ગુજ્જુ લવ ગૂરૂના અકસ્માત સ્થળે પહોંચ્યા ખજૂર ભાઈ, જાણો લોકોને બે હાથ જોડીને શું કરી અપીલ

Gujju Love Guru News: ગુજરાતના જાણીતા કન્ટેન્ટ ક્રિએટર અને ડિજિટલ ઇન્ફ્લુએન્સર ‘ગુજ્જુ લવ ગૂરૂ’ (ચંદન રાઠોડ)ના તાજેતરમાં એક માર્ગ અકસ્માતમાં થયેલા કરુણ અને દુઃખદ અવસાનથી સમગ્ર સોશિયલ મીડિયા જગત અને ચાહકોમાં શોકની લાગણી છવાઈ ગઈ છે. આ ઘટના બાદ લોકપ્રિય કલાકાર, યુટ્યુબર અને જાણીતા સમાજસેવક નીતિન જાની (ખજૂર ભાઈ) ઘટનાસ્થળે પહોંચ્યા હતા અને સ્વર્ગસ્થ ચંદન રાઠોડના પરિવારજનોની રૂબરૂ મુલાકાત લઈને તેમને સાંત્વના પાઠવી હતી.

અકસ્માત સ્થળે અંધશ્રદ્ધા જોઈને વ્યક્ત કર્યું દુઃખ

અકસ્માતની જગ્યાએ પહોંચેલા ખજૂર ભાઈએ ત્યાંનું દ્રશ્ય જોઈને ભારે અસંતોષ અને દુઃખ વ્યક્ત કર્યું હતું. ઘટનાસ્થળે લોકો દ્વારા શ્રીફળ, પાણીની બોટલો અને નમકીન જેવી વસ્તુઓ મૂકીને અંધશ્રદ્ધા અને અફવાઓ ફેલાવવામાં આવી રહી હોવાનું તેમના ધ્યાને આવ્યું હતું. આ અંગે વિડીયો સંદેશ દ્વારા લોકોને સ્પષ્ટ અપીલ કરતા નીતિન જાનીએ જણાવ્યું હતું કે, અકસ્માતના સ્થળે આવી વસ્તુઓ ચઢાવીને અંધશ્રદ્ધા પ્રોત્સાહિત ન કરવી જોઈએ. જો લોકોને ગુજ્જુ લવ ગૂરૂ પ્રત્યે સાચો પ્રેમ અને આદર હોય તો અંધશ્રદ્ધા છોડીને માર્ગ સુરક્ષા અને સમાજઉપયોગી કાર્યોમાં યોગદાન આપવું જોઈએ. તેમણે રસ્તા પરથી પસાર થતા વાહનચાલકોને હેલ્મેટ પહેરવા પ્રોત્સાહિત કરવા અને વૃક્ષારોપણ જેવા સત્કાર્યો કરવાની સલાહ આપી હતી.