SBI Bank Strike Advisory: દેશની સૌથી મોટી સરકારી બેંક, સ્ટેટ બેંક ઓફ ઈન્ડિયા (SBI) એ પોતાના કરોડો ગ્રાહકો માટે એક મહત્વપૂર્ણ એડવાઈઝરી જાહેર કરી છે. આગામી 28 થી 30 સપ્ટેમ્બર દરમિયાન યુનાઈટેડ ફોરમ ઓફ બેંક યુનિયન્સ (UFBU) દ્વારા યોજાનારી ત્રણ દિવસીય દેશવ્યાપી હડતાળને પગલે શાખા સ્તરની બેંકિંગ કામગીરી પ્રભાવિત થવાની શક્યતા છે. આ સ્થિતિને ધ્યાનમાં રાખીને SBI એ ગ્રાહકોને અપીલ કરી છે કે તેઓ બેંક શાખા પર નિર્ભર હોય તેવા તમામ જરૂરી કામકાજ હડતાળ પહેલાં જ પૂરા કરી લે.
સતત 5 દિવસ બેંકિંગ સેવાઓ ખોરવાશે: ચિંતાનું મુખ્ય કારણ
UFBU દ્વારા આયોજિત આ હડતાળ ગ્રાહકો માટે મોટી મુશ્કેલી ઊભી કરી શકે છે. 26 સપ્ટેમ્બર (ચોથો શનિવાર) અને 27 સપ્ટેમ્બરે (રવિવાર) સપ્તાહાંતની નિયમિત રજાઓ છે. ત્યારપછી તરત જ 28, 29 અને 30 સપ્ટેમ્બરના રોજ ત્રણ દિવસની દેશવ્યાપી હડતાળ હોવાથી સતત પાંચ દિવસ સુધી સામાન્ય બેંકિંગ સેવાઓ અને શાખાઓનું કામકાજ સંપૂર્ણપણે ખોરવાઈ શકે છે.
સતત પાંચ દિવસની આ રજાઓ અને હડતાળના કારણે ખાસ કરીને રોકડ ઉપાડ, ચેક ક્લિયરન્સ, નવું કનેક્શન કે લોન દસ્તાવેજો જમા કરાવવા અને બેંક શાખા પર નિર્ભર અન્ય વહીવટી કાર્યોમાં ગંભીર વિલંબ થશે.
SBI એ કરી ડિજિટલ પ્લેટફોર્મ અને ATM નો ઉપયોગ કરવા વિનંતી
SBI એ પોતાના અધિકૃત સોશિયલ મીડિયા હેન્ડલ્સ દ્વારા ગ્રાહકોને કોઈપણ અસુવિધાથી બચવા માટે વૈકલ્પિક ડિજિટલ માધ્યમો અપનાવવાની વિનંતી કરી છે:
- રોકડ વ્યવહારો માટે: ગ્રાહકો પોતાની રોકડની જરૂરિયાત પૂરી કરવા માટે નજીકના ATM, ADWM (ઓટોમેટેડ ડિપોઝિટ અને વિડ્રોઅલ મશીન) તથા કસ્ટમર સર્વિસ પોઈન્ટ્સ (CSP) નો ઉપયોગ કરી શકે છે.
- ઓનલાઈન ટ્રાન્સફર અને બિલ પેમેન્ટ: નિયમિત વ્યવહારો, ફંડ ટ્રાન્સફર અને બિલ ચુકવણી માટે SBI YONO એપ, ઇન્ટરનેટ બેંકિંગ, મોબાઇલ બેંકિંગ અને UPI જેવા ડિજિટલ માધ્યમો ચાલુ રહેશે.
અનિશ્ચિત મુદતની હડતાળની પણ ચીમકી
ઉલ્લેખનીય છે કે, 11 સપ્ટેમ્બરના રોજ યોજાયેલી એક દિવસીય દેશવ્યાપી હડતાળ બાદ બેંક યુનિયનોએ પોતાના વિવિધ પડતર પ્રશ્નો અને માંગણીઓને લઈને 28 થી 30 સપ્ટેમ્બર સુધી ત્રણ દિવસની હડતાળનું એલાન કર્યું છે. જો આ સમય દરમિયાન પણ સરકાર કે મેનેજમેન્ટ સાથે ઉકેલ નહીં આવે, તો યુનિયનોએ ૨૬ ઓક્ટોબરથી અનિશ્ચિત મુદતની હડતાળ શરૂ કરવાનો પ્રસ્તાવ પણ મૂક્યો છે. SBI એ ગ્રાહકોને થનારી અસુવિધા બદલ ખેદ વ્યક્ત કરીને આ મુશ્કેલ સમયમાં સહકાર આપવા અપીલ કરી છે.