SIP Mutual Fund Investment: આજના સમયમાં મ્યુચ્યુઅલ ફંડમાં રોકાણ કરવા માટે સિસ્ટમેટિક ઇન્વેસ્ટમેન્ટ પ્લાન (SIP) ને સૌથી લોકપ્રિય અને ઉત્તમ રસ્તો માનવામાં આવે છે. પરંતુ શું દરેક રોકાણકાર માટે એક જ પ્રકારની SIP વ્યૂહરચના (Strategy) યોગ્ય હોઈ શકે? નાણાકીય નિષ્ણાતોના મતે, દરેક વ્યક્તિના નાણાકીય લક્ષ્યો અને જોખમ લેવાની ક્ષમતા અલગ-અલગ હોય છે. તેથી, SIP શરૂ કરતાં પહેલાં રોકાણકારે પોતાના ફાઇનાન્શિયલ ગોલ, ટાઇમ હોરાઇઝન અને બજારના ઉતાર-ચઢાવ સહન કરવાની ક્ષમતાને ધ્યાનમાં રાખીને પોર્ટફોલિયો બનાવવો જોઈએ.
15 વર્ષથી વધુ લાંબા ગાળાના લક્ષ્ય માટે: ઇક્વિટી ફંડ્સ શ્રેષ્ઠ
જો તમારો લક્ષ્ય રિટાયરમેન્ટ અથવા બાળકોના ઉચ્ચ શિક્ષણ જેવા લાંબા ગાળાના પ્રોજેક્ટ્સ માટેનો હોય અને તમારી પાસે રોકાણ માટે 15 વર્ષ કે તેથી વધુ સમય હોય, તો SIP નો મોટો હિસ્સો ઇક્વિટી મ્યુચ્યુઅલ ફંડ્સમાં ફાળવવો જોઈએ. લાંબા ગાળાના રોકાણકારો બજારની ક્ષણિક વોલેટિલિટી સહન કરી શકે છે. નિષ્ણાતોના મતે, આવા પોર્ટફોલિયોમાં ઇક્વિટીની સાથે કમોડિટીઝ અને ડેટ ફંડ્સમાં નાનો હિસ્સો રાખીને સંતુલન બનાવી શકાય છે.
5 વર્ષ જેવા ટૂંકા ગાળાના લક્ષ્ય માટે: લાર્જ કેપ અને હાઇબ્રિડ ફંડ્સ
જો તમારો ટાર્ગેટ માત્ર 5 વર્ષ દૂર હોય, તો ઇક્વિટી-હેવી સ્ટ્રેટેજી જોખમી સાબિત થઈ શકે છે. આવા કિસ્સામાં રોકાણકારોએ હાઇબ્રિડ ફંડ્સ તરફ વળવું જોઈએ. જો ઇક્વિટીમાં જ રોકાણ જાળવી રાખવું હોય, તો વધુ જોખમ ધરાવતા મિડ કેપ અને સ્મોલ કેપના બદલે લાર્જ કેપ ફંડ્સને પ્રાથમિકતા આપવી જોઈએ, જેથી પોર્ટફોલિયોમાં ડાઉનસાઇડ રિસ્ક ઓછું કરી શકાય.
માત્ર ઇક્વિટી જ નહીં, ડેટ અને ગોલ્ડમાં પણ કરો SIP
મોટાભાગના લોકો SIP ને માત્ર શેરબજાર અને ઇક્વિટી મ્યુચ્યુઅલ ફંડ્સ સાથે જ સાંકળે છે, પરંતુ આ એક ખોટી ધારણા છે. SIP નો ઉપયોગ વિવિધ એસેટ ક્લાસમાં કરી શકાય છે. રોકાણકારો ડેટ ફંડ્સ, લિક્વિડ ફંડ્સ અને ગોલ્ડ-લિંક્ડ પ્રોડક્ટ્સમાં પણ માસિક એસઆઇપી કરી શકે છે. આનાથી પોર્ટફોલિયોમાં પ્રોપર ડાઇવર્સિફિકેશન મળે છે અને રૂપી કોસ્ટ એવરેજિંગનો પૂરો લાભ મળે છે.
રિસ્ક ટોલરન્સ અને બજારની સુસ્તી સામે તૈયારી
ઘણા રોકાણકારો તેજીના માહોલમાં મોટું રિટર્ન જોઈને વધુ રિસ્ક લેવાની ભૂલ કરે છે. પરંતુ સાચી પરીક્ષા ત્યારે થાય છે જ્યારે બજારમાં મોટો કડાકો આવે અથવા લાંબા સમય સુધી સુસ્તી છવાયેલી રહે. છેલ્લા 23 મહિનાની રેન્જ-બાઉન્ડ મુવમેન્ટ અને કરેક્શન્સ આનું ઉત્તમ ઉદાહરણ છે. તેથી, SIP શરૂ કરતા પહેલાં પોતાની વાસ્તવિક રિસ્ક ક્ષમતા ચકાસવી અત્યંત જરૂરી છે.