Ramayana Movie Tax Free: બોલિવૂડ અને ભારતીય સિનેમાની સૌથી મોસ્ટ અવેટેડ ફિલ્મ ‘રામાયણ: ભાગ 1’ ને લઈને ગ્રાન્ડ ન્યૂઝ સામે આવ્યા છે. પશ્ચિમ બંગાળમાં નિતેશ તિવારીના નિર્દેશનમાં બનેલી આ ભવ્ય પૌરાણિક ફિલ્મને ટેક્સ-ફ્રી જાહેર કરવામાં આવી છે. પશ્ચિમ બંગાળ વિધાનસભાના વિરોધ પક્ષના નેતા અને ભાજપના જનપ્રિય નેતા સુવેન્દુ અધિકારીએ એક કાર્યક્રમ દરમિયાન આ મહત્વપૂર્ણ નિર્ણયની જાહેરાત કરી હતી. ₹4,000 કરોડના વિશાળ બજેટમાં આકાર પામેલી આ હાઈ-બજેટ VFX વન્ડરને લઈને દેશભરના ચાહકોમાં ભારે ઉત્સાહ જોવા મળી રહ્યો છે.
દશેરા મહોત્સવમાં થઈ જાહેરાત
તાજેતરમાં કોલકાતાના સેન્ટ્રલ પાર્કમાં આયોજિત ભવ્ય દશેરા કાર્યક્રમમાં ફિલ્મ ‘રામાયણ’ના લીડ એક્ટર્સ રણબીર કપૂર અને સાઉથ સુપરસ્ટાર યશ ખાસ ઉપસ્થિત રહ્યા હતા. આ કાર્યક્રમ દરમિયાન સુવેન્દુ અધિકારીએ ચાહકોને સંબોધતા ખુશખબરી આપી હતી.
સમાચાર એજન્સી ANI સાથે વાત કરતા સુવેન્દુ અધિકારીએ જણાવ્યું હતું કે, "પશ્ચિમ બંગાળ રાજ્યમાં 'રામાયણ' ફિલ્મને ટેક્સ-ફ્રી કરવામાં આવશે. જે રીતે અગાઉ 'ધ કેરલા સ્ટોરી', 'ધ કાશ્મીર ફાઇલ્સ' અને 'ધ બંગાળ ફાઇલ્સ' જેવી ફિલ્મોને કરમુક્ત કરવામાં આવી હતી, તે જ રીતે સનાતન સંસ્કૃતિ અને પૌરાણિક કથા પર આધારિત 'રામાયણ'ને પણ ટેક્સ-ફ્રી કરવામાં આવશે." આ ઉપરાંત તેમણે ઉમેર્યું હતું કે ભવિષ્યમાં દર્શકો ભગવાન શ્રીકૃષ્ણ, મહાભારત અને અર્જુન જેવા પૌરાણિક પાત્રો પર આધારિત ભવ્ય સિનેમેટિક પ્રોજેક્ટ્સની પણ અપેક્ષા રાખી શકે છે.
એડવાન્સ બુકિંગમાં બમ્પર કમાણી
રિલીઝ પહેલાં જ ફિલ્મ ‘રામાયણ: ભાગ 1’ એડવાન્સ બુકિંગમાં નવા રેકોર્ડ સર્જી રહી છે. ફિલ્મના પ્રથમ દિવસ એટલે કે 5 નવેમ્બર, 2026 માટે અત્યાર સુધીમાં ₹1.53 કરોડની ટિકિટોનું એડવાન્સ બુકિંગ થઈ ચૂક્યું છે. બ્લોક બુકિંગ સિવાયના આંકડા જોઈએ તો ફિલ્મે અત્યાર સુધી ₹63.32 લાખનો આંકડો પાર કર્યો છે.
રાજ્યવાર બુકિંગ કલેક્શનની વાત કરીએ તો:
- મહારાષ્ટ્ર: ₹57.09 લાખ સાથે પ્રથમ ક્રમે
- ગુજરાત: ₹17.87 લાખ સાથે બીજા ક્રમે
- દિલ્હી: ₹15.10 લાખ સાથે ત્રીજા ક્રમે
ફિલ્મના કુલ એડવાન્સ બુકિંગ રેવન્યુમાં દેશના ટોચના 10 રાજ્યોનો ફાળો 95% જેટલો નોંધાયો છે.
દિવાળી 2026 ના પાવન પર્વે બે ભાગમાં થશે રિલીઝ
નમિત મલ્હોત્રાના 'પ્રાઇમ ફોકસ સ્ટુડિયો', વિશ્વપ્રસિદ્ધ 'DNEG' અને યશના 'મોન્સ્ટર માઇન્ડ ક્રિએશન્સ'ના સંયુક્ત ઉપક્રમે બનેલી આ બિગ-બજેટ ફિલ્મ બે ભાગમાં રિલીઝ થવાની છે. ફિલ્મનો પ્રથમ ભાગ 5 નવેમ્બર, 2026 ના રોજ દિવાળીના તહેવાર પર વિશ્વભરના સિનેમાઘરોમાં રિલીઝ થશે, જ્યારે બીજો ભાગ વર્ષ 2027 ની દિવાળી દરમિયાન મોટા પડદા પર ધમાકો કરશે.