Central Govt Bonus Announcement: રેલવે કર્મચારીઓ માટે 78 દિવસના બોનસની ઘોષણા કર્યા બાદ કેન્દ્ર સરકારે હવે ટપાલ વિભાગ (Department of Posts) ના કર્મચારીઓ માટે પણ દિવાળી પહેલા મોટી ભેટ આપી છે. સંચાર મંત્રાલય હેઠળના ટપાલ વિભાગે નાણાકીય વર્ષ 2025-26 માટે તેના કર્મચારીઓ માટે 'પ્રોડક્ટિવિટી-લિંક્ડ બોનસ' (PLB) એટલે કે વાર્ષિક બોનસની જાહેરાત કરી છે. આ બોનસ 60 દિવસના પગારની સમકક્ષ રહેશે, જેની મહત્તમ ગણતરી ₹7,000 ની 'બોનસ વેતન મર્યાદા' ના આધારે કરવામાં આવશે.
કયા કર્મચારીઓને મળશે આ બોનસનો લાભ?
16 ઓક્ટોબર, 2026 ના રોજ જારી કરાયેલા સત્તાવાર આદેશ મુજબ, ટપાલ વિભાગના વિવિધ વર્ગના પાત્ર કર્મચારીઓને આ લાભ આપવામાં આવશે:
- મલ્ટી-ટાસ્કિંગ સ્ટાફ (MTS)
- ગ્રુપ 'C' શ્રેણીના કર્મચારીઓ
- નોન-ગેઝેટેડ ગ્રુપ 'B' શ્રેણીના સ્ટાફ
- ગ્રામીણ ડાક સેવકો (GDS)
મહત્તમ બોનસની ગણતરી કરવા માટે વિભાગ દ્વારા એક ચોક્કસ ફોર્મ્યુલા નક્કી કરવામાં આવી છે:
PLB = સરેરાશ પગાર × બોનસના દિવસોની સંખ્યા (60) / 30.4 (જ્યાં 30.4 એ મહિનાના સરેરાશ દિવસો દર્શાવે છે).
કેટલી મળશે બોનસની રકમ?
નિયમિત વિભાગીય કર્મચારીઓ માટે ગણતરીમાં મૂળભૂત પગાર (Basic Pay), મોંઘવારી ભથ્થું (DA), સબ-ઓફિસ/સેવિંગ્સ બેંક ભથ્થું, ડ્યુટી ભથ્થું અને તાલીમ ભથ્થાનો સમાવેશ થાય છે.
- વેતન કેપિંગ: જો નાણાકીય વર્ષ દરમિયાન કર્મચારીનો માસિક પગાર ₹7,000 થી વધુ હોય, તો પણ બોનસ ગણતરી માટે મહત્તમ રકમ ₹7,000 જ ગણવામાં આવશે.
- મહત્તમ બોનસ: આ ગણતરી મુજબ, નિયમિત ટપાલ કર્મચારીઓને મળવાપાત્ર અંદાજિત મહત્તમ બોનસ રકમ ₹13,816 (₹7,000 × 60 / 30.4) થશે.
ગ્રામીણ ડાક સેવકો (GDS) અને નિવૃત્ત કર્મચારીઓ માટે જોગવાઈ
ગ્રામીણ ડાક સેવકો (GDS):
વર્ષ 2025-26 દરમિયાન પૂરતી સેવા આપનાર GDS માટે સરેરાશ માસિક 'ટાઈમ-રિલેટેડ કન્ટિન્યુઈટી એલાઉન્સ' (TRCA) અને DA ના સરવાળાને 12 વડે ભાગીને ગણતરી કરાશે. ₹7,000 ની સીમા મર્યાદા સાથે GDS ને પણ આશરે ₹13,816 સુધીનું મહત્તમ બોનસ પ્રાપ્ત થશે.
નિવૃત્ત કે રાજીનામું આપનાર સ્ટાફ:
1 એપ્રિલ, 2025 થી 31 માર્ચ, 2026 ના સમયગાળા દરમિયાન નિવૃત્ત થયેલા, રાજીનામું આપનારા અથવા ડેપ્યુટેશન પર ગયેલા કર્મચારીઓ પણ તેમની સેવાના સમયગાળા મુજબ બોનસ મેળવવા માટે પાત્ર ગણાશે.