US Visa Fee Hike: અમેરિકાની US સિટીઝનશિપ એન્ડ ઈમિગ્રેશન સર્વિસિસ-USCIS દ્વારા વીઝાની વિવિધ કેટેગરીમાં પ્રીમિયમ પ્રોસેસિંગ ફીમાં વધારો કરવાનો નિર્ણય કર્યો છે. આ નવા દર 1લી માર્ચ 2026થી લાગૂ થશે અને તે ફક્ત એવા અરજદારો તથા નોકરીદાતાને લાગુ થશે કે જે ઝડપી પ્રોસેસિંગ માટે પ્રીમિયમ પ્રોસેસિંગનો વિકલ્પ પસંદ કરે છે.
ફી કેમ વધારવામાં આવી છે?
ડિપાર્ટમેન્ટ ઓફ હોમલેન્ડ સિક્યુરિટી(DHS) પાસે દર બે વર્ષે ફુગાવાના આધારે પ્રીમિયમ પ્રોસેસિંગ ફી સમાયોજિત કરવાનો અધિકાર છે. જૂન 2023 અને જૂન 2025 વચ્ચેના ફુગાવાના દરને ધ્યાનમાં રાખીને તાજેતરનો વધારો કરવામાં આવ્યો છે. એક સત્તાવાર નિવેદનમાં, USCIS એ જણાવ્યું હતું કે USCIS સ્ટેબિલાઇઝેશન એક્ટ DHS ને ફુગાવાને ધ્યાનમાં રાખીને દર બે વર્ષે પ્રીમિયમ પ્રોસેસિંગ ફી સમાયોજિત કરવા માટે અધિકૃત કરે છે. એજન્સી પ્રમાણે ફી એવી રીતે ગોઠવવામાં આવશે જે પ્રીમિયમ પ્રોસેસિંગ સેવાના આંતરિક મૂલ્યનું રક્ષણ કરે.
ફોર્મ I-129 હેઠળ H-2B અથવા R-1 નોન-ઇમિગ્રન્ટ સ્ટેટસ માટેની અરજી માટે પ્રીમિયમ પ્રોસેસિંગ ફી 1,685 ડોલરથી વધીને 1,780 ડોલર થશે. ફોર્મ I-129ની અન્ય કેટેગરી કે જેમાં H-1B શામેલ છે તેના માટે ફી 2,805 ડોલરથી વધીને 2,965 ડોલર થશે. આ નવી ફી ફોર્મ I-140 હેઠળ રોજગાર-આધારિત શ્રેણીઓમાં વિદેશી કામદારો માટે ઇમિગ્રન્ટ અરજીઓ પર પણ લાગુ થશે જે પહેલા 2,805 ડોલર હતી.
કેટલાક નોન-ઇમિગ્રન્ટ સ્ટેટસના વિસ્તરણ અથવા ફેરફારને લગતી અરજીઓને અસર કરશે. F-1 અને F-2 વિદ્યાર્થીઓ, J-1 અને J-2 એક્સચેન્જ વિઝિટર્સ અને M-1 અને M-2 વ્યાવસાયિક વિદ્યાર્થીઓ દ્વારા ફોર્મ I-539 હેઠળ દાખલ કરાયેલી અરજીઓ માટે પ્રીમિયમ પ્રોસેસિંગ ફી 1,965 ડોલરથી વધીને 2,075 ડોલર થશે. વધુમાં ફોર્મ I-765 માટે પ્રીમિયમ પ્રોસેસિંગ ફી, જેમાં વૈકલ્પિક પ્રેક્ટિકલ ટ્રેનિંગ (OPT) અને STEM-OPT શામેલ છે, 1,685 ડોલરથી વધીને 1,780 ડોલર થશે.
ભારતીયો પર સંભવિત અસર
આ ફેરફાર ઘણા ભારતીય વ્યાવસાયિકો, વિદ્યાર્થીઓ અને કંપનીઓને અસર કરી શકે છે કારણ કે તેઓ H-1B, L-1 અને અન્ય સમાન અરજીનો નોંધપાત્ર ભાગ છે. પ્રીમિયમ પ્રોસેસિંગ સંપૂર્ણપણે વૈકલ્પિક છે અને સામાન્ય રીતે તે લોકો દ્વારા ઉપયોગમાં લેવાય છે જેમને નોકરીમાં ફેરફાર, વિઝા નવીકરણ, મુસાફરી યોજના અથવા તેમની સ્થિતિ અંગે તાત્કાલિક સ્પષ્ટતા જેવા કારણોસર ઝડપી નિર્ણયની જરૂર હોય છે.