Mardaani 3 Trailer Rani Mukerji: રાની મુખર્જી તેની લોકપ્રિય ફિલ્મ ફ્રેન્ચાઇઝીની આગામી ફિલ્મ 'મર્દાની 3' સાથે શિવાની શિવાજી રોયના દમદાર પાત્રમાં પરત ફરી રહી છે. તાજેતરમાં રિલીઝ થયેલું 3 મિનિટ 16 સેકન્ડનું ટ્રેલર અત્યંત પ્રભાવશાળી છે, જેમાં રાની મુખર્જી પહેલા કરતા પણ વધુ દમદાર અવતારમાં જોવા મળી રહી છે. આ વખતે શિવાનીનો સામનો કોઈ પુરુષ વિલન સાથે નહીં, પરંતુ એક એવી મહિલા સાથે છે જે બાળકીઓની તસ્કરીના કાળા કારોબાર સાથે જોડાયેલી છે.
માસૂમ બાળકીઓની તસ્કરી અને 'અમ્મા'નો આતંક
આ ફિલ્મની કહાણી હૃદયને હચમચાવી દે તેવી છે, જેમાં દર્શાવવામાં આવ્યું છે કે કેવી રીતે એક મહિલા જ અન્ય મહિલાઓની દુશ્મન બને છે. ફિલ્મની વિલન 'અમ્મા' ભોળી અને માસૂમ બાળકીઓનું અપહરણ કરીને તેમને થોડા પૈસા માટે વેચી દે છે. આટલું જ નહીં, જ્યારે આ બાળકીઓ તેના કોઈ કામની નથી રહેતી, ત્યારે તે તેમને કચરાની જેમ ફેંકી દે છે. શિવાની રોય આ વખતે 93 બાળકીઓને બચાવવા માટે આ ખૂંખાર વિલન સામે મેદાનમાં ઉતરે છે.
શિવાની અને અમ્મા વચ્ચેની સીધી ટક્કર
ટ્રેલર પરથી સ્પષ્ટ થાય છે કે પોલીસ ઓફિસર શિવાની અને અમ્મા વચ્ચે કાંટાની ટક્કર થવાની છે. અમ્મા જેટલી શાતિર અને ક્રૂર છે, શિવાની તેટલી જ ચાલાક અને પ્રમાણિક છે. ટ્રેલરમાં એક દ્રશ્ય છે જ્યાં અમ્મા શિવાનીને લાંચ આપીને ખરીદવાનો પ્રયાસ કરે છે, પરંતુ શિવાની તેને ખુલ્લી ચેતવણી આપે છે. શિવાનીના દમદાર ડાયલોગ્સ પ્રેક્ષકોના રુંવાડા ઉભા કરી દે તેવા છે. ફિલ્મમાં ગુજરાતી અભિનેત્રી જાનકી બોડીવાલા પણ જોવા મળશે.
ક્યારે રિલીઝ થશે ફિલ્મ
'મર્દાની 3' ની રિલીઝ રાની મુખર્જી માટે ખૂબ જ ખાસ છે કારણ કે આ ફિલ્મની સાથે તે બોલિવૂડમાં પોતાના 30 વર્ષ પૂર્ણ કરી રહી છે. આ ફિલ્મ 30 જાન્યુઆરી ના રોજ સિનેમાઘરોમાં રિલીઝ થવા માટે તૈયાર છે. ટ્રેલર જોયા પછી પ્રેક્ષકોમાં આ ફિલ્મને લઈને ભારે ઉત્સાહ જોવા મળી રહ્યો છે.