Ramayana Advance booking: ભારતીય સિનેમા અને સંસ્કૃતિ માટે એક અત્યંત ગૌરવપૂર્ણ અને ઐતિહાસિક ક્ષણ નજીક આવી રહી છે. નમિત મલ્હોત્રા નિર્મિત અને નિતેશ તિવારી નિર્દેશિત બહુપ્રતિક્ષિત ભવ્ય ફિલ્મ 'રામાયણ: રાઈઝ ઓફ અ લિજેન્ડ' (Ramayana: Rise of a Legend) નો વર્લ્ડ પ્રીમિયર અપકમિંગ 27 ઓક્ટોબરે લોસ એન્જલસ સ્થિત પ્રતિષ્ઠિત 'એકેડેમી મ્યુઝિયમ ઓફ મોશન પિક્ચર્સ' ના જાણીતા 'ડેવિડ ગેફેન થિયેટર' ખાતે યોજાવા જઈ રહ્યો છે. આંતરરાષ્ટ્રીય મંચ પર દિવાળીના તહેવારના ઉત્સાહ વચ્ચે ભારતીય પરંપરા અને આધ્યાત્મિક વારસાને રજૂ કરતી આ પસંદગીની ભારતીય ફિલ્મ બનશે.
945 ગ્લોબલ મહેમાનો અને પરંપરાગત ભારતીય ડ્રેસ કોડ
લોસ એન્જલસમાં યોજાનારા આ ભવ્ય પ્રીમિયરમાં લગભગ 945 જેટલા ખાસ મહેમાનો ઉપસ્થિત રહેશે, જેમાં હોલીવુડના અગ્રણી ફિલ્મ નિર્માતાઓ, આંતરરાષ્ટ્રીય મીડિયાના પ્રતિનિધિઓ, વિવેચકો અને સિનેમા જગતની નામાંકિત હસ્તીઓનો સમાવેશ થાય છે.
આ ઈવેન્ટને વધુ વિશિષ્ટ બનાવવા માટે નિર્માતાઓએ તમામ મહેમાનોને પરંપરાગત ભારતીય ઉત્સવના પોશાકમાં હાજરી આપવા ખાસ વિનંતી કરી છે, જેથી હોલીવુડના હૃદયસમા લોસ એન્જલસમાં દિવાળીની ભવ્યતા અને ભારતીય કલ્ચરનો વાસ્તવિક રંગ જોવા મળે. અહીંનો 'રેડ કાર્પેટ' પણ સંપૂર્ણપણે ભારતીય સંસ્કૃતિ અને વારસાને સન્માન આપતી શૈલીમાં તૈયાર કરવામાં આવશે.
3D માધ્યમથી જીવંત થશે રામાયણની કથા
પ્રીમિયરની ભવ્યતામાં વધારો કરવા માટે આ આંતરરાષ્ટ્રીય સ્ક્રીનિંગ વિશેષરૂપે 3D ફોર્મેટમાં કરવામાં આવશે. 3D ટેકનોલોજીને લીધે ફિલ્મના દરેક દ્રશ્યો, અદ્ભુત વિઝ્યુઅલ ઈફેક્ટ્સ (VFX) અને ભાવનાત્મક ક્ષણો અત્યંત જીવંત અનુભવાશે. આ જ કારણસર, લોસ એન્જલસ પ્રીમિયરમાં આવનારા તમામ મહેમાનો મોટા પડદા પરના આ અલૌકિક અનુભવમાં ડૂબી જવા ઉત્સુક છે.
ભારતીય સિનેમાનો સૌથી મોટો પ્રોજેક્ટ: બે ભાગમાં થશે રિલીઝ
'રામાયણ' નું નિર્માણ માત્ર એક વ્યાવસાયિક પ્રોજેક્ટ તરીકે નહીં, પરંતુ પવિત્ર સાંસ્કૃતિક જવાબદારી તરીકે કરવામાં આવ્યું છે.
નિર્માણ અને સહયોગ:
આ ફિલ્મનું નિર્માણ નમિત મલ્હોત્રાના 'પ્રાઇમ ફોકસ સ્ટુડિયો' દ્વારા કરવામાં આવ્યું છે, જેમાં 8 ઓસ્કાર જીતી ચૂકેલી વિશ્વવિખ્યાત કંપની DNEG અને કેજીએફ ફેમ યશની 'મોન્સ્ટર માઇન્ડ ક્રિએશન્સ' સહયોગી છે.
રિલીઝ તારીખ:
આ મેગા બજેટ ફિલ્મ બે ભાગમાં રજૂ થશે. પ્રથમ ભાગ 5 નવેમ્બર, 2026 ના રોજ વિશ્વભરમાં રિલીઝ થશે, જ્યારે બીજો ભાગ 2027ની દિવાળી પર સિનેમાઘરોમાં આવશે.
ભાષાઓ અને ડિસ્ટ્રિબ્યુશન:
ભારતમાં આ ફિલ્મ હિન્દી, તમિલ, તેલુગુ, કન્નડ અને મલયાલમ ભાષાઓમાં અને IMAX ફોર્મેટમાં દર્શાવવામાં આવશે. આંતરરાષ્ટ્રીય સ્તરે 'સોની પિક્ચર્સ' અને હિન્દી બેલ્ટમાં 'ધર્મા પ્રોડક્શન્સ' દ્વારા તેનું વિતરણ કરવામાં આવશે.
દુનિયાભરમાં આ અદ્ભુત ફિલ્મના એડવાન્સ બુકિંગની શરૂઆત 20 ઓક્ટોબરથી થવા જઈ રહી છે.