EPS Pension Hike:જો તમે EPFOના સભ્ય છો અને ભવિષ્યમાં મળનાર પેન્શનને લઈ ચિંતિત હોય તો આ માહિતી તમારા માટે મહત્વની છે. એમ્પ્લોઈઝ પ્રોવિડેન્ટ ફંડ ઓર્ગેનાઈઝેશન (EPFO)ની આગામી 240મી સેન્ટ્રલ બોર્ડ ઓફ ટ્રસ્ટીઝ(CBT)ની બેઠકને લઈ વ્યાપક ચર્ચા થઈ રહી છે.
જાહેર કરવામાં આવેલ પત્ર પ્રમાણે આ બેઠક 19 નવેમ્બરના રોજ યોજાશે. આ બેઠકના એજન્ડા વિશે ચર્ચા કરીએ તો સરકાર કર્મચારીઓની લઘુતમ EPS પેન્શન વર્તમાન રૂપિયા 1000થી વધારી રૂપિયા 3000 કરી શકે છે. મીડિયા અહેવાલ પ્રમાણે શ્રમ મંત્રાલયે નાણાં મંત્રાલયને આ અંગે વ્યાપક ચર્ચા વિચારણા કરવા સહમતી કેળવી લીધી છે.
હવે એવી અપેક્ષા વ્યક્ત કરવામાં આવી છે કે આ બેઠકમાં લઘુતમ EPS પેન્શનના મુદ્દે એક અલગ એજન્ડાનો સમાવેશ થઈ શકે છે. જોકે, અત્યાર સુધી શ્રમ અથવા નાણાં મંત્રાલય તરફથી આ અંગે કોઈ અધિકૃત જાહેરાત કરવામાં આવી નથી. પણ આ અંગે નક્કર જાહેરાત થાય તેવી શક્યતા છે.
ફેબ્રુઆરી 2014માં CBT દ્વારા લઘુતમ EPS પેન્શન વધારીને રૂપિયા 1 હજાર કરવાની મંજૂરી આપી હતી, જે અંગે સરકારે તે વર્ષ ઓગસ્ટમાં નોટિફિકેશન ઈશ્યુ કર્યું હતું. ત્યારથી અત્યાર સુધી છેલ્લા 12 વર્ષમાં લઘુતમ પેન્શન રૂપિયા 1 હજાર પર અટકેલું છે.
દેશભરના વિવિધ કર્મચારીઓ અને પેન્શનર્સ સંગઠનો લાંબા સમયથી માંગ કરી રહ્યા છે કે વર્તમાન મોંઘવારીના તબક્કામાં રૂપિયા એક હજાર રકમ ખૂબ જ ઓછ છે, માટે તેને વધારીને ઓછામાં ઓછા 7,500 કરવામાં આવવું જોઈએ.