Rainy Season Car Tips: ચોમાસામાં રસ્તાઓ પર પાણી ભરાઈ જવાની સમસ્યા સામાન્ય છે. જો ક્યારેક તમારી કાર પણ ભરાયેલા પાણીમાં ફસાઈ જાય, તો ગભરાવાને બદલે સમજદારીપૂર્વક કામ લેવું જોઈએ. પાણીમાં ફસાયેલી કારને વારંવાર ચાલુ કરવાની ભૂલ ભારે આર્થિક નુકસાન નોતરી શકે છે. આ પરિસ્થિતિમાં મોંઘા સમારકામથી બચવા અને તમારી સુરક્ષા માટે નીચે આપેલી 5 સલામતી ટિપ્સ ખાસ ધ્યાનમાં રાખવી જોઈએ:
એન્જિન ફરી ચાલુ કરવાનો પ્રયાસ ન કરો
પાણીમાં કાર બંધ થઈ જાય ત્યારે તેને વારંવાર સ્ટાર્ટ કરવાનો પ્રયાસ ક્યારેય ન કરવો. એક્ઝોસ્ટ અથવા એર ફિલ્ટર દ્વારા પાણી એન્જિનના પિસ્ટન સુધી પહોંચી શકે છે, જેને હાઇડ્રોલોક કહેવાય છે. હાઇડ્રોલોકને કારણે એન્જિન સંપૂર્ણપણે જપ્ત થઈ શકે છે અને એન્જિન બદલવાનો કે મોટો રિપેરિંગનો ખર્ચ આવી શકે છે.
ઇગ્નીશન તરત જ બંધ કરી દેવું
કાર બંધ થતાં જ ઇગ્નીશન બંધ કરીને ચાવી બહાર કાઢી લો. આમ કરવાથી કારના સેન્સર્સ અને ઇલેક્ટ્રિકલ પાર્ટ્સમાં શોર્ટ સર્કિટ થતું અટકાવી શકાય છે. જો પાણીનું સ્તર વધી રહ્યું હોય, તો પાવર વિન્ડો કંટ્રોલનો ઉપયોગ કરીને બારીઓ પહેલાથી જ થોડી ખોલી રાખો, જેથી કટોકટીના સમયે બહાર નીકળી શકાય.
સુરક્ષિત રીતે કારમાંથી બહાર નીકળો
જો પાણીનું સ્તર સતત વધતું રહે તો કારની અંદર બેસી રહેવાને બદલે તરત જ બહાર નીકળવું હિતાવહ છે. પાણીના ભારે દબાણને કારણે જો દરવાજા ન ખૂલે, તો બારીનો કાચ ખોલીને કે તેને તોડીને બહાર નીકળી જાઓ અને નજીકની કોઈ ઊંચી તેમજ સુરક્ષિત જગ્યાએ પહોંચી જાઓ.
વાહનને સાઈડમાં ખસેડવાનો પ્રયાસ કરો
જો પાણીનો પ્રવાહ ધીમો હોય અને પરિસ્થિતિ સુરક્ષિત લાગે, તો કારને ન્યુટ્રલ ગિયરમાં મૂકીને તેને ધક્કો મારીને રસ્તાની બાજુમાં અથવા ઓાછા પાણીવાળા વિસ્તારમાં લઈ જાઓ. ત્યાર બાદ નજીકના કોઈ મિકેનિકનો સંપર્ક કરવો.
ટોઇંગ સર્વિસ અને ઇન્શ્યોરન્સ કંપનીનો સંપર્ક કરો
જો કાર જાતે ખસેડવી શક્ય ન હોય, તો વગર વિલંબે ટો ટ્રક બોલાવો. સાથે જ તમારી વીમા કંપનીને તાત્કાલિક આ ઘટનાની જાણ કરો. મિકેનિક પાસે બોનેટ ખોલાવીને કારની પ્રાથમિક તપાસ કરાવી લેવી યોગ્ય રહેશે.
કારની ડિપસ્ટિક બહાર કાઢીને તપાસો. જો એન્જિન ઓઇલમાં પાણીના ટીપાં કે સફેદ ફીણ દેખાય, તો સમજવું કે એન્જિનમાં પાણી ઘૂસી ગયું છે. આવા સમયે સ્પાર્ક પ્લગ કે ઇન્જેક્ટર કાઢીને પહેલાં સંપૂર્ણ પાણી દૂર કરવું અને તે પછી જ સર્વિસ સેન્ટર પર કાર ચાલુ કરવાનો આગ્રહ રાખવો.