Gujarati Movie Kali Chaudas: ગુજરાતી ફિલ્મ ઈન્ડસ્ટ્રીમાં દર્શકોને એક નવો અને રોમાંચક સિનેમેટિક અનુભવ આપવા માટે 'દ્વાન પ્રોડક્શન' (Dvaan Production) અને 'ડ્રીમ યાત્રા ફિલ્મ્સ' (Dream Yatra Films) ની જોડી સજ્જ થઈ ગઈ છે. હાલમાં જ ફિલ્મનું ટાઈટલ અનાઉન્સ થયા બાદ હવે નિર્માતાઓએ ફિલ્મનું આકર્ષક અને રહસ્યમય પોસ્ટર લોન્ચ કરી દીધું છે, જેને જોઈને જ દર્શકોમાં ફિલ્મ પ્રત્યેનું કુતૂહલ ચરમસીમાએ પહોંચી ગયું છે.
ગામડાંની લોકવાયકાઓ, વહેમો અને અંધશ્રદ્ધાની પૃષ્ઠભૂમિ પર આધારિત આ ફિલ્મનું પોસ્ટર જ એ વાતની સાક્ષી પૂરે છે કે આ ફિલ્મ દર્શકોની રૂંવાડા ઉભા કરી દેશે. ફિલ્મની લોકપ્રિય અને ડરામણી કેચલાઈન-"ગામની સીમમાં એક વાત આજે પણ થાય છે... કે ચાર રસ્તે કુંડાળામાંથી કાંઈ ના લેવાય નહિ તો વળગે: કાળીચૌદસ" સોશિયલ મીડિયા પર અત્યારથી જ ભારે ચર્ચાનો વિષય બની છે.
ધ્રુવ ગોસ્વામીના દિગ્દર્શનમાં બની રહેલી આ મલ્ટીસ્ટારર ફિલ્મનું નિર્માણ દક્ષ એ. વાસુએ કર્યું છે. જ્યારે ક્રિએટિવ પ્રોડ્યુસર તરીકે કશ્યપ કપટા અને સહ-નિર્માતા તરીકે પ્રિયંકા જોશી, વંશ એ. વાસુ અને દીપ પટેલ જવાબદારી સંભાળી રહ્યા છે. જાણીતા લેખક ચેતન દૈયા દ્વારા લખાયેલી આ વાર્તા એક અનોખો સસ્પેન્સ પ્રદાન કરશે.
ફિલ્મમાં શ્રુહદ ગોસ્વામી, રીવા રાચ્છ, કૃણાલ પંડિત, હેમીન ત્રિવેદી, અલ્પના બુચ, રિદ્ધિ યાદવ, દીપેન રાવલ, હેમાંગ દવે, પ્રેમ ગઢવી, ગોપી કેસવ, નંદની ગોપાલકૃષ્ણન, યશ વારન, રીતિકા વાસુ, રવિ રંજન અને કૈલાશ સ્વામી જેવા પ્રતિભાશાળી કલાકારો મહત્વની ભૂમિકામાં જોવા મળશે.
તહેવારોની સિઝનમાં 'કાળીચૌદસ' આવી ચૂકી છે અને હવે ખૌફ તથા રહસ્યથી ભરપૂર આ ફિલ્મ 19 ફેબ્રુઆરી 2027 ના રોજ સિનેમાઘરોમાં રિલીઝ થવા માટે સંપૂર્ણપણે તૈયાર છે!