Thamma Movie Box Office Collection Day 3: આયુષ્માન ખુરાના અને રશ્મિકા મંદાના સ્ટારર ફિલ્મ ‘થામા’ બોક્સ ઓફિસ પર સારી કમાણી કરતી જોવા મળી રહી છે. રિલીઝ થયાના 3 દિવસ પૂરા થયા છે અને ફિલ્મે મોટા પડદા પર પોતાની મજબૂત પકડ જાળવી રાખી છે. આ ફિલ્મે ભાઈબીજના અવસરે પણ ડબલ ડિજિટમાં કમાણી કરી છે. મેડૉકની હોરર-કોમેડી યુનિવર્સની આ ફિલ્મને સારો પ્રતિસાદ મળી રહ્યો છે.
'થામા' બોક્સ ઓફિસ કલેક્શન
'થામા'ને રિલીઝના ત્રીજા દિવસે ભાઈબીજની રજાનો ફાયદો મળ્યો છે. સામાન્ય રીતે ફિલ્મો વીકડેઝમાં ઓછી કમાણી કરે છે, પરંતુ આયુષ્માન ખુરાનાની ફિલ્મે અપેક્ષા કરતાં વધુ કમાણી કરી છે. સેકનિલ્કની લેટેસ્ટ અહેવાલ મુજબ ‘થામા’એ રિલીઝના ત્રીજા દિવસે 12.50 કરોડ રૂપિયાનું કલેક્શન કર્યું છે. આ સાથે જ હવે ફિલ્મનું ભારતનું કુલ કલેક્શન 55.10 કરોડ રૂપિયા થઈ ગયું છે.
'થામા'નું અત્યાર સુધીનું કલેક્શન
રિલીઝના પહેલા દિવસે ફિલ્મે 24 કરોડ રૂપિયાની કમાણી કરી હતી. આયુષ્માન ખુરાનાના અત્યાર સુધીના કરિયરની આ સૌથી મોટી ઓપનિંગ ફિલ્મ સાબિત થઈ છે. બીજા દિવસે ફિલ્મે 18.6 કરોડ રૂપિયાનું કલેક્શન કર્યું હતું. ભારતમાં 3 દિવસનું કુલ કલેક્શન 55.10 કરોડ છે. જ્યારે વિશ્વભરમાં આ ફિલ્મે 70 કરોડ રૂપિયાનો આંકડો પાર કરી લીધો છે.
બજેટથી કેટલી દૂર છે 'થામા'
મેકર્સે 'થામા' ફિલ્મ બનાવવા માટે 145 કરોડ રૂપિયાનો ખર્ચ કર્યો છે. આ ફિલ્મે ભાઈબીજ પર ધૂમ મચાવી છે અને હાલમાં તે તેના બજેટથી દૂર નથી. એવી અપેક્ષા રાખવામાં આવી રહી છે કે આ વીકએન્ડના અંત સુધીમાં ‘થામા’ તેના બજેટની ખૂબ નજીક પહોંચી શકે છે, કારણ કે વીકએન્ડ પર ફિલ્મોની કમાણીમાં વધારો થવાની સંભાવના હોય છે.
આયુષ્માન ખુરાના તેમની દમદાર એક્ટિંગ માટે જાણીતા છે. તેમના ફિલ્મી કરિયરની વાત કરીએ તો ‘થામા’ તેમના માટે ખૂબ જ ખાસ ફિલ્મ સાબિત થઈ શકે છે. જો વીકએન્ડ પર ફિલ્મની કમાણી સુધરશે, તો આ ફિલ્મ તેમના અત્યાર સુધીના કરિયરની સૌથી વધુ કમાણી કરનારી ફિલ્મ પણ બની શકે છે. હાલમાં આયુષ્માન ખુરાનાની સૌથી વધુ કમાણી કરનારી ફિલ્મ ‘ડ્રીમ ગર્લ’ અને બીજા નંબર પર ફિલ્મ ‘બધાઈ હો’ છે.
રશ્મિકા મંદાનાનો ફિલ્મી રેકોર્ડ પણ ખૂબ જ શાનદાર રહ્યો છે. ‘સિકંદર’ને બાજુ પર રાખીએ તો તેમના હિસ્સામાં ભારતની સૌથી વધુ કમાણી કરનારી બીજી ફિલ્મ પણ સામેલ છે. ‘એનિમલ’ અને ‘પુષ્પા’ જેવી ફિલ્મોના કારણે દર્શકોમાં તેમની મજબૂત પકડ છે.