The Vvaan Movie: બોલિવૂડ અને તહેવારો વચ્ચે હંમેશાં એક ખાસ જોડાણ રહ્યું છે. હિન્દી સિનેમામાં અત્યાર સુધી હોળી, દિવાળી, ગણેશ ઉત્સવ અને લોહડી જેવા પર્વોને મોટા પાયે દર્શાવવામાં આવ્યા છે. પરંતુ, ભારતીય સિનેમાના ઇતિહાસમાં પહેલીવાર ઉત્તર પ્રદેશ અને બિહારના સૌથી પવિત્ર અને મહાન પર્વ છઠ પૂજાની દિવ્યતા અને ભવ્યતા મોટા પડદા પર જોવા મળશે.
સિદ્ધાર્થ મલ્હોત્રા અને તમન્ના ભાટિયાની આગામી સુપરનેચરલ થ્રિલર ફિલ્મ 'ધ વન: ફોર્સ ઓફ ધ ફોરેસ્ટ' (The One: Force of the Forest)માં છઠ્ઠી મૈયાની અસીમ આસ્થાને ખૂબ જ સુંદર રીતે વણી લેવામાં આવી છે.
ફિલ્મમાં કેમ રજૂ કરાયો છઠ પૂજાનો સીન?
દિગ્દર્શકે આ સુપરનેચરલ થ્રિલર ફિલ્મમાં છઠ પૂજાનો પ્રસંગ માત્ર એક દ્રશ્ય તરીકે નથી રાખ્યો, પરંતુ ફિલ્મની મુખ્ય વાર્તા સાથે તેનો ઊંડો સંબંધ છે. આ આખી ફિલ્મ પટના પાસે આવેલા એક ઐતિહાસિક 'વન દેવી મંદિર' અને તેની આસપાસના રહસ્યમય જંગલોની વાર્તા પર આધારિત છે. ફિલ્મ બિહારની પૌરાણિક માન્યતાઓ અને લોકકથાઓમાં રચેલી-બસેલી છે.
આ ફિલ્મના નિર્દેશક દીપક કુમાર મિશ્રા અને અરૂણાભ કુમાર પોતે બિહારના મૂળ વતની છે. તેઓ ઈચ્છતા હતા કે સિનેમાઘરોમાં આવતા દર્શકો લોકકથાની સાથે બિહારના આ સૌથી સુંદર અને પવિત્ર ઉત્સવનો પણ અનુભવ કરે.
તમન્ના ભાટિયાનો લુક વાયરલ
ફિલ્મના ટીઝરમાં તમન્ના ભાટિયાનો છઠ પૂજા વાળો લુક દર્શકોનું ધ્યાન ખેંચી રહ્યો છે. ટીઝરમાં લાલ સાડી પહેરીને અને કપાળમાં પરંપરાગત નારંગી સિંદૂર લગાવીને તમન્ના ભાટિયા નદીના ઘાટ પર ઊભેલી જોવા મળે છે. તે આસ્થાપૂર્વક સૂર્યદેવ અને છઠ્ઠી મૈયાને અર્ઘ્ય અર્પણ કરી રહી છે. પરંતુ, આ પવિત્ર ક્ષણ દરમિયાન જ તેની સાથે એક અત્યંત ડરામણી અને ખૌફનાક ઘટના ઘટે છે, જે ફિલ્મમાં સસ્પેન્સ ઉભું કરે છે.
ક્યારે રિલીઝ થશે ફિલ્મ?
બિહારની પરંપરા, રહસ્ય અને સુપરનેચરલ થ્રિલરનું અદ્ભુત મિશ્રણ ધરાવતી આ ફિલ્મ 25 સપ્ટેમ્બર 2026ના રોજ થિયેટરોમાં ધમાકેદાર રિલીઝ થવા માટે તૈયાર છે.