India Russian Crude Oil Imports September: સપ્ટેમ્બર મહિના દરમિયાન ભારતે રશિયા પાસેથી દરરોજ આશરે 1.8 મિલિયન બેરલ ક્રૂડ ઓઈલની આયાત કરી હતી. આ આંકડો ઓગસ્ટ મહિનાના આયાત સ્તરની ખૂબ જ નજીક અને મોટાભાગે સ્થિર રહ્યો છે, પરંતુ જુલાઈમાં નોંધાયેલી આયાત કરતાં નોંધપાત્ર રીતે ઓછો છે. રિફાઈનરીઓમાં ચાલી રહેલી વાર્ષિક જાળવણી કામગીરી અને ચીન દ્વારા રશિયન ક્રૂડ ઓઈલની વધારી દેવાયેલી ખરીદીના કારણે ભારત તરફ આવતા પુરવઠા પર આ અસર જોવા મળી છે.
પશ્ચિમ એશિયાના દેશોથી વધેલી આયાત
વૈશ્વિક કોમોડિટી ડેટા અને એનાલિટિક્સ ફર્મ 'કેપ્લર'ના ડેટા અનુસાર, ઓગસ્ટમાં ભારતે 2.08 મિલિયન bpd અને જુલાઈમાં 2.82 મિલિયન bpd રશિયન ઓઈલની આયાત કરી હતી. રશિયન તેલના પુરવઠામાં થયેલી આ ઘાટને મુખ્યત્વે પશ્ચિમ એશિયાના દેશોમાંથી વધારાની ખરીદી કરીને ભરપાઈ કરવામાં આવી હતી.
- ઈરાક: ઓગસ્ટમાં 1,63,000 bpd ની સરખામણીએ સપ્ટેમ્બરમાં આયાત વધીને આશરે 5,05,000 bpd પહોંચી હતી.
- સાઉદી અરેબિયા: સપ્ટેમ્બરમાં પુરવઠો વધીને 5,76,000 bpd થયો હતો, જે ઓગસ્ટમાં 3,47,000 bpd હતો.
- યુએઈ: સપ્ટેમ્બરમાં આયાત આશરે 5,22,000 bpd રહી હતી, જે ઓગસ્ટના 5,46,000 bpd ના સ્તરની આસપાસ જ જળવાઈ રહી હતી.
નિષ્ણાતોનું વિશ્લેષણ અને ભવિષ્યની સ્થિતિ
કેપ્લરના લીડ એનાલિસ્ટ નિખિલ દુબેના જણાવ્યા અનુસાર, રશિયામાં જ નિકાસના માળખાગત અવરોધો ઊભા થતાં પુરવઠામાં ઘટાડો નોંધાયો હતો. તેમણે વધુમાં જણાવ્યું હતું કે જો ભારત ભવિષ્યમાં રશિયન તેલની ખરીદીમાં નોંધપાત્ર કાપ મૂકે, તો એશિયન અને વૈશ્વિક રિફાઈનરીઓ વચ્ચે વૈકલ્પિક ક્રૂડ ઓઈલ મેળવવા માટે તીવ્ર સ્પર્ધા ઊભી થઈ શકે છે. આનાથી વૈશ્વિક સ્તરે ક્રૂડ ઓઈલના ભાવ વધવાનું જોખમ રહેલું છે. ભારતીય રિફાઈનરીઓ માટે અન્ય દેશોમાંથી વિકલ્પ શોધવો ટેકનિકલી શક્ય છે, પરંતુ તેનાથી પરિવહન અને આયાત ખર્ચ વધી શકે છે.