Tiger Shroff Firing: બોલિવૂડ અભિનેતા ટાઈગર શ્રોફને લઈને એક અત્યંત સનસનાટીભર્યા અને મોટા સમાચાર સામે આવ્યા છે. રવિવારની સાંજે મુંબઈના પોશ વિસ્તાર ગણાતા જુહુમાં ફૂટબોલ ગ્રાઉન્ડ પાસેથી નીકળી રહેલા ટાઈગર શ્રોફના વાહન પર મોટરસાઈકલ પર સવાર અજાણ્યા હુમલાખોરોએ અંધાધૂંધ ગોળીબાર કર્યો હતો. સદભાગ્યે, આ ભીષણ હુમલામાં અભિનેતા ટાઈગર શ્રોફ સંપૂર્ણપણે સુરક્ષિત છે અને તેમને કોઈ ઈજા થઈ નથી, પરંતુ આ ઘટનામાં તેમના ડ્રાઈવરના હાથમાં ગોળી વાગી હોવાના અહેવાલ છે. આ હુમલાથી સમગ્ર ફિલ્મ જગત અને સુરક્ષા એજન્સીઓમાં ભારે ખળભળાટ મચી ગયો છે.
કેવી રીતે બની ઘટના?
રવિવારની સાંજે બનેલી આ ચોંકાવનારી ઘટનાન જોઈએ તો, મુંબઈના જુહુ વિસ્તારમાં આવેલા એક ફૂટબોલ ગ્રાઉન્ડની બહાર આ હુમલો થયો હતો. જ્યારે ટાઈગર શ્રોફ ગ્રાઉન્ડમાંથી બહાર નીકળીને પોતાની કારમાં બેસી રહ્યા હતા, તે જ સમયે આ દુર્ઘટના સર્જાઈ હતી.
મોટરસાઈકલ (બાઇક) પર સવાર ત્રણ અજાણ્યા શખ્સોએ અચાનક તેમની કારને નિશાન બનાવીને રાઉન્ડ ફાયરિંગ શરૂ કરી દીધું હતું.આ અચાનક થયેલા હુમલામાં ટાઈગર શ્રોફ હેમખેમ બચી ગયા હતા અને તેમને કોઈ ઈજા થઈ નથી, પરંતુ ગોળીબાર દરમિયાન તેમના ડ્રાઈવરના હાથમાં ગંભીર ઈજા થઈ હતી.
લોરેન્સ બિશ્નોઈ ગેંગનો દાવો અને ખુલ્લી ધમકી
આ ઘટના બાદ સોશિયલ મીડિયા પર એક સ્ક્રીનશૉટ વાયરલ થયો છે. ટાઈગર શ્રોફ પર થયેલા હુમલાની જવાબદારી લોરેન્સ બિશ્નોઈ ગેંગે સ્વીકારી છે. ગેંગના સભ્ય હોવાનો દાવો કરનાર એક વ્યક્તિએ સોશિયલ મીડિયા પર આ હુમલાની જવાબદારી લીધી છે.
'અનિલ પંડિત' નામની વ્યક્તિએ આ પોસ્ટમાં દાવો કર્યો છે કે- ટાઈગર શ્રોફને એટલા માટે નિશાન બનાવવામાં આવ્યા કારણ કે તેમણે ગેંગના નિર્દેશોની અવગણના કરી અને સલમાન ખાન સાથે કામ કરવાનું ચાલુ રાખ્યું. આ પોસ્ટમાં ખુલ્લી ચેતવણી આપવામાં આવી છે કે- ફિલ્મ ઇન્ડસ્ટ્રીમાં જે કોઈ પણ અમારી વિરુદ્ધ જશે અથવા સલમાન ખાન સાથે કામ કરશે, તેને અમે છોડીશું નહીં. આ અમારી પહેલી અને છેલ્લી ચેતવણી છે.
ઉલ્લેખનીય છે કે, ગેંગસ્ટર લોરેન્સ બિશ્નોઈ હાલમાં ગુજરાતની એક જેલમાં બંધ છે, છતાં તેની આ ગેંગ દ્વારા સતત બોલિવૂડ સ્ટાર્સ અને સલમાન ખાન સાથે જોડાયેલા લોકોને નિશાન બનાવવામાં આવી રહ્યા છે.
મુંબઈ પોલીસની મોટી કાર્યવાહી અને તપાસ
ઘટનાની ગંભીરતા અને સંવેદનશીલતાને ધ્યાનમાં રાખીને મુંબઈ પોલીસે ત્વરિત અને સઘન પગલાં લીધા છે.
15 વિશેષ ટીમોની રચના: ટાઈગર શ્રોફ પર થયેલા આ જાનલેવા હુમલાની ઊંડાણપૂર્વક તપાસ કરવા માટે મુંબઈ પોલીસે 15 વિશેષ તપાસ ટીમો (Special Teams) ની રચના કરી છે.
ટેકનિકલ અને સીસીટીવી તપાસ: પોલીસ આસપાસના સીસીટીવી (CCTV) ફૂટેજ અને સોશિયલ મીડિયા પર વાયરલ થયેલી ધમકીભરેલી પોસ્ટની સત્યતાની ગંભીરતાથી ચકાસણી કરી રહી છે.
સઘન શોધખોળ: હુમલાખોરોની ઓળખ કરવા અને તેમને ઝડપી પાડવા માટે જુહુ પોલીસ અને ક્રાઈમ બ્રાંચ સંયુક્ત રીતે જુદા જુદા વિસ્તારોમાં રેડ અને તપાસ ચલાવી રહી છે.