DA Hike Update: કેન્દ્ર સરકારના લાખો કર્મચારીઓ અને પેન્શનરો માટે મોંઘવારી ભથ્થાં (DA) અને મોંઘવારી રાહત (DR) માં ટૂંક સમયમાં મોટો વધારો થવા જઈ રહ્યો છે. જુલાઈ 2026 થી અમલી બનનારા આ દર સુધારામાં 3 ટકાનો વધારો થવાની આશા સેવાઈ રહી છે, જેનાથી વર્તમાન મોંઘવારી ભથ્થાનો દર મૂળ પગારના 60 ટકાથી વધીને 63 ટકા સુધી પહોંચી જશે. આ નવો સુધારો 1 જુલાઈ 2026 ની તારીખથી જ અસરકારક માનવામાં આવશે. જોકે, કેન્દ્ર સરકાર દ્વારા તેની સત્તાવાર જાહેરાત અને કેબિનેટની આખરી મંજૂરી મળવાની હજુ બાકી છે. આજે મંગળવારે 6 ઓક્ટોબરના રોજ કેન્દ્રીય કેબિનેટની મહત્વપૂર્ણ બેઠક યોજાવા જઈ રહી છે, જોકે આ બેઠકમાં મોંઘવારી ભથ્થા વધારાનો પ્રસ્તાવ સામેલ થશે કે નહીં તે અંગે સત્તાવાર પુષ્ટિ થવાની બાકી છે.
કેવી રીતે થાય છે 3% DA Hike ની ગણતરી?
સાતમા પગાર પંચના માળખા હેઠળ કેન્દ્રીય કર્મચારીઓ માટે મોંઘવારી ભથ્થાની ગણતરી ઔદ્યોગિક કામદારો માટેના ઓલ ઈન્ડિયા કન્ઝ્યુમર પ્રાઈસ ઈન્ડેક્સના આધારે કરવામાં આવે છે. જાન્યુઆરી થી જૂન 2026 સુધીના આંકડાઓ અનુસાર જુલાઈ 2026 થી મોંઘવારી ભથ્થાનો દર લગભગ 63 ટકા જેટલો બને છે. જૂન 2026 માં ગ્રાહક ભાવાંક 151.9 નોંધાયો હતો, જેણે જરૂરી 12 મહિનાનું ચક્ર પૂર્ણ કર્યું હતું. ગણતરી મુજબ મોંઘવારી ભથ્થું 63.75 ટકા જેટલું થાય છે, પરંતુ નિયમ મુજબ તેને રાઉન્ડ-ઓફ કરીને 63 ટકા રાખવામાં આવે તેવી પૂરેપૂરી સંભાવના છે. હાલમાં કર્મચારીઓને જાન્યુઆરી 2026 ના સુધારા બાદ 60 ટકાના દરે ભથ્થું મળી રહ્યું હોવાથી આ 3 ટકાનો વધારો લગભગ નિશ્ચિત માનવામાં આવે છે.
તમારા માસિક પગાર પર કેટલો પડશે પ્રભાવ?
કર્મચારીઓ માટે એ સમજવું ખૂબ જ જરૂરી છે કે મોંઘવારી ભથ્થાની ગણતરી માત્ર મૂળ બેઝિક પે પર જ થાય છે, કુલ ટેક-હોમ સેલરી પર નહીં. ઉદાહરણ તરીકે, જે કેન્દ્રીય કર્મચારીનો મૂળ પગાર 50,000 રૂપિયા છે, તેમના માસિક પગારના મોંઘવારી ભથ્થાના ઘટકમાં દર મહિને 1,500 રૂપિયાનો સીધો વધારો થશે. એવી જ રીતે 18,000 રૂપિયા બેઝિક પે ધરાવતા કર્મચારીને મહિને 540 રૂપિયા અને 1,00,000 રૂપિયા બેઝિક પે ધરાવતા અધિકારીઓને માસિક 3,000 રૂપિયાનો ફાયદો થશે. જોકે, હાથમાં આવતા વાસ્તવિક પગારમાં આ વધારો પ્રોવિડન્ટ ફંડ અને ટેક્સ જેવી વિવિધ કપાતોના કારણે થોડો અલગ હોઈ શકે છે.
ત્રણ મહિનાનું મળશે એરિયર્સ અને જાન્યુઆરી 2027 નો આગામી સુધારો
સરકાર ગમે ત્યારે આ વધારાની જાહેરાત કરે, પરંતુ તે 1 જુલાઈ 2026 થી જ લાગુ થશે. જો મંજૂરીમાં થોડો વિલંબ થાય અને ઓક્ટોબર કે નવેમ્બરના પગારમાં ચૂકવણી કરાય, તો કર્મચારીઓને જુલાઈ, ઓગસ્ટ અને સપ્ટેમ્બર એમ ત્રણ મહિનાનું બાકી નીકળતું એરિયર્સ એકમસ્તે આપવામાં આવશે. શ્રમ બ્યુરોના તાજેતરના આંકડા મુજબ જુલાઈમાં ગ્રાહક ભાવાંક 153.2 અને ઓગસ્ટમાં 154.4 પર પહોંચ્યો છે, જે જાન્યુઆરી 2027 ના આગામી સુધારાનો આધાર બનશે. હાલમાં તમામ કર્મચારીઓ અને પેન્શનરોની નજર નાણા મંત્રાલય અને કેબિનેટના સત્તાવાર નોટિફિકેશન પર ટકેલી છે.