Farmer's daughter success: મહેનત, અથાણ પરિશ્રમ અને દ્રઢ સંકલ્પના જોરે ગ્રામીણ વિસ્તારની દીકરીઓ હવે વૈશ્વિક મંચ પર પોતાની સફળતાનો ડંકો વગાડી રહી છે. બિહારના બાંકા જિલ્લાના અમરપુર પ્રખંડ હેઠળ આવેલા સલેમપુર ગામની રહેવાસી એક સામાન્ય ખેડૂતની પુત્રી કુમારી જાનૂએ આ વાત સાબિત કરી બતાવી છે. જાનૂની પસંદગી દક્ષિણ કોરિયાની અત્યંત પ્રતિષ્ઠિત 'ગ્લોબલ કોરિયા સ્કોલરશીપ' (GKS 2026) માટે થઈ છે.
સરકાર ઉપાડશે રૂ. 96 લાખનો તમામ ખર્ચ
આ સ્કોલરશીપ અંતર્ગત જાનૂને દક્ષિણ કોરિયાની વિખ્યાત સન મૂન યુનિવર્સિટીમાંથી ઇન્ટરનેશનલ રિલેશન્સ વિષયમાં 2 વર્ષની માસ્ટર્સ ડિગ્રી મેળવવાની સુવર્ણ તક સાંપડી છે. આ અભ્યાસ માટે કોરિયા સરકારનું શિક્ષણ મંત્રાલય (NIIED) જાનૂની ટ્યુશન ફી, રહેવા-જમવાનો ખર્ચ, મેડિકલ ઈન્સ્યોરન્સ અને આવવા-જવાની એર ટિકિટ સહિતનો વાર્ષિક આશરે રૂ. 96 લાખનો તમામ ખર્ચ પોતે વહન કરશે.
દેશભરના 40 તેજસ્વી વિદ્યાર્થીઓમાં સ્થાન મેળવ્યું
આ સ્કોલરશીપ માટે આયોજિત કપરી પરીક્ષામાં સમગ્ર ભારતમાંથી માત્ર 40 તેજસ્વી વિદ્યાર્થીઓની પસંદગી કરવામાં આવી છે, જેમાંથી બિહાર રાજ્યના માત્ર 2 વિદ્યાર્થીઓ જ સ્થાન મેળવી શક્યા છે. આ બે વિદ્યાર્થીઓમાં બાંકાની જાનૂ કુમારી ઉપરાંત બેગુસરાયના એક વિદ્યાર્થીનો સમાવેશ થાય છે. બાંકા જિલ્લાના ઇતિહાસમાં પ્રથમ વખત કોઈ વિદ્યાર્થીનીને આ પ્રકારની વૈશ્વિક તક મળી છે.
3 વર્ષનો રહેશે સંપૂર્ણ અભ્યાસક્રમ
યુનિવર્સિટી દ્વારા જાહેર કરાયેલા પત્ર અનુસાર, જાનૂને આ શિષ્યવૃત્તિનો લાભ 1 સપ્ટેમ્બર 2026થી 31 ઓગસ્ટ 2029 સુધી મળશે. આ સમયગાળા દરમિયાન, પ્રથમ 1 વર્ષ સુધી તેને કોરિયન ભાષાનું ખાસ પ્રશિક્ષણ આપવામાં આવશે, ત્યારબાદ તેનો 2 વર્ષનો મુખ્ય માસ્ટર્સ ડિગ્રી અભ્યાસક્રમ શરૂ થશે.
મર્યાદિત સંસાધનો છતાં પિતાએ સપનાઓને પાંખો આપી
જાનૂના માતા રાની ચૌધરી અને પિતા ચંડિકા ચૌધરી એક અત્યંત સામાન્ય મધ્યમવર્ગીય પરિવારમાંથી આવે છે. પિતા વ્યવસાયે ખેડૂત હોવા છતાં અને ઘરમાં મર્યાદિત સંસાધનો હોવા છતાં, તેમણે ક્યારેય દીકરીના અભ્યાસમાં આર્થિક તંગીને આડે આવવા દીધી નથી. તેના કાકા અંબિકા ચૌધરીના જણાવ્યા મુજબ, જાનૂ નાનપણથી જ અભ્યાસ પ્રત્યે ખૂબ જ ગંભીર અને એકાગ્ર રહી છે.
સરકારી શાળામાંથી શરૂ કરીને આંતરરાષ્ટ્રીય સ્તર સુધીની સફર
કુમારી જાનૂએ પોતાનું પ્રારંભિક શિક્ષણ ગામની જ સલેમપુર હાઈસ્કૂલમાંથી પૂર્ણ કર્યું હતું. ત્યારબાદ તેણે ભાગલપુરની શારદા ઝુનઝુનવાલા મહિલા મહાવિદ્યાલયમાંથી અંગ્રેજી સાહિત્ય વિષય સાથે સ્નાતકની પદવી મેળવી. સ્નાતકના અભ્યાસ દરમિયાન અંગ્રેજીની સાથે પોલિટિકલ સાયન્સ વિષય ભણતી વખતે જ તેની રુચિ આંતરરાષ્ટ્રીય સંબંધોમાં જાગી હતી. આર્થિક મર્યાદાઓને કારણે તે કોઈ સારી સ્કોલરશીપની શોધમાં હતી, તે દરમિયાન જ તેને જીકેએસ પરીક્ષા વિશે માહિતી મળી અને તેણે પોતાના પ્રથમ પ્રયાસમાં જ આ ઐતિહાસિક સફળતા હાંસલ કરી લીધી.
ઉચ્ચ શિક્ષણની સાથે UPSCની તૈયારીનું લક્ષ્ય
જાનૂએ જણાવ્યું કે તે દક્ષિણ કોરિયામાં પોતાના અભ્યાસની સાથે-સાથે સિવિલ સર્વિસીસની તૈયારી પણ ચાલુ રાખશે. તેનું અંતિમ સ્વપ્ન ભારતીય વહીવટી સેવામાં જોડાઈને દેશની સેવા કરવાનું છે. સાધારણ પૃષ્ઠભૂમિમાંથી આવીને વૈશ્વિક સ્તરે મેળવેલી આ ભવ્ય સફળતા બાદ જાનૂ હવે પંથકની અનેક દીકરીઓ માટે પ્રેરણાનો સ્ત્રોત બની ગઈ છે.