સુકન્યા સમૃદ્ધિ યોજનામાં વાર્ષિક ₹1.5 લાખના રોકાણ પર મેચ્યોરિટીમાં કેટલું ફંડ મળશે, જાણો નિયમો અને ગણતરી

સુકન્યા સમૃદ્ધિ યોજનામાં 8.2% વ્યાજ દરે વાર્ષિક ₹1.5 લાખ જમા કરાવતા 21 વર્ષ બાદ કેટલી રકમ મળશે? જાણો પાત્રતા, નિયમો અને રોકાણની સંપૂર્ણ ગણતરી.

By: Jignesh TrivediEdited By:Jignesh TrivediPublish Date: Sun, 22 Nov 2026 06:01 PM (IST)Updated: Sun, 22 Nov 2026 06:01 PM (IST)
sukanya-samriddhi-yojana-rupees-15-lakh-investment-maturity-and-rules

Sukanya Samriddhi Yojana Calculator: દીકરીના ઉચ્ચ અભ્યાસ અને લગ્ન જેવા મહત્ત્વના ખર્ચ માટે નાનપણથી જ સુરક્ષિત અને સારું વળતર આપતું આયોજન કરવું દરેક માતા-પિતાની પ્રાથમિકતા હોય છે. કેન્દ્ર સરકારની સુકન્યા સમૃદ્ધિ યોજના (SSY) આ દિશામાં એક મજબૂત નાની બચત યોજના તરીકે ઓળખાય છે, જેમાં 8.2 ટકા વાર્ષિક વ્યાજ દર અને લાંબા ગાળાના ચક્રવૃદ્ધિ લાભ સાથે મોટું ભંડોળ ઊભું કરી શકાય છે.

દીકરી કે દીકરો: કોના નામે ખાતું ખોલાવી શકાય?

માત્ર દીકરીના નામે જ ખાતું: આ યોજના ખાસ દીકરીઓની આર્થિક સુરક્ષા માટે શરૂ કરવામાં આવી છે, તેથી તેમાં માત્ર કન્યાના નામે જ ખાતું ખોલાવી શકાય છે. દીકરાના નામે સુકન્યા સમૃદ્ધિ યોજનાનું ખાતું ખોલવાની કોઈ જોગવાઈ નથી.

ઉંમર અને પરિવારના નિયમો: પરિવારમાં દીકરો અને દીકરી બંને હોય તો દીકરીના નામે રોકાણ કરી શકાય છે, બસ શરત એટલી કે ખાતું ખોલાવતી વખતે દીકરીની ઉંમર 10 વર્ષથી ઓછી હોવી જોઈએ. માતા-પિતા અથવા કાયદેસરના વાલી દીકરી વતી ખાતું ખોલાવી શકે છે.

ખાતાની સંખ્યા: સામાન્ય રીતે એક પરિવારમાં મહત્તમ બે દીકરીઓના નામે ખાતા ખોલાવી શકાય છે. જોકે, જોડિયા કે ત્રણ દીકરીઓનો જન્મ થાય તેવી વિશેષ સ્થિતિમાં નિયમો મુજબ બેથી વધુ ખાતા ખોલવાની છૂટ મળે છે.

દર વર્ષે ₹1.5 લાખ જમા કરાવવાથી કેટલું ફંડ બને?

એક નાણાકીય વર્ષમાં મહત્તમ ₹1.5 લાખ જમા કરાવી શકાય છે. જો દીકરીના જન્મ પછી તરત જ ખાતું ખોલાવીને સતત 15 વર્ષ સુધી દર વર્ષે ₹1.5 લાખ ભરવામાં આવે, તો કુલ મૂળ રોકાણ ₹22.5 લાખ થાય છે.

ઉદાહરણ તરીકે, જો 8.2 ટકા વાર્ષિક વ્યાજ દર સમગ્ર સમયગાળા દરમિયાન યથાવત રહે અને દરેક વર્ષની શરૂઆતમાં રકમ જમા કરવામાં આવે, તો 21 વર્ષ પૂરા થતા મેચ્યોરિટી પર અંદાજે ₹71.8 લાખ જેટલું ભંડોળ તૈયાર થઈ શકે છે.

કુલ રોકાણ: આશરે ₹22.5 લાખ

અંદાજિત વ્યાજની રકમ: આશરે ₹49.3 લાખ

કુલ અંદાજિત મેચ્યોરિટી: આશરે ₹71.8 લાખ

અહીં એ બાબત ધ્યાનમાં રાખવી જરૂરી છે કે આ ગણતરી એક અંદાજ આધારિત છે. વાસ્તવિક વળતર ભવિષ્યમાં સરકાર દ્વારા સમયાંતરે નક્કી થતા વ્યાજ દરો અને રકમ જમા કરાવવાની તારીખો પર આધાર રાખે છે.