Union Budget 2026 Date and Time: દેશના આગામી કેન્દ્રીય બજેટ 2026ને લઈને એક ઐતિહાસિક ફેરફાર જોવા મળશે. લાંબા સમય બાદ સંસદની પરંપરામાં બદલાવ આવશે અને આ વખતે સામાન્ય બજેટ રજાના દિવસે એટલે કે રવિવારે રજૂ કરવામાં આવશે. પ્રાપ્ત અહેવાલો અનુસાર, નાણામંત્રી નિર્મલા સીતારમણ આગામી 1 ફેબ્રુઆરી, 2026ના રોજ દેશનું બજેટ રજૂ કરશે અને તે દિવસે રવિવાર છે. છેલ્લા 26 વર્ષમાં આ પ્રથમ ઘટના હશે જ્યારે કેન્દ્રીય બજેટ રવિવારે રજૂ કરવામાં આવશે.
CCPA ની બેઠકમાં તારીખો પર મંજૂરી
બુધવારે રક્ષા મંત્રી રાજનાથ સિંહની અધ્યક્ષતામાં મળેલી કેબિનેટ કમિટી ઓન પાર્લામેન્ટરી અફેર્સ (CCPA) એ આગામી બજેટ સત્રની તારીખોને લીલી ઝંડી આપી દીધી છે. સૂત્રોના જણાવ્યા અનુસાર, સંસદીય કેલેન્ડર મુજબ નીચે પ્રમાણેનો કાર્યક્રમ હોઈ શકે છે. 28 જાન્યુઆરીના રોજ રાષ્ટ્રપતિના અભિભાષણ સાથે બજેટ સત્રની શરૂઆત થશે. 29 જાન્યુઆરીના રોજ સંસદમાં આર્થિક સર્વેક્ષણ (Economic Survey) રજૂ કરવામાં આવશે. 1 ફેબ્રુઆરી, રવિવારના રોજ નાણામંત્રી દ્વારા કેન્દ્રીય બજેટ 2026-27 રજૂ કરવામાં આવશે.
1999 માં રવિવારે રજૂ થયું હતું બજેટ
આ પહેલાં 28 ફેબ્રુઆરી, 1999 ના રોજ વાજપેયી સરકારના કાર્યકાળમાં તત્કાલીન નાણામંત્રી યશવંત સિંહાએ રવિવારે બજેટ રજૂ કર્યું હતું. તે સમયે પણ એક મોટી પરંપરા તૂટી હતી. સામાન્ય રીતે બજેટ સાંજે 5 વાગ્યે રજૂ થતું હતું, પરંતુ તે વર્ષે યશવંત સિંહાએ સવારે 11 વાગ્યે બજેટ રજૂ કરવાની નવી પ્રથા શરૂ કરી હતી. હવે 26 વર્ષ બાદ ફરી એકવાર રવિવારે બજેટ રજૂ થવાનો યોગ સર્જાયો છે.
શનિવારે બજેટ રજૂ થવાના દાખલા
રજાના દિવસે બજેટ રજૂ કરવું તે નવી વાત નથી, પરંતુ રવિવારે સંસદ મળવી તે દુર્લભ ગણાય છે. અગાઉ નાણામંત્રી અરુણ જેટલીએ વર્ષ 2015 અને 2016 માં શનિવારે બજેટ રજૂ કર્યું હતું. વર્તમાન નાણામંત્રી નિર્મલા સીતારમણે પણ 2025 નું બજેટ શનિવારે રજૂ કર્યું હતું. ઉલ્લેખનીય છે કે, 2017 થી બજેટ રજૂ કરવાની તારીખ 28 ફેબ્રુઆરીથી બદલીને 1 ફેબ્રુઆરી કરવામાં આવી હતી, જેથી નવા નાણાકીય વર્ષ માટે ભંડોળની ફાળવણી સમયસર થઈ શકે.
નાણામંત્રી નિર્મલા સીતારમણ રચશે રેકોર્ડ
નાણામંત્રી નિર્મલા સીતારમણ આ સાથે જ એક નવો કીર્તિમાન સ્થાપિત કરવા જઈ રહ્યા છે. તેઓ સ્વતંત્રતા પછીનું 88મું અને તેમનું સતત 9મું કેન્દ્રીય બજેટ રજૂ કરશે. આ સાથે તેઓ પૂર્વ વડાપ્રધાન મોરારજી દેસાઈના રેકોર્ડની વધુ નજીક પહોંચશે. મોરારજી દેસાઈએ તેમના કાર્યકાળ દરમિયાન કુલ 10 બજેટ રજૂ કર્યા હતા.