Maran Best Gujarati Film National Award: શ્રેષ્ઠ ગુજરાતી ફિલ્મ તરીકે 'મારણ' (Maran) ને રાષ્ટ્રીય ફિલ્મ પુરસ્કાર (National Film Award) એનાયત થતાં તેના દિગ્દર્શક અભિષેક જૈને આનંદ અને ગર્વની લાગણી વ્યક્ત કરી છે. તેમણે જણાવ્યું હતું કે કોઈપણ નિયામક કે સર્જક માટે નેશનલ એવોર્ડ મેળવવો એ ખૂબ જ સંતોષ અને ગૌરવની વાત હોય છે, ખાસ કરીને જ્યારે આ સન્માન આપણી માતૃભાષા ગુજરાતી ફિલ્મ માટે મળ્યું હોય. જ્યારે પણ કોઈ ગુજરાતી ફિલ્મને રાષ્ટ્રીય સ્તરે એવોર્ડ મળે છે, ત્યારે આખી પ્રાદેશિક ફિલ્મ ઈન્ડસ્ટ્રીનું માન વધે છે અને દેશ-વિદેશના લોકોનું ધ્યાન આપણી ગુજરાતી ફિલ્મો તરફ ખેંચાય છે.
'સિનેમેન' માટે બીજો રાષ્ટ્રીય એવોર્ડ, વિષયવસ્તુ અંગે સ્પષ્ટતા
અભિષેક જૈને વધુમાં જણાવ્યું હતું કે 'સિનેમેન' (CineMan) પ્રોડક્શન માટે આ બીજો નેશનલ એવોર્ડ છે અને આ ફિલ્મ તેમની ટીમ માટે દિલની ખૂબ નજીક છે. સામાન્ય રીતે લોકોના મનમાં એવો ભ્રમ હોય છે કે ગુજરાતી સિનેમામાં માત્ર કોમેડી કે કૌટુંબિક ફિલ્મો જ બને છે. પરંતુ 'વશ' અને 'મારણ' જેવી અલગ વિષયવસ્તુ ધરાવતી ફિલ્મોને જ્યારે રાષ્ટ્રીય એવોર્ડ મળે છે, ત્યારે સમગ્ર સમાજ અને દર્શકો સુધી એક મોટો સંદેશ જાય છે કે ગુજરાતીમાં પણ ગંભીર અને અટકેલા વિષયો પર ગુણવત્તાસભર ફિલ્મો બની શકે છે.
ગુજરાતમાં આયોજન: 'એક ભારત શ્રેષ્ઠ ભારત'નું શ્રેષ્ઠ ઉદાહરણ
આ વખતનો એવોર્ડ સમારોહ ગુજરાતના એકતા નગર (સ્ટેચ્યુ ઓફ યુનિટી) ખાતે આયોજિત થયો છે, જેને અભિષેક જૈને વિશેષ ગણાવ્યો હતો. તેમણે ઉમેર્યું હતું કે દેશ અને ફિલ્મ ઈન્ડસ્ટ્રી માટે આ એક બહુ મોટી ક્ષણ છે. આ સાચા અર્થમાં 'એક ભારત શ્રેષ્ઠ ભારત'નું ઉદાહરણ પૂરું પાડે છે, જ્યાં વિવિધ ભાષાઓની તમામ ફિલ્મ ઈન્ડસ્ટ્રી એકતાના પ્રતીક સમાન સ્થળે એક છત નીચે ભેગી થઈ છે. આ ભવ્ય આયોજનથી ગુજરાતી સિનેમા અને રાજ્યના પ્રવાસન (ટુરિઝમ) ક્ષેત્રને મોટો ફાયદો થશે.