3 Idiots 2 Update: બોલિવુડના ઈતિહાસની સૌથી યાદગાર ફિલ્મોમાંની એક '3 ઈડિયટ્સ'ના ચાહકો માટે લાંબા સમયથી રાહ જોવાતા સમાચાર આખરે આવી ગયા છે. મિસ્ટર પરફેક્શનિસ્ટ આમિર ખાને સત્તાવાર રીતે પુષ્ટિ કરી છે કે '3 ઈડિયટ્સ 2' પર કામ શરૂ થઈ ગયું છે. રાંચો, રાજુ અને ફરહાનની આ લોકપ્રિય ત્રિપુટી ફરી એકવાર મોટા પડદા પર ધૂમ મચાવવા માટે તૈયાર છે.
3 Idiots 2: 10 વર્ષનો લીપ અને સુંદર વાર્તા
આમિર ખાને ખુલાસો કર્યો છે કે આ સિક્વલની વાર્તા વર્ષ 2009 ની બ્લોકબસ્ટર ફિલ્મ જ્યાં પૂરી થઈ હતી ત્યાંથી 10 વર્ષ આગળ વધશે. આમિરે આ વાર્તાને 'સુંદર' ગણાવતા કહ્યું કે, 'રાજકુમાર હિરાણી હાલમાં '3 ઈડિયટ્સ 2' ની સ્ક્રિપ્ટ પર કામ કરી રહ્યા છે. મેં વાર્તા સાંભળી છે અને તે અદ્ભુત રીતે લખવામાં આવી છે. આ ફિલ્મમાં મૂળ વાર્તાનો જાદુ અને રમૂજ જાળવી રાખવામાં આવ્યા છે, પરંતુ એક નવા અનોખા પરિપ્રેક્ષ્ય સાથે.'
ફિલ્મની સ્ક્રિપ્ટ અભિજાત જોશી અને રાજકુમાર હિરાણી દ્વારા સંયુક્ત રીતે લખાઈ રહી છે. આમિરે ફરી એકવાર 'ફુનસુક વાંગડુ'ના પાત્રમાં પરત ફરવા માટે ભારે ઉત્સાહ દર્શાવ્યો છે.
3 Idiots 2 Update: જૂની સ્ટાર કાસ્ટની થશે વાપસી
સિક્વલની સૌથી મોટી વિશેષતા એ છે કે તેમાં મૂળ ફિલ્મના કલાકારો જ જોવા મળશે. આમિર ખાન, આર. માધવન અને શરમન જોશી પોતપોતાના પાત્રોમાં ફરીથી જોવા મળશે. વર્ષ 2009 માં આવેલી '3 ઈડિયટ્સ' માત્ર 55 કરોડના બજેટમાં બની હતી અને તેણે બોક્સ ઓફિસ પર 400 કરોડથી વધુની કમાણી કરીને નવો ઇતિહાસ રચ્યો હતો. કરીના કપૂર, બોમન ઈરાની અને મોના સિંહના પાત્રો પણ એટલા જ લોકપ્રિય થયા હતા, જેઓ આ ભાગમાં પણ જોવા મળે તેવી શક્યતા છે.
3 Idiots 2 News: પુત્રની ફિલ્મના પ્રમોશન દરમિયાન કરી જાહેરાત
આમિર ખાને આ જાહેરાત તેના પુત્ર જુનૈદ ખાનની આગામી ફિલ્મ 'એક દિન'ના પ્રમોશન દરમિયાન કરી હતી, જે 1 મેના રોજ રિલીઝ થવાની છે. આ દરમિયાન તેમણે અન્ય પ્રોજેક્ટ્સ વિશે પણ વાત કરી હતી.
3 Idiots 2 Updates: દાદાસાહેબ ફાળકે બાયોપિક હાલ મોકૂફ
આમિરે વધુમાં જણાવ્યું કે રાજકુમાર હિરાણી ભારતીય સિનેમાના પિતામહ દાદાસાહેબ ફાળકેની બાયોપિક પર પણ કામ કરી રહ્યા હતા. જોકે, ત્રણ ડ્રાફ્ટ તૈયાર કર્યા હોવા છતાં હિરાણી સ્ક્રિપ્ટથી સંતુષ્ટ ન હોવાથી હાલમાં આ પ્રોજેક્ટને પડતો મૂકવામાં આવ્યો છે. હાલમાં તેમનું સંપૂર્ણ ધ્યાન '3 ઈડિયટ્સ 2' ને વધુ બહેતર બનાવવા પર કેન્દ્રિત છે.