા વરુણ ધવન ભાવુક બની ગયા. આ કાર્યક્રમ ઐતિહાસિક લોંગેવાલામાં યોજાયો હતો, જ્યાં મૂળ ફિલ્મ બોર્ડરનું શૂટિંગ કરવામાં આવ્યું હતું. વરુણે જણાવ્યું કે તેમને બાળપણથી જ સેનાની વર્દી પહેરેલા જવાનનું પાત્ર ભજવવાની ઇચ્છા હતી અને બોર્ડર જેવી ફિલ્મોએ તેમના જીવન પર ઊંડો પ્રભાવ પાડ્યો છે.
સની દેઓલનો ઉલ્લેખ કરતાં વરુણે કહ્યું કે જેમ સની સરે કહ્યું છે કે તેમણે બાળપણમાં હકીકત ફિલ્મ જોઈ અને ત્યારબાદ સેના આધારિત ફિલ્મ કરવાનો મનમાં વિચાર આવ્યો, એ જ રીતે મેં પણ બાળપણમાં બોર્ડર જોઈ હતી અને મારા દિલમાં સેનામાંથી એક જવાનનું પાત્ર ભજવવાની ઇચ્છા જન્મી. આ બધું સની સરની પ્રેરણાના કારણે શક્ય બન્યું.
ફિલ્મ વિશે વાત કરતાં ભાવુક થયા વરુણ ધવન
વરુણે જણાવ્યું કે બોર્ડર ફિલ્મે દેશના બાળકો અને યુવાનોમાં દેશપ્રેમની ભાવના જાગૃત કરી. આ ફિલ્મે દરેક બાળકના મનમાં સેના પ્રત્યે ગૌરવની ભાવના પેદા કરી. અમને લાગ્યું કે આપણો દેશ બહુ શક્તિશાળી છે. મેં ક્યારેય, સપનામાં પણ, એવું વિચાર્યું નહોતું કે હું ઘર કબ આવોગે' જેવા ગીતનો ભાગ બનીશ કે પછી બોર્ડર 2માં મુખ્ય ભૂમિકા ભજવીશ.
આજની પરિસ્થિતિ અંગે વાત કરતાં વરુણે કહ્યું કે આજે જ્યારે હું દરેક જગ્યાએ ઓપરેશન સિંદૂરના પોસ્ટર્સ જોઉં છું, ત્યારે મને મારા દેશ પર વધુ વિશ્વાસ થાય છે. ભારત પ્રેમ, શાંતિ અને ભાઈચારામાં વિશ્વાસ રાખે છે, પરંતુ યુવાનોને દેશની સાચી બહાદુરી સમજાવવા માટે બોર્ડર જેવી ફિલ્મો ખૂબ જ જરૂરી છે.
ફિલ્મના મહત્વ પર ભાર મૂકતાં વરુણે કહ્યું કે જ્યારે જ્યારે કોઈ અમારી ધરતી તરફ આંખ ઉઠાવશે, ત્યારે અમે તેને યોગ્ય અને મજબૂત જવાબ આપશું. બોર્ડર 2 એક અત્યંત મહત્વની ફિલ્મ છે. જો 1971માં આપણે બીજા દેશને સ્વતંત્રતા અપાવવામાં મદદ કરી શક્યા હતા, તો આજે આપણે આપણા પોતાના દેશની સ્વતંત્રતા માટે પણ લડી શકીએ.
અંતમાં વરુણે ફિલ્મનો એક શક્તિશાળી સંવાદ શેર કર્યો - આ વખતે અમે બોર્ડરમાં ઘુસવા નહીં જઈએ, અમે બોર્ડર જ બદલી નાખીશું.
ક્યારે રિલીઝ થશે બોર્ડર 2
બોર્ડર 2નું નિર્દેશન રાષ્ટ્રીય પુરસ્કાર વિજેતા નિર્દેશક અનુરાગ સિંહે કર્યું છે. ફિલ્મનું નિર્માણ જેપી દત્તા અને નિધી દત્તાએ ટી-સિરીઝ સાથે મળીને કર્યું છે. ફિલ્મમાં વરુણ ધવન અને સની દેઓલ સાથે દિલજીત દોસાંઝ અને અહાન શેટ્ટી પણ જોવા મળશે. આ ફિલ્મ 23 જાન્યુઆરીના રોજ રિલીઝ થશે.