Ramayana First Look: રણબીર કપૂર અને સાઈ પલ્લવી અભિનીત પૌરાણિક મેગા-બજેટ ફિલ્મ 'રામાયણ' (Ramayana) ની દર્શકો આતુરતાથી રાહ જોઈ રહ્યા છે. ત્યારે નિર્માતાઓએ ચાહકોનો ઉત્સાહ બમણો કરતા ગણેશ ચતુર્થીના પવિત્ર અવસર પર એક મોટી સરપ્રાઈઝ આપી છે. મેકર્સે ફિલ્મમાંથી રણબીર અને સાઈ પલ્લવીનો 'સીયા-રામ' ના રૂપમાં એક અત્યંત આકર્ષક અને દિવ્ય ફર્સ્ટ લૂક શેર કર્યો છે.
વનવાસ દરમિયાનની ક્ષણ દર્શાવતું દિવ્ય પોસ્ટર
સામે આવેલા નવા પોસ્ટરમાં સાઈ પલ્લવી માતા સીતાના રૂપમાં અને રણબીર કપૂર ભગવાન શ્રીરામના અવતારમાં જોવા મળે છે. પોસ્ટરમાં બંને જંગલમાં એક શાંત ધોધ પાસે ખડક પર બેઠેલા નજરે પડે છે, જે તેમના વનવાસના સમયની ભાવુક અને શાંત ક્ષણને દર્શાવે છે.
ભગવાન રામની ભૂમિકામાં રણબીર કપૂર માતા સીતાના વાળમાં પ્રેમપૂર્વક ફૂલ સજાવતા જોવા મળે છે. બંને કલાકારોના ચહેરા પરના શાંત ભાવ અને આસપાસનું પ્રાકૃતિક વાતાવરણ આ તસવીરમાં અદ્ભુત દિવ્યતા ઉમેરે છે. સોશિયલ મીડિયા પર ફેન્સ સાઈ પલ્લવીના લૂકના ભારે વખાણ કરી રહ્યા છે અને તેમને સીતા માતાના પાત્ર માટે શ્રેષ્ઠ પસંદગી ગણાવી રહ્યા છે.
પ્રથમ ગીત 'અરિજિત-શ્રેયા'ના અવાજમાં ટૂંક સમયમાં થશે રિલીઝ
નવું પોસ્ટર રિલીઝ કરવાની સાથે નિર્માતાઓએ ચાહકોને પ્રથમ ગીત અંગે પણ અપડેટ આપી છે. સત્તાવાર તારીખ ટૂંક સમયમાં જાહેર થશે, પરંતુ પોસ્ટર સાથે બેકગ્રાઉન્ડમાં વાગી રહેલી ધૂન આ ગીતની જ હોવાનું મનાઈ રહ્યું છે.
આ ખાસ ગીતને દેશના પ્રખ્યાત સિંગર અરિજિત સિંહ અને શ્રેયા ઘોષાલ દ્વારા ગાવામાં આવ્યું છે. આ ગીતના અદ્ભુત બોલ કવિ કુમાર વિશ્વાસ દ્વારા લખાયા છે, જ્યારે સંગીત ઓસ્કાર વિજેતા એ.આર. રહેમાન (A.R. Rahman) દ્વારા તૈયાર કરવામાં આવ્યું છે.
ફિલ્મની સ્ટારકાસ્ટ અને રિલીઝ ડેટ
નમિત મલ્હોત્રા દ્વારા નિર્મિત અને નિતેશ તિવારીના નિર્દેશનમાં બની રહેલી આ ફિલ્મમાં રણબીર કપૂર (રામ), સાઈ પલ્લવી (સીતા), કેજીએફ ફેમ યશ (રાવણ), રવિ દુબે (લક્ષ્મણ) અને સની દેઓલ (હનુમાન) ની ભૂમિકામાં જોવા મળશે. આ ફિલ્મ બે ભાગમાં રિલીઝ થશે. પ્રથમ ભાગ દિવાળી 2026 અને બીજો ભાગ દિવાળી 2027 માં સિનેમાઘરોમાં આવશે.