બોક્સ ઓફિસ પર ધનુષની 'OM'ની જોરદાર શરૂઆત, પહેલા જ દિવસે કલેક્શનમાં 'રામાયણમ'ને આપી ટક્કર

ધનુષની જાસૂસી થ્રિલર O.M: Operation Mole એ રિલીઝના પહેલા જ દિવસે બોક્સ ઓફિસ પર ₹13 કરોડથી વધુ કમાણી કરીને રણબીર કપૂરની રામાયણમને પાછળ છોડી દીધી છે.

By: Jignesh TrivediEdited By:Jignesh TrivediPublish Date: Fri, 20 Nov 2026 11:47 PM (IST)Updated: Fri, 20 Nov 2026 11:47 PM (IST)
dhanushs-om-box-office-day-1-beats-ramayanam-collection

OM Box Office Collection Day 1: એક તરફ સિનેમાઘરોમાં પૌરાણિક મહાકાવ્ય 'રામાયણમ' (Ramayana)નો દબદબો યથાવત છે, ત્યારે બીજી તરફ સાઉથના સુપરસ્ટાર ધનુષે પોતાની નવી જાસૂસી થ્રિલર ફિલ્મ 'ઓ.એમ: ઓપરેશન મોલ' (O.M: Operation Mole) સાથે બોક્સ ઓફિસ પર ધમાકેદાર એન્ટ્રી કરી છે. રિલીઝના પહેલા જ દિવસે આ ફિલ્મે કમાણીના એવા આંકડા રજૂ કર્યા છે કે ટ્રેડ એનાલિસ્ટ્સ પણ ચોંકી ઉઠ્યા છે.

રજનીકાંતના કારણે બદલી હતી રિલીઝ ડેટ

ધનુષની આ બહુપ્રતિક્ષિત ફિલ્મ 'OM' અગાઉ 15 ઓક્ટોબરના રોજ રિલીઝ થવાની હતી. જોકે, તે જ દિવસે સુપરસ્ટાર રજનીકાંતની મોટી ફિલ્મ 'જેલર 2' (Jailer 2) પણ થિયેટરોમાં આવી રહી હતી. પોતાના પૂર્વ સસરા રજનીકાંતની ફિલ્મ સાથે બોક્સ ઓફિસ પર ટક્કર ટાળવા અને તેમના સન્માનમાં ધનુષે પોતાની ફિલ્મની રિલીઝ પાછળ ઠેલવાનો નિર્ણય લીધો હતો. આખરે 20 નવેમ્બરના રોજ આ સ્પાઈ થ્રિલર ફિલ્મે મોટા પડદા પર દસ્તક દીધી અને દર્શકો તરફથી તેને જબરદસ્ત પ્રતિસાદ મળી રહ્યો છે.

પહેલા દિવસે ધનુષની 'OM' એ કેટલી કમાણી કરી?

તમિલ, તેલુગુ અને હિન્દી એમ ત્રણ ભાષાઓમાં રિલીઝ થયેલી 'OM' ફિલ્મને દેશભરમાં લગભગ 5,642 શો મળ્યા છે. બોક્સ ઓફિસ ટ્રેકર સૈકનિલ્ક (Sacnilk)ના શરૂઆતી આંકડા મુજબ, ફિલ્મે પહેલા જ દિવસે ઘરેલું બોક્સ ઓફિસ પર 13 કરોડ રૂપિયાનું નેટ કલેક્શન કરી લીધું છે, જ્યારે તેનું ગ્રોસ કલેક્શન 15 કરોડ રૂપિયાને પાર પહોંચી ગયું છે.

ભાષા પ્રમાણે પહેલા દિવસની કમાણી પર નજર કરીએ તો તમિલ બેલ્ટમાં ધનુષનો જાદુ સૌથી વધુ ચાલ્યો છે, જ્યારે હિન્દી પટ્ટીમાં શરૂઆત થોડી ધીમી રહી છે-

ભાષા પહેલા દિવસનું કલેક્શન (નેટ)
તમિલ 9.58 કરોડ રૂપિયા
તેલુગુ 3.09 કરોડ રૂપિયા
હિન્દી 30 લાખ રૂપિયા

શું રણબીર કપૂરની 'રામાયણમ' પર ભારે પડી 'OM'?

હાલમાં બોક્સ ઓફિસ પર રણબીર કપૂર અભિનીત 'રામાયણમ' સૌથી વધુ કમાણી કરનારી ફિલ્મોમાં સામેલ છે. પરંતુ રિલીઝના 16મા દિવસે એટલે કે આજે આ ફિલ્મની કમાણીમાં મોટો ઘટાડો જોવા મળ્યો છે. અત્યાર સુધીના શરૂઆતી આંકડા મુજબ 'રામાયણમ' એ 16મા દિવસે માત્ર 10.24 કરોડ રૂપિયાનો જ બિઝનેસ કર્યો છે, જે અત્યાર સુધીનું તેનું સૌથી ઓછું એક દિવસનું કલેક્શન છે.

16મા દિવસે 'રામાયણમ'ની કમાણીનો સૌથી મોટો હિસ્સો હિન્દી ભાષામાંથી આવ્યો છે, જ્યારે સાઉથની ભાષાઓમાં તેની પકડ ઢીલી પડી છે. તમિલમાં આ ફિલ્મે 82 લાખ, કન્નડમાં 80 લાખ અને તેલુગુમાં માત્ર 31 લાખ રૂપિયાની જ કમાણી કરી છે.

આજના શરૂઆતી આંકડાઓ પરથી સ્પષ્ટ દેખાય છે કે ધનુષની 'OM' એ પહેલા જ દિવસે કમાણીની રેસમાં 'રામાયણમ'ને પાછળ છોડી દીધી છે. હવે જોવાનું એ રહેશે કે શનિવાર અને રવિવારના વીકએન્ડમાં કઈ ફિલ્મ દર્શકોને થિયેટર સુધી ખેંચવામાં વધુ સફળ રહે છે.