વિજ્ઞાન અને આધ્યાત્મિકતાની સફર; કર્તવ્ય શાહની હિન્દી ફિલ્મ ‘દેવી વિજ્ઞાનમ’ 4 ડિસેમ્બરે દેશભરના સિનેમાઘરોમાં થશે રિલીઝ

ફિલ્મની વાર્તા એક એવા નાસ્તિક વ્યક્તિની આસપાસ ફરે છે, જેને પોતાની વિચારધારા અને માન્યતાઓ પર સંપૂર્ણ વિશ્વાસ છે. જોકે, તેના જીવનમાં કેટલીક રહસ્યમય ઘટનાઓ બનવા લાગે છે, જે તેની વિચારસરણી અને ધારણાઓને પડકાર આપે છે.

By: Nilesh ZinzuwadiaEdited By:Nilesh ZinzuwadiaPublish Date: Sat, 21 Nov 2026 04:02 PM (IST)Updated: Sat, 21 Nov 2026 04:02 PM (IST)
science-meets-spirituality-kartavya-shahs-hindi-drama-devi-vigyanam-to-hit-theatres-on-december-4

Devi Vigyanam movie:શું વિજ્ઞાન દરેક સવાલનો જવાબ આપી શકે છે? કે પછી જીવનમાં કેટલાક એવા અનુભવો પણ હોય છે, જેને તર્કની મર્યાદામાં રહીને સમજવા મુશ્કેલ છે? આ જ સવાલ આગામી હિન્દી ફિલ્મ ‘દેવી વિજ્ઞાનમ’ની વાર્તાનો મુખ્ય આધાર છે. વિજ્ઞાન, આધ્યાત્મિકતા અને જિજ્ઞાસાને કેન્દ્રમાં રાખીને બનાવવામાં આવેલી આ ફિલ્મનું દિગ્દર્શન કર્તવ્ય શાહે કર્યું છે. કિંગ પ્રોડક્શન હાઉસના બેનર હેઠળ નિર્મિત આ ફિલ્મ 4 ડિસેમ્બરે સિનેમાઘરોમાં રિલીઝ થશે.

ફિલ્મની વાર્તા એક નાસ્તિક વ્યક્તિ વિશે

ફિલ્મની વાર્તા એક એવા નાસ્તિક વ્યક્તિની આસપાસ ફરે છે, જેને પોતાની વિચારધારા અને માન્યતાઓ પર સંપૂર્ણ વિશ્વાસ છે. જોકે, તેના જીવનમાં કેટલીક રહસ્યમય ઘટનાઓ બનવા લાગે છે, જે તેની વિચારસરણી અને ધારણાઓને પડકાર આપે છે. આ ઘટનાઓ બાદ તેનું જીવન એક એવી યાત્રા તરફ આગળ વધે છે, જ્યાં તેને મા કરણીની દિવ્ય શક્તિનો અહેસાસ થાય છે. આ અનુભવ તેના જીવન અને દુનિયાને જોવાના દૃષ્ટિકોણમાં પરિવર્તન લાવવાનું શરૂ કરે છે.

જીવનના કેટલાક અનુભવો

ફિલ્મના દિગ્દર્શક કર્તવ્ય શાહે જણાવ્યું હતું કે દેવી વિજ્ઞાનમના માધ્યમથી અમારો પ્રયાસ વિજ્ઞાન અને આધ્યાત્મિકતા વચ્ચેના સંબંધને એક રસપ્રદ માનવીય વાર્તા દ્વારા રજૂ કરવાનો છે. ફિલ્મમાં એક એવા વ્યક્તિની યાત્રા દર્શાવવામાં આવી છે, જે હંમેશાં પરમ શક્તિના અસ્તિત્વ પર સવાલ ઉઠાવતો રહ્યો છે, પરંતુ જીવનમાં કેટલાક એવા અનુભવોમાંથી પસાર થાય છે, જે તેની માન્યતાઓને પડકારે છે. ફિલ્મના માધ્યમથી અમે વિચારસરણી, શ્રદ્ધા અને માનવીય સમજણની મર્યાદાઓ સાથે જોડાયેલા સવાલો ઉઠાવવાનો પ્રયાસ કર્યો છે. આ ફિલ્મ દર્શકોને શોધ અને આત્મમંથનની એક અનોખી યાત્રા પર લઈ જશે. ફિલ્મમાં ચેતન ધનાણી, કે. આર્યવર્ધન, પૂજા જોશી, ટીકુ તલસાનિયા, મેહુલ બૂચ, આલોક ઠાકર, ક્રુશ દેબૂ અને નીલેશ ભટ્ટ મુખ્ય ભૂમિકાઓમાં જોવા મળશે.

આધ્યાત્મિકતાને એક નવા દૃષ્ટિકોણથી

ફિલ્મમાં કબીરનું પાત્ર ભજવનાર ચેતન ધનાણીએ જણાવ્યું હતું કે કબીરની જીવનયાત્રા તેની ગહન માન્યતાઓને પડકારે છે અને તેને જીવન તથા આધ્યાત્મિકતાને એક નવા દૃષ્ટિકોણથી જોવા માટે પ્રેરિત કરે છે.આદિત્યની ભૂમિકા ભજવનાર કે. આર્યવર્ધને જણાવ્યું હતું કે આ ફિલ્મ વિજ્ઞાન અને આધ્યાત્મિકતા વચ્ચેના સંબંધને ઉજાગર કરે છે અને દર્શકોને આ બંને પાસાં વિશે નવા દૃષ્ટિકોણથી વિચારવા માટે પ્રેરિત કરે છે.નિષ્ઠાની ભૂમિકા ભજવનાર પૂજા જોશીએ જણાવ્યું હતું કે, દેવી વિજ્ઞાનમ શ્રદ્ધા, સંબંધો અને જીવનનાં રહસ્યોની શોધ કરે છે. આ ફિલ્મનો હિસ્સો બનવું મારા માટે એક યાદગાર અનુભવ રહ્યો છે.

 વિષય એક રસપ્રદ સિનેમેટિક અનુભવના સ્વરૂપમાં રજૂ

ફિલ્મના નિર્માતા લતેશ સોનીએ જણાવ્યું હતું કે દેવી વિજ્ઞાનમના માધ્યમથી અમે મોટા પડદા પર એક એવી અનોખી વાર્તા લાવવાનો પ્રયાસ કરી રહ્યા છીએ, જેમાં મનોરંજનની સાથે એક સાર્થક સંદેશ પણ સમાયેલો છે. વિજ્ઞાન અને આધ્યાત્મિકતા વચ્ચેનો સંબંધ એવો વિષય છે, જેણે હજારો વર્ષોથી લોકોને વિચારવા અને સવાલો ઉઠાવવા માટે પ્રેરિત કર્યા છે. આ વિષયને એક રસપ્રદ સિનેમેટિક અનુભવના સ્વરૂપમાં રજૂ કરવાનો અમારો પ્રયાસ રહ્યો છે, જે દર્શકોને પરંપરાગત માન્યતાઓથી આગળ વધીને વિચારવા અને જીવનનાં રહસ્યો પર ચિંતન કરવા પ્રેરિત કરશે.