New Rules From 1st October 2026: આજથી શરૂ થયેલો ઓક્ટોબર 2026 નો મહિનો બેંકિંગ, રોકાણ અને રોજિંદા ખર્ચને લગતા અનેક મોટા ફેરફારો લઈને આવ્યો છે. આજે 1 ઓક્ટોબરથી દેશભરમાં પૈસા અને આર્થિક વ્યવહારો સાથે જોડાયેલા 8 મહત્વપૂર્ણ નિયમો બદલાવા જઈ રહ્યા છે. તેમાં SBI ના ATM ચાર્જ, બલ્ક FD ના નિયમો, LPG સબસિડી માટે બાયોમેટ્રિક ઓથેન્ટિકેશન અને જન્મ-મૃત્યુ નોંધણીના નવા નિયમો સામેલ છે. આગામી તહેવારોની સિઝનમાં કાર કે ઇલેક્ટ્રોનિક્સ વસ્તુઓ ખરીદવાની યોજના બનાવતા લોકોએ પણ આ ફેરફારોની નોંધ લેવી ખૂબ જ જરૂરી છે. ચાલો જાણીએ આ નવા નિયમો તમારા ખિસ્સા પર કેવી અસર કરશે.
LPG ગેસ સબસિડીના નિયમોમાં શું ફેરફાર થશે?
1 ઓક્ટોબર 2026 થી સબસિડીવાળા ઘરેલુ LPG સિલિન્ડર માટે બાયોમેટ્રિક આધાર ઓથેન્ટિકેશન (BAA) પ્રક્રિયા ફરજિયાત કરવામાં આવી છે. જે ગ્રાહકો આ પ્રક્રિયા પૂર્ણ નહીં કરે, તેમને ગેસ સિલિન્ડરની સપ્લાય તો મળશે, પરંતુ તેમને સિલિન્ડર બજાર ભાવે ખરીદવો પડશે અને સબસિડીનો લાભ બંધ થઈ જશે. 19 સપ્ટેમ્બર 2026 સુધીમાં લગભગ 89.9% ગ્રાહકોએ આ પ્રક્રિયા પૂરી કરી લીધી છે. સરકારે ગેસ સબસિડીના દુરુપયોગને રોકવા માટે આ નિર્ણય લીધો છે.
SBI ATM અને રોકડ ઉપાડના ચાર્જમાં શું બદલાવ આવશે?
SBI ના 'સેલેરી પેકેજ એકાઉન્ટ' (Salary Package Account) ધરાવતા ગ્રાહકો માટે 1 ઓક્ટોબરથી અન્ય બેંકોના ATM વાપરવાના નિયમો બદલાશે. હવે આવા ગ્રાહકોને અન્ય બેંકના ATM માંથી મહિનામાં માત્ર 5 ફ્રી ટ્રાન્ઝેક્શન મળશે (અગાઉ આ મર્યાદા 10 ની હતી). ફ્રી લિમિટ પૂરી થયા પછી નાણાકીય ટ્રાન્ઝેક્શન પર 23 રૂપિયા + GST અને બિન-નાણાકીય ટ્રાન્ઝેક્શન પર 11 રૂપિયા + GST ચાર્જ લાગશે.
આ ઉપરાંત, SBI ના 'બેઝિક સેવિંગ્સ બેંક ડિપોઝિટ' (BSBD) ખાતામાંથી મહિનામાં માત્ર પ્રથમ 4 રોકડ ઉપાડ મફત રહેશે (જેમાં AePS ના ઉપાડનો પણ સમાવેશ થાય છે). ત્યારબાદ દરેક વધારાના ઉપાડ પર 15 રૂપિયા + GST ચાર્જ ચૂકવવો પડશે. જોકે, ડિજિટલ વ્યવહારો પર આવો કોઈ ચાર્જ લાગશે નહીં.
શું 1 ઓક્ટોબરથી FD અને સ્મોલ સેવિંગ્સ સ્કીમ્સના નિયમો બદલાશે?
1 ઓક્ટોબર 2026 થી બેંકોમાં બલ્ક ફિક્સ્ડ ડિપોઝિટ (Bulk FD) ના નિયમોમાં ફેરફાર થયા છે. નવા નિયમ મુજબ હવે 3 કરોડ રૂપિયા કે તેથી વધુની ડિપોઝિટ બલ્ક FD ગણાશે. આ ફેરફારથી બેંકોને વ્યાજદર નક્કી કરવામાં વધુ છૂટછાટ મળશે, જોકે સામાન્ય ગ્રાહકોની રિટેલ FD ના વ્યાજદરમાં કોઈ સીધો ફેરફાર નહીં થાય. આ સાથે જ, PPF, NSC અને સુકન્યા સમૃદ્ધિ યોજના જેવી સ્મોલ સેવિંગ્સ સ્કીમ માટે ઓક્ટોબર-ડિસેમ્બર ત્રિમાસિકના નવા વ્યાજદરોની સમીક્ષા પણ કરવામાં આવશે.
RBI ની મોનેટરી પોલિસી બેઠકથી શું અસર થશે?
ભારતીય રિઝર્વ બેંક (RBI) ની મોનેટરી પોલિસી કમિટી (MPC) ની બેઠક 5 થી 7 ઓક્ટોબર દરમિયાન યોજાશે. 7 ઓક્ટોબરે રેપો રેટ અંગે અંતિમ નિર્ણય લેવાશે. હાલમાં રેપો રેટ 5.25% છે. SBI ના રિસર્ચ મુજબ તેમાં 0.25% ના વધારાની શક્યતા છે. જો રેપો રેટમાં ફેરફાર થશે, તો આગામી સમયમાં બેંક લોન અને FD ના વ્યાજદરો પર તેની સીધી અસર જોવા મળશે.
જન્મ અને મૃત્યુ નોંધણીના કયા નવા નિયમો લાગુ પડશે?
1 ઓક્ટોબર 2026 થી 'જન્મ અને મૃત્યુ નોંધણી (સુધારા) અધિનિયમ, 2026' લાગુ થશે. આ નવા કાયદા હેઠળ જન્મ કે મૃત્યુના મોડા રજિસ્ટ્રેશનની પ્રક્રિયા અગાઉ કરતા ખૂબ કડક બની ગઈ છે. 1 થી 2 વર્ષની અંદર રજિસ્ટ્રેશન કરાવવા માટે જિલ્લા મેજિસ્ટ્રેટ (DM) અથવા સબ-ડિવિઝનલ મેજિસ્ટ્રેટની મંજૂરી ફરજિયાત રહેશે. જ્યારે 2 વર્ષથી વધુ વિલંબના કિસ્સામાં પ્રથમ વર્ગના ન્યાયિક મેજિસ્ટ્રેટના આદેશ વિના રજિસ્ટ્રેશન થઈ શકશે નહીં.
ITR ફાઇલિંગ અને NRI પ્રોપર્ટીના નિયમોમાં શું છે અપડેટ?
જે કરદાતાઓ ટેક્સ ઓડિટના દાયરામાં આવે છે તેમના માટે ઇન્કમ ટેક્સ રિટર્ન (ITR) ફાઇલ કરવાની છેલ્લી તારીખ 31 ઓક્ટોબર 2026 છે. બીજી તરફ, જો તમે કોઈ NRI (નોન-રેસિડેન્ટ ઇન્ડિયન) પાસેથી પ્રોપર્ટી ખરીદો છો, તો ખરીદનારને હવે અલગથી TAN લેવાની જરૂર રહેશે નહીં; PAN કાર્ડ દ્વારા પણ આ પ્રક્રિયા સરળતાથી પૂર્ણ કરી શકાશે. વધુમાં, UPI મર્ચન્ટ પેમેન્ટમાં 2000 રૂપિયાથી વધુના ટ્રાન્ઝેક્શન પર નવું MDR સ્ટ્રક્ચર લાગુ થશે, જોકે ગ્રાહકોએ આનો કોઈ ચાર્જ ચૂકવવાનો રહેશે નહીં.
શું તહેવારોમાં કાર અને ઇલેક્ટ્રોનિક્સ સામાન મોંઘો થશે?
તહેવારોની સિઝનમાં ખરીદી કરવા જતા ગ્રાહકોને મોંઘવારીનો ફટકો પડી શકે છે. કાચા માલ (કોપર, સ્ટીલ, એલ્યુમિનિયમ) ના ભાવ વધવાને કારણે મારુતિ સુઝુકી (Maruti Suzuki), ટાટા મોટર્સ (Tata Motors) અને હ્યુન્ડાઇ (Hyundai) જેવી ઓટો કંપનીઓએ પોતાના અમુક મોડલની કિંમતોમાં વધારો કર્યો છે. આ સાથે એર કન્ડિશનર (AC) ની કિંમતોમાં 5-8% અને ફ્રિજ, LED TV તેમજ વોશિંગ મશીનમાં 3-4% સુધીનો વધારો થવાની સંભાવના નિષ્ણાતો દ્વારા વ્યક્ત કરવામાં આવી છે.