Navratri 2026 Start Date: માતાજીની આરાધનાના મહાપર્વ નવરાત્રીની ભક્તો આતુરતાથી રાહ જોતા હોય છે. વર્ષ 2026ની આસો નવરાત્રી દેવી ભક્તો માટે ખૂબ જ વિશેષ રહેવાની છે, કારણ કે આ વર્ષે નવરાત્રી 9 દિવસની નહીં પરંતુ 10 દિવસની રહેશે. પંચાંગની ગણતરી મુજબ તિથિ વૃદ્ધિના કારણે સર્જાયેલો આ સંયોગ માતાજીની સાધના અને ઉપાસના માટે અત્યંત ફળદાયી માનવામાં આવી રહ્યો છે. તો ચાલો જાણીએ આસો નવરાત્રી 10 દિવસની કેમ છે, અને ઘટસ્થાપનાથી લઈને અષ્ટમી-નવમીની તિથિઓ ક્યારે રહેશે.
આ વર્ષે નવરાત્રી 10 દિવસની શા માટે છે?
સામાન્ય રીતે આસો મહિનાના સુદ પક્ષની પડવાથી નવમી સુધી નવરાત્રી 9 દિવસની હોય છે. પરંતુ વર્ષ 2026ના પંચાંગ અનુસાર તિથિઓમાં વિશેષ સ્થિતિનું નિર્માણ થયું છે, જેમાં એક તિથિનું પુનરાવર્તન થઈ રહ્યું છે. જ્યોતિષશાસ્ત્રમાં આને 'તિથિ વૃદ્ધિ' કહેવાય છે. આ વર્ષે સપ્તમી તિથિ બે દિવસ, એટલે કે 17 અને 18 ઓક્ટોબરે રહેશે. આ કારણસર નવરાત્રીનો એક દિવસ વધી ગયો છે અને આ પર્વ 11 ઓક્ટોબરથી 20 ઓક્ટોબર સુધી, કુલ 10 દિવસ ચાલશે.
આસો નવરાત્રીનો પ્રારંભ ક્યારથી થશે?
પંચાંગ મુજબ, આસો સુદ પડવાની તિથિ 10 ઓક્ટોબરની રાત્રે 9:19 વાગ્યે શરૂ થશે અને 11 ઓક્ટોબરની રાત્રે 9:31 વાગ્યા સુધી રહેશે. હિન્દુ ધર્મમાં ઉદયા તિથિ (સૂર્યોદય સમયે રહેલી તિથિ) નું વિશેષ મહત્ત્વ હોવાથી, નવરાત્રીનો પ્રથમ દિવસ 11 ઓક્ટોબર, રવિવાર ગણાશે. આ દિવસથી આગામી 10 દિવસ સુધી મા દુર્ગાના વિવિધ સ્વરૂપોની પૂજા-અર્ચના કરવામાં આવશે.
ઘટસ્થાપના (કળશ સ્થાપના) નું શુભ મુહૂર્ત કયું છે?
11 ઓક્ટોબર, રવિવારના રોજ પ્રતિપદા તિથિ હોવાથી આ દિવસે નવરાત્રિની ઘટસ્થાપના સાથે મા શૈલપુત્રીની પૂજા કરવામાં આવશે. ઘટસ્થાપના માટેનું પ્રભાત મુહૂર્ત સવારે 6:35થી 10:29 વાગ્યા સુધી રહેશે, જેનો કુલ સમયગાળો 3 કલાક 54 મિનિટનો છે. આ ઉપરાંત, અભિજિત મુહૂર્ત બપોરે 12:03થી 12:50 વાગ્યા સુધી રહેશે.
દુર્ગા અષ્ટમી ક્યારે ઉજવાશે?
આ વર્ષે મહાઅષ્ટમી 18 ઓક્ટોબર, રવિવારના રોજ મનાવવામાં આવશે. પંચાંગ અનુસાર, અષ્ટમી તિથિ 18 ઓક્ટોબરે સવારે 8:27 વાગ્યે શરૂ થશે અને 19 ઓક્ટોબરના રોજ સવારે 10:51 વાગ્યા સુધી રહેશે. આ દિવસે મા મહાગૌરીની પૂજા, કન્યા પૂજન અને હવનનું વિશેષ મહત્ત્વ રહેલું છે.
મહાનવમી અને વિજયાદશમી (દશેરા) ક્યારે છે?
મહાનવમી પર્વ 19 ઓક્ટોબરે ઉજવાશે. આ દિવસે નવમી હવન, આયુધ પૂજા અને નવરાત્રીના વ્રતના પારણાં કરવામાં આવશે. નવમી તિથિ 20 ઓક્ટોબરે બપોરે 12:50 વાગ્યા સુધી રહેશે. આથી, 20 ઓક્ટોબરના રોજ વિજયાદશમી (દશેરા) મનાવવામાં આવશે અને સાથે જ દુર્ગા વિસર્જન પણ કરવામાં આવશે.
10 દિવસની નવરાત્રીનું ધાર્મિક મહત્ત્વ શું છે?
જ્યોતિષાચાર્યોના મતે, જ્યારે તિથિ વૃદ્ધિના કારણે નવરાત્રી 10 દિવસની થાય છે, ત્યારે તે સમાજ માટે સમૃદ્ધિ અને શુભતાનું પ્રતીક મનાય છે. ભક્તો અને સાધકો માટે એક વધારાનો દિવસ મળવાનો અર્થ એ છે કે તેમને માતાજીની આરાધના, જપ, તપ અને પાઠ કરવા માટે વધુ એક પવિત્ર તક પ્રાપ્ત થાય છે.