Silver New Rule From 2026: આ વર્ષે ચાંદીની કિંમતમાં તાબડતોબ ઉછાળો આવ્યો છે. આ દરમિયાન ચીને ચાંદીને લઈ નવો ખેલ શરૂ કર્યો છે. ચીન સિલ્વરની નિકાસ નિયંત્રણને વધુ કડક કરવા જઈ રહ્યું છે. તેને લગતા નવા નિયમ ગુરુવારે એટલે કે 1લી જાન્યુઆરી 2026 (1st January 2026)થી લાગુ થઈ જશે. આ પગલું એવા સમયમાં ભરવામાં આવી રહ્યું છે કે જ્યારે ચાંદી અમેરિકાના ઉદ્યોગ અને સંરક્ષણ ચેઈન માટે મહત્વના માનવામાં આવે છે.
ચાંદીની સાથે રેર અર્થની નિકાસ અંગે પણ નિર્ણય લેવામાં આવ્યો હતો. અત્રે ઉલ્લેખનીય છે કે ચીનના વાણિજ્ય મંત્રાલયે ઓક્ટોબરમાં આ નિયમોની જાહેરાત કરી હતી. તે સમયે ડોનાલ્ડ ટ્રમ્પ અને ચીનના રાષ્ટ્રપતિ શી જિનપિંગ દક્ષિણ કોરિયામાં મળ્યા હતા.આ બેઠક દરમિયાન ચીન ચોક્કસ રેર અર્થ એક્સપોર્ટ નિકાસ નિયંત્રણો પર એક વર્ષના પ્રતિબંધ માટે સંમત થયું હતું અને અમેરિકાએ કેટલાક ટેરિફ પાછા ખેંચી લીધા હતા.
44 કંપનીઓને ચાંદીની નિકાસ માટે મંજૂરી આપવામાં આવી છે
આ મહિને, ચીને 44 કંપનીઓની યાદી બહાર પાડી હતી જેમને વર્ષ 2026 અને વર્ષ 2027માં ચાંદીની નિકાસ માટે મંજૂરી આપવામાં આવશે. વર્ષ 2026ના નિયમો ટંગસ્ટન અને એન્ટિમોનીની નિકાસ પર પણ પ્રતિબંધો લાદે છે. સિક્યોરિટીઝ ટાઇમ્સના અહેવાલ મુજબ નવા નિયમોએ ચાંદીને વ્યૂહાત્મક સામગ્રીનો દરજ્જો આપ્યો છે અને તેની નિકાસ હવે રેર અર્થ જેવા નિયંત્રણ નિયમોને આધીન રહેશે.
ચાંદીનો સમાવેશ મહત્વપૂર્ણ ખનિજોની યાદીમાં થાય છે
યુનાઇટેડ સ્ટેટ્સે ચાંદીને મહત્વપૂર્ણ ખનિજોની યાદીમાં સામેલ કરી છે કારણ કે તેનો ઉપયોગ ઇલેક્ટ્રિકલ સર્કિટ, બેટરી, સૌર કોષો અને તબીબી સાધનોના ઉત્પાદનમાં થાય છે. આંકડા અનુસાર, 2024 માં ચીન વિશ્વના સૌથી મોટા ચાંદી ઉત્પાદકોમાંનો એક હતો. વર્ષના પ્રથમ 11 મહિનામાં ચીને 4,600 ટનથી વધુ ચાંદીની નિકાસ કરી હતી, જ્યારે આશરે 220 ટન આયાત કરી હતી.
ચાંદીના ભાવની વિગતો
વધતી માંગ વચ્ચે ચાંદીના ભાવમાં તીવ્ર વધારો જોવા મળ્યો છે. કેટલીક ચીની કંપનીઓએ કેનેડાની કુયા સિલ્વર પાસેથી બજાર ભાવ કરતાં 8 ડોલર ઉપર ખરીદવાની ઓફર કરી હતી. એક ભારતીય ખરીદદારે પણ બજાર ભાવ કરતાં 10 ડોલર ઉપર ઓફર કરી હતી.
ચાંદીના ભાવ થોડા સમય માટે 80 ડોલર પ્રતિ ઔંસથી ઉપર પહોંચી ગયા હતા અને પછીથી 73 ડોલરની આસપાસ ટ્રેડ થયા હતા.વર્ષ 2025માં ડોલર ઇન્ડેક્સ 9.5 ટકા ઘટ્યો છે, જ્યારે ચાંદીના ભાવ બમણાથી વધુ વધ્યા છે. સોનામાં પણ મજબૂત વધારો જોવા મળ્યો છે. દરમિયાન બિટકોઇન લગભગ 88,000 ડોલર પર ટ્રેડ થઈ રહ્યો છે અને વર્ષમાં લગભગ 5 ટકા નીચે છે.