મુંબઈ: બોલિવૂડના મહાનાયક અમિતાભ બચ્ચને (Amitabh Bachchan) તેમના તાજેતરના બ્લોગ પોસ્ટ દ્વારા સોશિયલ મીડિયા પર ખળભળાટ મચાવી દીધો છે. બિગ બીએ તેમના બ્લોગમાં હોસ્પિટલમાં વિતાવેલા સમય, સર્જરીનો દુખાવો અને ICU માં રહેવાના અનુભવો વિશે વાત કરી છે, જેના કારણે તેમના લાખો ચાહકો તેમની તબિયતને લઈને અત્યંત ચિંતિત થઈ ગયા છે.
સર્જરી અને હોસ્પિટલના અનુભવોની કરી વાત
21 જૂલાઈ 2026 ના રોજ 'દિવસ 6726' શીર્ષક હેઠળ લખાયેલા આ બ્લોગમાં અમિતાભે જણાવ્યું કે તેઓ છેલ્લા કેટલાક સમયથી હોસ્પિટલમાં ભરતી હતા. તેમણે લખ્યું હતું કે, "હોસ્પિટલમાં સર્જરી અને ICUમાં, કુશળ ડોક્ટરો અને મેડિકલ સ્ટાફની દેખરેખ હેઠળ... હવે ડિસ્ચાર્જ અને ઘર વાપસી." અભિનેતાએ હોસ્પિટલમાંથી રજા મળ્યા પછી ઘરે પરત ફર્યા બાદના સમયને રિકવરીનો સૌથી મુશ્કેલ તબક્કો ગણાવ્યો છે. તેમના મતે, શારીરિક, માનસિક અને વ્યાવહારિક રીતે આ સમય ખૂબ જ પડકારજનક હોય છે.
જીવન અને હાર વિશેની ફિલોસોફી
બિગ બીએ બ્લોગમાં જીવનની ફિલોસોફી વિશે વાત કરતા લખ્યું કે, "તમે એક સન્માનિત ચેમ્પિયન હોવ છો અને એક દિવસ હાર તમારી સામે આવીને ઊભી રહે છે. આ તમારા જીવનનો સૌથી કઠિન સમય હોય છે." તેમણે વધુમાં ઉમેર્યું કે કેટલાક લોકો હિંમતથી આ પરિસ્થિતિનો સામનો કરે છે તો કેટલાક હાર માની લે છે, પરંતુ જે સંઘર્ષ કરે છે અને સાહસ બતાવે છે તે જ સાચો ચેમ્પિયન રહે છે. જેઓ હિંમત હારી જાય છે તેઓ જૂની યાદોના સહારે જીવે છે.
ચાહકોમાં ચિંતા અને ઉત્તેજના
જોકે, અમિતાભ બચ્ચને આ સર્જરી શા માટે કરવામાં આવી અથવા તેમને કઈ બીમારી થઈ હતી તે અંગે કોઈ ચોક્કસ ખુલાસો કર્યો નથી. આ અસ્પષ્ટતાને કારણે ફેન્સ મૂંઝવણમાં છે કે શું આ સર્જરી તેમની પોતાની હતી કે પરિવારના કોઈ અન્ય સભ્યની. સોશિયલ મીડિયા પર ફેન્સ સતત સવાલો કરી રહ્યા છે અને તેમના લાંબા આયુષ્ય માટે પ્રાર્થના કરી રહ્યા છે. એક ચાહકે લખ્યું, "અમિત જી, શું તમે તમારી પોતાની તબિયત વિશે વાત કરી રહ્યા છો? મહેરબાની કરીને તમારું ધ્યાન રાખજો."
વર્કફ્રન્ટ અને આગામી પ્રોજેક્ટ્સ
ઉલ્લેખનીય છે કે, 83 વર્ષના અમિતાભ બચ્ચન છેલ્લે સુપરહિટ ફિલ્મ 'કલ્કી 2898 AD' માં અશ્વત્થામાના રોલમાં જોવા મળ્યા હતા, જેમાં પ્રભાસ અને દીપિકા પાદુકોણ મુખ્ય ભૂમિકામાં હતા. હાલમાં તેઓ તેમના લોકપ્રિય ક્વિઝ શો 'કૌન બનેગા કરોડપતિ' (KBC) ની 18 મી સીઝનની તૈયારીઓમાં વ્યસ્ત છે, જે 10 ઓગસ્ટ થી શરૂ થવા જઈ રહ્યો છે. આ કપરી પરિસ્થિતિમાં પણ બિગ બીનો કામ પ્રત્યેનો ઉત્સાહ જોઈને ચાહકો તેમને સલામ કરી રહ્યા છે.