LPG Cylinder New Rule: કેન્દ્રીય પેટ્રોલિયમ અને કુદરતી ગેસ મંત્રાલય દ્વારા ઘરેલું LPG સિલિન્ડરના ગ્રાહકો માટે એક અત્યંત મહત્વપૂર્ણ અપડેટ જાહેર કરવામાં આવ્યું છે. નવી માર્ગદર્શિકા મુજબ, 1 ઓક્ટોબર, 2026થી સબસિડીવાળા LPG સિલિન્ડરના બુકિંગ અને સબસિડી મેળવવા માટે બાયોમેટ્રિક આધાર ઓથેન્ટિકેશન (BAA) ફરજિયાત બનાવવામાં આવ્યું છે. જે ગ્રાહકો આ સમયમર્યાદા પહેલાં વેરિફિકેશન પૂર્ણ નહીં કરે, તેમણે સામાન્ય સબસિડીવાળા દરના બદલે બજાર કિંમતે એટલે કે વધુ કિંમત ચૂકવીને સિલિન્ડર મેળવવો પડશે.
2.47 કરોડ ગ્રાહકો માટે વેરિફિકેશન હજુ બાકી
મંત્રાલયના આંકડા અનુસાર, દેશમાં અત્યાર સુધીમાં લગભગ 89.9% ગ્રાહકોએ (આશરે 27.43 કરોડ લોકોએ) આ બાયોમેટ્રિક ઓથેન્ટિકેશન પૂર્ણ કરી લીધું છે. જોકે, હજુ પણ દેશભરમાં આશરે 2.47 કરોડ ગ્રાહકોનું વેરિફિકેશન બાકી છે. જે ગ્રાહકોએ વેરિફિકેશન કરાવી લીધું છે તેમને કોઈ નવી કાર્યવાહી કરવાની જરૂર રહેશે નહીં; તેમનું બુકિંગ અને સબસિડી અગાઉની જેમ જ ચાલુ રહેશે.
બાયોમેટ્રિક આધાર વેરિફિકેશન પૂર્ણ કરવાની 3 સરળ રીતો
ગ્રાહકોને કોઈ મુશ્કેલી ન પડે તે માટે સરકાર અને ઓઈલ માર્કેટિંગ કંપનીઓએ ત્રણ સરળ વિકલ્પો પૂરા પાડ્યા છે:
ડિલિવરી સમયે: LPG સિલિન્ડર ડિલિવરી કરવા આવનાર વ્યક્તિ પાસે ઉપલબ્ધ મોબાઈલ એપ દ્વારા ઘરે બેઠા જ બાયોમેટ્રિક વેરિફિકેશન કરાવી શકાય છે.
ગેસ એજન્સી ખાતે: ગ્રાહક પોતાના સંબંધિત ગેસ એજન્સીના શોરૂમની મુલાકાત લઈને પણ આ પ્રક્રિયા પૂર્ણ કરી શકે છે.
મોબાઈલ એપ દ્વારા: ગ્રાહકો પોતપોતાની ઓઈલ કંપનીની અધિકૃત એપ્લિકેશન જેમ કે Indane માટે 'IndianOil One', Bharat Gas માટે 'Hello BPCL' અને HP Gas માટે 'HP Pay'—અથવા WhatsApp ચેટ અને IVRS નો ઉપયોગ કરીને ઘરે બેઠા પ્રમાણીકરણ કરી શકે છે.
ચકાસણી પૂર્ણ ન થાય તો શું થશે?
પેટ્રોલિયમ મંત્રાલયે સ્પષ્ટતા કરી છે કે 1 ઓક્ટોબર સુધી વેરિફિકેશન પૂર્ણ ન થાય તો પણ ગ્રાહકનું ગેસ કનેક્શન સ્થગિત કે રદ કરવામાં આવશે નહીં. જોકે, સંબંધિત કનેક્શન પર મળતી સબસિડી અટકાવી દેવાશે અને ગ્રાહકે સબસિડી વગરના બજારભાવે રિફિલ ખરીદવું પડશે.
નિયમ લાગુ કરવાનો મુખ્ય ઉદ્દેશ્
આ પ્રક્રિયાનો મુખ્ય હેતુ સબસિડીનો લાભ માત્ર સાચા અને જરૂરિયાતમંદ પરિવારો સુધી પહોંચાડવાનો છે. આનાથી ઘરેલું સિલિન્ડરનો વ્યાવસાયિક દુરુપયોગ, બ્લેક માર્કેટિંગ અને નકલી કનેક્શન્સ પર કડક લગામ લાગશે, જેથી આખી વિતરણ વ્યવસ્થા વધુ પારદર્શક બનશે.