Crude Oil Price Hike: મધ્ય પૂર્વમાં ચાલી રહેલા તીવ્ર સંઘર્ષો અને રશિયા-યુક્રેન યુદ્ધના કારણે વૈશ્વિક ઉર્જા બજારમાં ફરી એકવાર મોટો ભડકો થયો છે. કાળઝાળ વધતા તણાવ વચ્ચે મે મહિના પછી પ્રથમ વખત ઇન્ટરનેશનલ માર્કેટમાં બ્રેન્ટ ક્રૂડ (Brent Crude)ના ભાવ પ્રતિ બેરલ $110ની સપાટી વટાવી ગયા છે. વૈશ્વિક સ્તરે ક્રૂડ ઓઇલના પુરવઠામાં સર્જાયેલા અવરોધો ટૂંક સમયમાં દૂર થાય તેવા કોઈ સંકેતો દેખાતા નથી. પરિણામે, આગામી દિવસોમાં ભારતીય બજારમાં પેટ્રોલ અને ડીઝલના ભાવમાં મોટો વધારો થવાની શક્યતાઓ પ્રબળ બની છે.
બ્રેન્ટ ફ્યુચર્સમાં 3.7%નો ઉછાળો
આ પણ વાંચો
મધ્ય પૂર્વના મુખ્ય નિકાસ કેન્દ્રો અને પૂર્વ યુરોપમાં સતત વધી રહેલા યુદ્ધના કારણે બજારમાં ભારે અસ્થિરતા જોવા મળી રહી છે. સપ્તાહના અંતે ટ્રેડિંગ દરમિયાન બ્રેન્ટ ક્રૂડના ભાવમાં 3.7%નો સીધો ઉછાળો નોંધાયો હતો. વૈશ્વિક આંકડાઓ અનુસાર, વર્તમાન વર્ષ દરમિયાન કાચા તેલની કિંમતોમાં 70%થી પણ વધુનો ભયંકર વધારો થઈ ચૂક્યો છે.
ઈરાન સમર્થિત હુથી બળવાખોરો દ્વારા સાઉદી અરેબિયાના ઓઈલ ઈન્ફ્રાસ્ટ્રક્ચર પર મિસાઈલ અને ડ્રોન હુમલાઓ સતત ચાલુ રાખવામાં આવ્યા છે. બીજી તરફ, રશિયા અને યુક્રેન પણ એકબીજાની મહત્વપૂર્ણ ઊર્જા રિફાઇનરીઓ અને પુરવઠા લાઈનોને નિશાન બનાવી રહ્યા છે, જેના પરિણામે આંતરરાષ્ટ્રીય સ્તરે ક્રૂડની અછત ઘેરી બની છે.
ટ્રમ્પ-રશિયા ડીઝલ કરાર સામે યુએસ કોંગ્રેસમાં ખરડો રજૂ
વૈશ્વિક તેલ સંકટ વચ્ચે અમેરિકી રાજકારણમાં પણ ગરમાવો આવ્યો છે. યુએસ પ્રમુખ ડોનાલ્ડ ટ્રમ્પ અને મોસ્કો (રશિયા) વચ્ચે થયેલા એક કરાર હેઠળ લાખો બેરલ રશિયન ડીઝલ વૈશ્વિક બજારમાં મુક્ત કરવાનો પ્રસ્તાવ હતો. પરંતુ, યુએસ ધારાસભ્યોએ શુક્રવારે એક નવો ખરડો રજૂ કરીને આ કરારને રોકવાની કાનૂની તજવીજ હાથ ધરી છે. અમેરિકી સાંસદોનું માનવું છે કે આ કરારથી રશિયાને પોતાના યુદ્ધ ભંડોળને મજબૂત કરવામાં મદદ મળશે.
જો વૈશ્વિક બજારોમાં રશિયન ડીઝલના પ્રવેશ પર રોક ચાલુ રહેશે, તો માંગને પહોંચી વળવા માટે વિશ્વના અન્ય દેશોમાં આવેલી રિફાઇનરીઓએ તેમની પ્રોસેસિંગ ક્ષમતામાં મોટો વધારો કરવો પડશે. જોકે, પ્રમુખ ટ્રમ્પે પુનરોચ્ચાર કર્યો છે કે મોસ્કો આ ડીઝલ કરારનું પાલન કરશે.
રશિયન રિફાઇનરી પર હુમલો અને બ્લેક સી ટેન્શન
સમાચાર એજન્સી રોઇટર્સના અહેવાલ મુજબ, કાળા સમુદ્ર (Black Sea) ક્ષેત્રમાં તણાવ ચરમસીમાએ પહોંચ્યો છે. તાજેતરમાં રશિયાની અત્યંત મહત્વપૂર્ણ 'રિયાઝાન ઓઇલ રિફાઇનરી' (Riazan Oil Refinery) પર થયેલા ડ્રોન હુમલા બાદ ત્યાં કામગીરી સંપૂર્ણપણે અટકી પડી છે. આ ઘટના બાદ રશિયા સાથેના ડીઝલ પુરવઠા કરારના અમલીકરણ અંગે આંતરરાષ્ટ્રીય બજારમાં શંકાના વાદળો વધુ ઘેરા બન્યા છે.
દરમિયાન, અમેરિકી સરકારે એવા પાંચ દેશોને 100% ટેરિફમાંથી મુક્તિ આપી છે, જેઓ રશિયા અને ઈરાન પાસેથી મોટી માત્રામાં તેલ અને ગેસની આયાત કરે છે. આ મુક્તિથી ભારત અને ચીન જેવા મોટા આયાતકાર દેશોને થોડી રાહત મળી છે, પરંતુ વૈશ્વિક સ્તરે ક્રૂડ $110ના સ્તરે પહોંચતા આગામી દિવસોમાં દેશમાં ઈંધણના ભાવ વધવાની ભીતિ સેવાઈ રહી છે.