Jio Platforms IPO: ભારતીય શેરબજારના ઈતિહાસમાં એક નવો અધ્યાય લખાવવા જઈ રહ્યો છે. દેશની અગ્રણી ટેલિકોમ અને ડિજિટલ સેવાઓ આપતી કંપની જિયો પ્લેટફોર્મ્સ (Jio Platforms) પોતાનો મેગા પબ્લિક ઈશ્યૂ (IPO) લાવવા માટે સંપૂર્ણ રીતે તૈયાર છે. આ IPO 21 ઓક્ટોબરથી 23 ઓક્ટોબર સુધી સામાન્ય રોકાણકારો માટે ખુલ્લો રહેશે.
કંપની દ્વારા સ્ટોક એક્સચેન્જ ફાઈલિંગમાં આપવામાં આવેલી માહિતી મુજબ, આ પ્રાથમિક શેર વેચાણ દ્વારા બજારમાંથી આશરે ₹30,213 કરોડ ભંડોળ એકત્ર કરવાનું લક્ષ્ય રાખવામાં આવ્યું છે.
IPO સંબંધિત મુખ્ય વિગતો એક નજરે
ઈશ્યૂ ખુલવાની તારીખ: 21 ઓક્ટોબર
ઈશ્યૂ બંધ થવાની તારીખ: 23 ઓક્ટોબર
એન્કર ઈન્વેસ્ટર્સ માટે તારીખ: 19 ઓક્ટોબર
પ્રાઈસ બેન્ડ: ₹1,065 થી ₹1,119 પ્રતિ શેર
નવા શેરની સંખ્યા: 27 કરોડ ફ્રેશ શેર (ફેસ વેલ્યુ ₹10)
ઓછામાં ઓછો લોટ સાઈઝ: 12 શેર (સામાન્ય રોકાણકારો માટે)
કર્મચારીઓ અને RIL શેરધારકો માટે ₹3,000 કરોડનો ખાસ ક્વોટા
રિલાયન્સ ઈન્ડસ્ટ્રીઝે તેના હાલના રોકાણકારો અને કર્મચારીઓને આ IPOમાં વિશેષ લાભ આપ્યો છે.
કર્મચારીઓ માટે: ₹500 કરોડ સુધીના શેર અનામત રાખવામાં આવ્યા છે. અરજી કરનાર કર્મચારીઓને પ્રતિ શેર ₹54નું ડિસ્કાઉન્ટ મળશે.
RIL શેરધારકો માટે ક્વોટા: જે રોકાણકારો પાસે 14 ઓક્ટોબર (RHP ફાઈલિંગની તારીખ) સુધી રિલાયન્સ ઈન્ડસ્ટ્રીઝના શેર હતા, તેમના માટે ₹2,500 કરોડનો ક્વોટા અનામત રખાયો છે.
હ્યુન્ડાઈનો રેકોર્ડ તોડી દેશનો સૌથી મોટો IPO બનશે
અત્યાર સુધી ભારતનો સૌથી મોટો IPO વર્ષ 2024માં આવેલો હ્યુન્ડાઈ મોટર ઈન્ડિયાનો (₹27,858 કરોડ) હતો. પરંતુ જિયો પ્લેટફોર્મ્સ ₹30,213 કરોડનું ફંડ એકત્ર કરીને દેશનો અત્યાર સુધીનો સૌથી મોટો પબ્લિક ઈશ્યૂ બની જશે.
કંપનીએ પોતાના RHP (Red Herring Prospectus) દસ્તાવેજો અમદાવાદ સ્થિત 'રજિસ્ટ્રાર ઓફ કંપનીઝ' (RoC) પાસે ફાઈલ કરી દીધા છે. માર્કેટ રેગ્યુલેટર SEBI તરફથી ઓગસ્ટ મહિનામાં જ આ માટે જરૂરી મંજૂરી મળી ગઈ હતી.
52 કરોડથી વધુ સબસ્ક્રાઈબર્સ સાથે દેશની લીડર કંપની
નાણાકીય વર્ષ 2026ના અંત સુધીમાં જિયોનો ગ્રાહક આધાર વધારા સાથે 52.44 કરોડ પહોંચી ગયો છે. મુંબઈ સ્થિત આ કંપની માત્ર ભારતનું સૌથી મોટું 5G નેટવર્ક નથી ચલાવતી, પરંતુ વૈશ્વિક સ્તરે ક્લાઉડ અને AI આધારિત આધુનિક 5G સોફ્ટવેર ટેક્નોલોજી પણ પૂરી પાડે છે. રિલાયન્સ ગ્રુપની આ વેલ્યુ અનલોકિંગ સ્ટ્રેટેજીથી બજારના નિષ્ણાતો અને છૂટક રોકાણકારોમાં ભારે ઉત્સાહ જોવા મળી રહ્યો છે.