EPFO Withdrawal Rules 2026: નોકરીયાત વર્ગ માટે પ્રોવિડન્ટ ફંડ (PF) એ માત્ર નિવૃત્તિ માટેની બચત જ નથી, પરંતુ જરૂરિયાતના સમયે આર્થિક સહાય પૂરી પાડતો એક મહત્વપૂર્ણ સ્ત્રોત પણ છે. અણધાર્યા તબીબી ખર્ચ હોય, બાળકોનું શિક્ષણ હોય કે પરિવારમાં લગ્ન પ્રસંગ હોય, PF ખાતામાં જમા થયેલી રકમ હંમેશા ઉપયોગી સાબિત થાય છે. આ જ બાબતને ધ્યાનમાં રાખીને એમ્પ્લોયીઝ પ્રોવિડંત ફંડ ઓર્ગેનાઈઝેશન (EPFO) એ EPF યોજના હેઠળ ઉપાડના નિયમોને અત્યંત સરળ બનાવી દીધા છે. હવે પાત્ર કર્મચારીઓ માત્ર 12 મહિનાની સભ્યતા પૂર્ણ કર્યા બાદ વિવિધ જરૂરિયાતો માટે પોતાના PF ખાતામાંથી રકમ ઉપાડી શકે છે.
₹2 લાખના PF બેલેન્સ પર ગણતરી કેવી રીતે થશે?
નવા સુધારા મુજબ, જો કર્મચારી પાત્રતાના માપદંડો અને ચોક્કસ શરતો પૂરી કરતો હોય, તો તે પોતાના PF ખાતામાં જમા કુલ રકમના 75% સુધીનો ઉપાડ કરી શકે છે.
- PF ખાતામાં કુલ જમા રકમ: ₹2,00,000
- 75% ઉપાડની મળવાપાત્ર રકમ: ₹1,50,000
- ખાતામાં બાકી રહેતી લઘુત્તમ રકમ: ₹50,000
આ નવા નિયમનો મુખ્ય ઉદ્દેશ્ય એ છે કે આંશિક ઉપાડ પછી પણ કર્મચારીના PF ખાતામાં ઓછામાં ઓછી 25% રકમ જળવાઈ રહે, જેથી ઇમરજન્સીની સ્થિતિમાં નાણાં મળી રહેવાની સાથે કર્મચારીની ભવિષ્યની નિવૃત્તિ બચત પણ સુરક્ષિત રહે.
કયા હેતુ માટે કેટલી વખત રકમ ઉપાડી શકાશે?
EPF સ્કીમ 2026 હેઠળ લવચીકતા લાવવા માટે આંશિક ઉપાડની મર્યાદાઓ અને સેવાના સમયગાળાની શરતો હળવી કરાઈ છે. હવે 12 મહિનાની સભ્યતા પૂર્ણ કરનાર કર્મચારીઓ નીચે મુજબના હેતુઓ માટે રકમ ઉપાડી શકશે:
- 1) શિક્ષણ માટે (વધુમાં વધુ 10 વખત): કર્મચારીઓ પોતાના અથવા પરિવારના પાત્ર સભ્યોના ઉચ્ચ શિક્ષણના ખર્ચ માટે સભ્યપદના સમગ્ર સમયગાળા દરમિયાન વધુમાં વધુ 10 વખત એડવાન્સ ઉપાડ કરી શકે છે.
- 2) લગ્ન પ્રસંગ માટે (વધુમાં વધુ 5 વખત): પોતાના અથવા પરિવારના સભ્યોના લગ્ન સંબંધિત ખર્ચ પૂરા કરવા માટે સેવા દરમિયાન કુલ 5 વખત રકમ ઉપાડવાની મંજૂરી આપવામાં આવી છે.
- 3) તબીબી સારવાર અને મકાન ખરીદી (વધુમાં વધુ 5 વખત): પરિવારની તબીબી સારવાર, નવું ઘર કે પ્લોટ ખરીદવા, ઘરનું બાંધકામ, હોમ લોનની ચુકવણી અથવા ઘરના સમારકામ માટે પણ નિયમો હેઠળ મહત્તમ 5 વખત સુધી રકમ ઉપાડી શકાય છે.
નોકરી ગુમાવવાના કિસ્સામાં સંપૂર્ણ ઉપાડ ક્યારે થાય?
બેરોજગારીની સ્થિતિમાં કર્મચારી પોતાના PF બેલેન્સમાંથી તાત્કાલિક 75% સુધીની રકમ ઉપાડીને નાણાકીય રાહત મેળવી શકે છે. જોકે, PF ખાતામાંથી 100% સંપૂર્ણ રકમ ઉપાડવા માટે સતત 12 મહિના સુધી બેરોજગાર રહેવું આવશ્યક છે. આ સિવાય નિવૃત્તિની નિર્ધારિત વય પ્રાપ્ત કરવા પર અથવા કાયમી અપંગતા જેવા વિશેષ કિસ્સાઓમાં સંપૂર્ણ રકમ ઉપાડવાના અલગ નિયમો લાગુ પડે છે.