Salman Khan Trolling: Bigg Boss 20ના બીજા વીકએન્ડ કા વારમાં સલમાન ખાને કન્ટેસ્ટન્ટ્સની ગેમ સાથે સોશિયલ મીડિયા પર થતી ટ્રોલિંગનો મુદ્દો પણ ઉઠાવ્યો. તેમણે ઉંમર, વજન, દેખાવ અને ખાસ કરીને માતા બન્યા પછી મહિલાઓના શરીર પર કરવામાં આવતી ટિપ્પણીઓને લઈને નારાજગી વ્યક્ત કરી.
કોઈના શરીર કે ઉંમર પર ટિપ્પણી કરવી સામાન્ય મજાક નથી
સલમાન ખાને કહ્યું કે સોશિયલ મીડિયા આજે માત્ર મનોરંજનનું માધ્યમ રહ્યું નથી. ગેમિંગ, કન્ટેન્ટ ક્રિએશન, વીડિયો એડિટિંગ અને અન્ય ડિજિટલ કામોથી ઘણા લોકો પોતાની કારકિર્દી બનાવી રહ્યા છે. જોકે, આ જ પ્લેટફોર્મ પર ટ્રોલિંગ પણ વધી રહ્યું છે. તેમના કહેવા પ્રમાણે, કોઈ વ્યક્તિના વજન, ઉંમર, લુક, પરિવાર કે કરિયરને લઈને અપમાનજનક કમેન્ટ કરવી સામાન્ય મજાક નથી. તેમણે ટ્રોલર્સને સવાલ કર્યો કે જેને તેઓ સોશિયલ મીડિયા પર ખરાબ કહી રહ્યા છે, કદાચ એ વ્યક્તિને તેઓ ક્યારેય મળ્યા પણ નથી.
સલમાને પોતાના અનુભવનો ઉલ્લેખ કરતાં કહ્યું કે તેમના વિશે પણ ઘણી વખત ‘ઘરડો થઈ ગયો’ જેવી કમેન્ટ કરવામાં આવે છે. તેના જવાબમાં તેમણે કહ્યું કે, “હું 60નો થયો છું.” ત્યારબાદ તેમણે લાઈવ શોમાં પોતાની ટોપી અને જેકેટ ઉતારીને પોતાની વાત વધુ સ્પષ્ટ રીતે રજૂ કરી.
મહિલાઓના શરીર પર ટ્રોલિંગને લઈને પણ આપી પ્રતિક્રિયા
સલમાન ખાને ખાસ કરીને મહિલાઓને માતા બન્યા બાદ કરવામાં આવતી બોડી-શેમિંગ અંગે વાત કરી. તેમણે કહ્યું કે પ્રેગ્નન્સી દરમિયાન મહિલાના શરીરમાં ફેરફાર અને વજન વધવું સ્વાભાવિક બાબત છે. ત્યારબાદ તે મહિલા ફરી કામ પર પરત ફરતી હોય તો પોતાની ફિટનેસ અંગે શું કરવું તે તેનો વ્યક્તિગત નિર્ણય છે. સલમાને કોઈનું નામ લીધું નહોતું, પરંતુ તેમની આ વાતને સોશિયલ મીડિયા પર કેટરિના કૈફને માતા બન્યા બાદ મળેલી બોડી-શેમિંગ સાથે જોડીને જોવામાં આવી રહી છે.
તેમણે ટ્રોલર્સને પોતાના પરિવાર વિશે વિચારવાનું પણ કહ્યું. જો કોઈ વ્યક્તિની માતા, બહેન, પત્ની કે દીકરી વિશે આવી જ અપમાનજનક ટિપ્પણી કરવામાં આવે તો પરિવારના લોકોને કેવું લાગશે, તે વિચારવાની સલાહ તેમણે આપી.
ફિલ્મ પસંદ નથી તો ન જુઓ
સલમાને કહ્યું કે કોઈને ફિલ્મ કે કલાકારનું કામ પસંદ ન આવે તો તે પોતાની અસહમતિ વ્યક્ત કરી શકે છે. પરંતુ તેના માટે ગાળો આપવા કે વ્યક્તિગત હુમલો કરવાની જરૂર નથી. તેમણે કહ્યું કે કલાકારો દર્શકોના મનોરંજન માટે મહેનત કરે છે અને દર્શકો પણ પોતાની પસંદગી મુજબ ફિલ્મ જોવી કે ન જોવી તે નક્કી કરી શકે છે.
તેમણે પોતાના ટ્રોલિંગના અનુભવ વિશે પણ વાત કરી. ક્યારેક તેમના વાળ કે લુકને લઈને કમેન્ટ કરવામાં આવે છે, જ્યારે ઘણી વખત તે કોઈ ફિલ્મના પાત્રનો ભાગ હોય છે. સલમાને કહ્યું કે તેઓ ટીકા અને પ્રશંસા બંનેને પોતાની રીતે લેવાનો પ્રયાસ કરે છે. સલમાને એ પણ જણાવ્યું કે કેટલાક લોકો સતત ઓનલાઈન ટ્રોલિંગના કારણે માનસિક રીતે પરેશાન થઈ શકે છે. તેથી સોશિયલ મીડિયા પર કમેન્ટ કરતા પહેલાં શબ્દોની અસર વિશે વિચારવું જરૂરી છે.
સોશિયલ મીડિયા પર સકારાત્મક ઉપયોગની પણ વાત કરી
સલમાને સોશિયલ મીડિયાને સંપૂર્ણપણે નકારાત્મક ગણાવ્યું નથી. તેમના જણાવ્યા પ્રમાણે, આ પ્લેટફોર્મનો ઉપયોગ ઘણા લોકો સારું કામ કરવા અને પોતાની ઓળખ બનાવવા માટે કરી રહ્યા છે. તેમનો મુદ્દો માત્ર એટલો હતો કે અસહમતિ વ્યક્ત કરવી અને કોઈને અપમાનિત કરવું બંને અલગ બાબતો છે.
એપિસોડ દરમિયાન સલમાને પોતાના ફેન ક્લબની શક્તિનો પણ ઉલ્લેખ કર્યો અને કહ્યું કે જો તેઓ કોઈને શોધવાનું કહે તો વ્યક્તિ વિશે ઘણી અંગત માહિતી બહાર આવી શકે છે. તેમણે પોતાના જૂના અનુભવનો ઉલ્લેખ કરતાં જણાવ્યું કે એક વ્યક્તિ સતત તેમના વિશે વાંધાજનક લખતો હતો. સાયબર સેલની મદદથી તેની ઓળખ મળી હતી અને બાદમાં તે વ્યક્તિએ માફી માંગી હતી.
બીજી તરફ, Bigg Boss 20ના એક પ્રોમોમાં સલમાન ખાન છાતી પકડીને દુખાવામાં હોય તેવું જોવા મળતાં તેમની તબિયતને લઈને ચિંતા ફેલાઈ હતી. જોકે, સલમાને બાદમાં સોશિયલ મીડિયા પર સ્પષ્ટતા કરી કે તેઓ સંપૂર્ણપણે ઠીક છે. તેમના જણાવ્યા પ્રમાણે, આ દૃશ્ય શોના કન્ટેસ્ટન્ટ કાજી તૌકીરને બીમારીનું નાટક કરવાના મુદ્દે સમજાવવા માટે કરવામાં આવેલા એક્ટનો ભાગ હતું અને પ્રોમોના એડિટિંગને કારણે તેનો અર્થ અલગ રીતે દેખાયો.