Kabhi Khushi Kabhie Gham 2: બોલિવુડના ઈતિહાસમાં સૌથી લોકપ્રિય ફેમિલી ડ્રામા ગણાતી ફિલ્મ 'કભી ખુશી કભી ગમ' (K3G) ના બીજા ભાગને લઈને છેલ્લા ઘણા સમયથી સોશિયલ મીડિયા પર અટકળો ચાલી રહી છે. વર્ષ 2001 માં રિલીઝ થયેલી આ બ્લોકબસ્ટર ફિલ્મના ચાહકો લાંબા સમયથી સિક્વલની રાહ જોઈ રહ્યા છે. જોકે, હવે ફિલ્મ નિર્માતા કરણ જોહરે આ મામલે ચાહકોની આતુરતાનો અંત લાવતા સ્પષ્ટતા કરી છે.
સિક્વલ બનાવવાની કોઈ યોજના નથી: કરણ જોહર
તાજેતરમાં હિંદુસ્તાન ટાઈમ્સ સાથેની વાતચીતમાં કરણ જોહરે 'કભી ખુશી કભી ગમ 2' અંગે ફેલાયેલી અફવાઓનું ખંડન કર્યું હતું. તેમણે સ્પષ્ટ શબ્દોમાં જણાવ્યું કે, હાલમાં તેમની 'K3G 2' બનાવવાની કે તેમના ડ્રીમ પ્રોજેક્ટ 'તખ્ત' પર ફરી કામ શરૂ કરવાની કોઈ જ યોજના નથી. કરણના આ ખુલાસાથી સિક્વલની આશા રાખીને બેઠેલા લાખો ચાહકોમાં નિરાશા જોવા મળી છે.
'ફિલ્મના ભાવનાત્મક વારસા સાથે ચેડાં નહીં કરું'
ફિલ્મની સફળતા અને તેની ખામીઓ વિશે ખુલ્લેઆમ વાત કરતા કરણ જોહરે જણાવ્યું હતું કે, 'દરેક ફિલ્મમાં કોઈને કોઈ ખામીઓ હોય જ છે અને K3G પણ તેનાથી બાકાત નથી. પરંતુ આ ફિલ્મ સાથે લોકોની અતૂટ યાદો જોડાયેલી છે. ઘણી પેઢીઓ આ ફિલ્મને જોઈને મોટી થઈ છે અને આજે પણ લોકો તેને એટલી જ આત્મીયતાથી યાદ કરે છે.'
તેમણે વધુમાં ઉમેર્યું કે, 'હું આ ફિલ્મના ભાવનાત્મક વારસા અને પ્રેક્ષકોના પ્રેમ સાથે કોઈ પણ પ્રકારના ચેડાં કરવા માંગતો નથી. જ્યારે તમે 'K3G 2' જેવી ફિલ્મ બનાવવાનું વિચારો છો, ત્યારે તમે ખરેખર મુશ્કેલીને આમંત્રણ આપતા હોવ છો. હું આ યાદોને સુરક્ષિત રાખવા માંગુ છું.'
2001 માં રચાયો હતો ઈતિહાસ
શાહરૂખ ખાન, કાજોલ, અમિતાભ બચ્ચન, જયા બચ્ચન, ઋત્વિક રોશન અને કરીના કપૂર જેવા દિગ્ગજ કલાકારોથી સજ્જ આ ફિલ્મે બોક્સ ઓફિસ પર કમાણીના નવા રેકોર્ડ સ્થાપ્યા હતા. કરણ જોહરે ગર્વ સાથે જણાવ્યું હતું કે તેઓ બ્રહ્માંડના આભારી છે કે તેમને એક એવી ફિલ્મ બનાવવાની તક મળી જે આજે 25 વર્ષ પછી પણ લોકોના હૃદયમાં જીવંત છે.