Gold Silver Price Outlook: બુલિયન માર્કેટમાં હાલ ભલે સોના અને ચાંદીના ભાવમાં તીવ્ર ઘટાડો અને ઉતાર-ચઢાવ જોવા મળી રહ્યા હોય, પરંતુ લાંબા ગાળાના રોકાણકારો માટે મોટા રાહતના સમાચાર સામે આવ્યા છે. ઈન્ડિયા બુલિયન એન્ડ જ્વેલર્સ એસોસિએશન (IBJA)ના તાજા અંદાજ મુજબ, આગામી વર્ષ એટલે કે 2027ના અંત સુધીમાં સોના અને ચાંદીના ભાવ ઐતિહાસિક સપાટી વટાવી શકે છે.
IBJAના સેક્રેટરી સુરેન્દ્ર મહેતાના જણાવ્યા અનુસાર, 2027ના અંત સુધીમાં આંતરરાષ્ટ્રીય બજારમાં સોનું 6,200 ડોલર પ્રતિ ઔંસ અને ચાંદી 180 ડોલર પ્રતિ ઔંસ સુધી પહોંચવાની પૂરી શક્યતા છે. જો આ આંકડા મુજબ ગણતરી કરવામાં આવે તો, ભારતીય બજારમાં 10 ગ્રામ સોનાનો ભાવ 1.87 લાખ રૂપિયાને પાર કરી જશે, જ્યારે એક કિલો ચાંદીનો ભાવ 5,45,100 રૂપિયા સુધી પહોંચી શકે છે.
ટૂંકા ગાળામાં હજુ પણ જોવા મળી શકે છે ઉતાર-ચઢાવ
બજારના નિષ્ણાતોનું માનવું છે કે હાલ પૂરતું કિંમતી ધાતુઓ પર થોડું દબાણ જળવાઈ રહી શકે છે. સુરેન્દ્ર મહેતાના મતે, નજીકના ભવિષ્યમાં સોના-ચાંદીના ભાવમાં વધઘટ ચાલુ રહેશે. જોકે, વૈશ્વિક સ્તરે જે રીતે માંગ વધી રહી છે, તે જોતા આ ઘટાડો માત્ર કામચલાઉ છે. તેમણે રોકાણકારોને સલાહ આપતા કહ્યું કે, વર્તમાન ઘટાડાથી ગભરાઈને સોનાને હળવાશમાં લેવાની ભૂલ ન કરવી જોઈએ, કારણ કે તેનો લાંબા ગાળાનો ટ્રેન્ડ હજુ પણ મજબૂત છે.
2027ના અંત સુધીમાં ક્યાં પહોંચશે બજાર?
ભવિષ્યના ભાવ અંગે વાત કરતા સુરેન્દ્ર મહેતાએ સ્પષ્ટ શબ્દોમાં કહ્યું કે- મને લાગે છે કે 2027ના અંત સુધીમાં સોનું આશરે 6,200 ડોલર અને ચાંદી 180 ડોલર પ્રતિ ઔંસની આસપાસ પહોંચી શકે છે. જોકે, અત્યારે બજારમાં અસ્થિરતા રહી શકે છે અને ભાવની આગામી દિશા ઘણા વૈશ્વિક પરિબળો પર નિર્ભર રહેશે.
આખરે અત્યારે કેમ ઘટી રહ્યા છે સોના-ચાંદીના ભાવ?
ઘણા ખરીદદારોના મનમાં એ સવાલ છે કે જો ભવિષ્યમાં ભાવ આટલા વધવાના છે, તો અત્યારે ઘટાડો કેમ થઈ રહ્યો છે? આ પાછળ મુખ્ય બે વૈશ્વિક કારણો જવાબદાર છે.
ક્રૂડ ઓઈલ અને વ્યાજ દરોની અનિશ્ચિતતા: આંતરરાષ્ટ્રીય બજારમાં ક્રૂડ ઓઈલના ભાવમાં થતી વધઘટ અને અમેરિકામાં વ્યાજ દરો અંગેની અસ્પષ્ટતાની સીધી અસર બુલિયન માર્કેટ પર પડી રહી છે.
અમેરિકી ફેડરલ રિઝર્વની પોલિસી: અમેરિકાની સેન્ટ્રલ બેંક ફેડરલ રિઝર્વ આગામી સમયમાં વ્યાજ દરો અંગે શું નિર્ણય લેશે તે હજુ સ્પષ્ટ નથી. રોકાણકારોની નજર હવે ફેડરલ રિઝર્વની ડિસેમ્બર મહિનાની પોલિસી બેઠક પર ટકેલી છે, જેના કારણે હાલ બજારમાં દબાણ જોવા મળી રહ્યું છે.
સિંગાપોર અને હોંગકોંગમાં વધી રહી છે ગોલ્ડ સ્ટોરેજ ક્ષમતા
લાંબા ગાળે સોનાની તેજી પાછળનું એક મોટું કારણ એશિયન બજારોની તૈયારીઓ પણ છે. મહેતાએ એક મહત્વપૂર્ણ સંકેત તરફ ધ્યાન દોરતા જણાવ્યું કે, સિંગાપોર અને હોંગકોંગ જેવા મોટા વૈશ્વિક નાણાકીય કેન્દ્રોમાં સોનું સુરક્ષિત રાખવા માટેના વોલ્ટની ક્ષમતા ઝડપથી વધારવામાં આવી રહી છે. નિષ્ણાતોના મતે, કોઈ પણ વૈશ્વિક બજાર ભવિષ્યમાં મોટા કારોબાર અને ઊંચી માંગની અપેક્ષા વગર પોતાની સ્ટોરેજ ક્ષમતામાં આટલો મોટો વધારો કરતું નથી.
તહેવારોની સિઝનમાં રેકોર્ડબ્રેક ખરીદી
તાજેતરમાં ભાવમાં આવેલા ઘટાડાનો સામાન્ય ગ્રાહકો અને રોકાણકારોએ પૂરો ફાયદો ઉઠાવ્યો છે. IBJAના આંકડા મુજબ, ધનતેરસ અને દિવાળીના તહેવારો દરમિયાન દેશભરમાં 61 થી 62 ટનથી વધુ સોનાનું વેચાણ નોંધાયું છે. આ જ સમયગાળામાં ચાંદીની ખરીદી પણ 330 થી 340 ટન સુધી પહોંચી હોવાનો અંદાજ છે.
ખરીદી વધવાના મુખ્ય કારણો
- તહેવારો સમયે ભાવમાં આવેલી નરમાઈ.
- આગામી લગ્નસરાની સિઝન માટેની તૈયારી.
- ભાવ વધવાની આશંકાએ ગ્રાહકોમાં વધેલો 'એડવાન્સ બુકિંગ'નો ટ્રેન્ડ.