Ganpati Sthapana Muhurat 2026: દેશભરમાં આજે 14 સપ્ટેમ્બર 2026 ના રોજ ગણેશ ચતુર્થીનો પવિત્ર તહેવાર ઉત્સાહ અને ભક્તિભાવપૂર્વક ઉજવાઈ રહ્યો છે. ગણપતિ બાપ્પાના સ્વાગત માટે ભક્તોમાં ભારે ઉમંગ જોવા મળી રહ્યો છે. આજે ઘરો અને પંડાલોમાં વિધિ-વિધાનપૂર્વક ભગવાન શ્રી ગણેશની મૂર્તિ સ્થાપિત કરવામાં આવશે અને આ સાથે જ 10 દિવસીય ગણેશોત્સવનો પ્રારંભ થશે. ધાર્મિક માન્યતા છે કે ગણપતિની આરાધના કરવાથી જીવનના તમામ વિઘ્નો દૂર થાય છે. જો તમે પણ આજે બાપ્પાની સ્થાપના કરવા જઈ રહ્યા છો, તો જાણો આજનો શુભ મુહૂર્ત, રાહુકાળ, પૂજા વિધિ અને વિસર્જન સંબંધિત તમામ મહત્વપૂર્ણ માહિતી.
ગણેશ ચતુર્થી 2026 તિથિ
હિંદુ પંચાંગ અનુસાર, ભાદરવા સુદ પક્ષની ચતુર્થી તિથિ 14 સપ્ટેમ્બર 2026 ના રોજ સવારે 7:06 વાગ્યે શરૂ થઈ ચૂકી છે અને તે 15 સપ્ટેમ્બરની સવારે 7:44 વાગ્યે પૂર્ણ થશે. ઉદયા તિથિના આધારે ગણેશ ચતુર્થીનો તહેવાર આજે એટલે કે 14 સપ્ટેમ્બરે જ ઉજવવામાં આવી રહ્યો છે.
ગણપતિ સ્થાપના માટે સૌથી શુભ મુહૂર્ત
ગણેશ ચતુર્થીના દિવસે મૂર્તિ સ્થાપના માટે બપોરનો સમય (મધ્યાહ્ન પૂજા મુહૂર્ત) અત્યંત શુભ માનવામાં આવે છે. આજે ગણપતિ સ્થાપના અને મુખ્ય પૂજા માટે સવારે 11:20 વાગ્યાથી બપોરે 1:48 વાગ્યા સુધીનો શ્રેષ્ઠ મુહૂર્ત રહેશે. એટલે કે ભક્તોને મૂર્તિ સ્થાપિત કરવા અને પૂજા કરવા માટે અંદાજિત 2.5 કલાકનો સુંદર સમય મળશે.
અભિજીત મુહૂર્ત અને રાહુકાળનો સમય
આજના દિવસે અભિજીત મુહૂર્ત બપોરે 12:10 થી 12:59 સુધી રહેશે. આ સમય દરમિયાન શુભ કાર્ય કરવું મંગળકારી માનવામાં આવે છે. બીજી તરફ, રાહુકાળ સવારે 7:58 થી 9:30 વાગ્યા સુધી રહેશે. ધાર્મિક માન્યતાઓ અનુસાર આ સમયગાળા દરમિયાન શુભ કાર્યની શરૂઆત કરવાનું ટાળવું જોઈએ. સ્થાપનાનો મુખ્ય શુભ મુહૂર્ત રાહુકાળ પૂર્ણ થયા બાદ શરૂ થતો હોવાથી ભક્તો નિર્ધારિત સમયે નિશ્ચિંત થઈને પૂજા કરી શકે છે.
આજે ચંદ્ર દર્શન કેમ ટાળવા જોઈએ અને તેનો સમય શું છે?
ગણેશ ચતુર્થીના દિવસે ચંદ્ર દર્શનને લઈને વિશેષ પૌરાણિક માન્યતા છે. પંચાંગ મુજબ, આજે સવારે 9:13 વાગ્યાથી રાત્રે 8:34 વાગ્યા સુધી ચંદ્ર દર્શન કરવાનું ટાળવું જોઈએ. માન્યતા છે કે આ સમયગાળા દરમિયાન ચંદ્ર જોવાથી મિથ્યા કલંક (ખોટો દોષ) લાગી શકે છે. તેથી ભક્તોએ આ સમય દરમિયાન સાવચેતી રાખવી હિતાવહ છે.
ગણપતિ બાપ્પાની સ્થાપના અને પૂજા વિધિ કેવી રીતે કરવી?
- ગણપતિની સ્થાપના કરતા પહેલાં પૂજા સ્થળને સારી રીતે સાફ કરો.
- ત્યારબાદ એક પાટલા પર લાલ અથવા પીળા રંગનું સ્વચ્છ કપડું પાથરો અને તેના પર મૂર્તિ સ્થાપિત કરો.
- સૌપ્રથમ બાપ્પાનું આહ્વાન કરો અને તેમને જળ અથવા પંચામૃતથી સ્નાન કરાવો.
- મૂર્તિ પર રોળી, અક્ષત અને સિંદૂર અર્પણ કરો.
- ભગવાન ગણેશને લાલ ફૂલ અને તેમની અત્યંત પ્રિય 'દુર્વા' (ધરો) અચૂક અર્પણ કરો.
- ફળ, મીઠાઈ અને બાપ્પાના ફેવરિટ 'મોદક' નો ભોગ ધરાવો.
- ઘીનો દીવો અને ધૂપ પ્રગટાવીને ગણેશ મંત્રોનો જાપ કરો.
- અંતે આરતી કરીને પરિવારની સુખ-શાંતિ માટે પ્રાર્થના કરો.
પૂજા દરમિયાન કઈ બાબતોનું ખાસ ધ્યાન રાખવું?
ગણપતિ સ્થાપનાના દિવસે પૂજા સ્થળની પવિત્રતા અને સ્વચ્છતાનું ખાસ ધ્યાન રાખવું. ધાર્મિક પરંપરાઓ મુજબ ભગવાન ગણેશની પૂજામાં 'તુલસી' ના પાનનો ઉપયોગ વર્જિત માનવામાં આવે છે, તેથી પૂજામાં તુલસી ન ચઢાવવા. મૂર્તિ સ્થાપિત કર્યા બાદ શ્રદ્ધા અનુસાર નિયમિત બંને સમયે પૂજા અને આરતી કરવી જોઈએ.
ગણપતિ વિસર્જન ક્યારે કરવામાં આવશે?
10 દિવસીય ગણેશોત્સવનું ભવ્ય સમાપન 25 સપ્ટેમ્બર 2026 ના રોજ અનંત ચતુર્દશીના દિવસે થશે. આ દિવસે ભક્તો ગણપતિ બાપ્પાની મૂર્તિનું વિસર્જન કરશે. જોકે, દરેક પરિવારની પરંપરા અલગ હોય છે, કેટલાક ભક્તો 1.5 દિવસ બાદ, તો કેટલાક 3, 5, 7 કે 10મા દિવસે બાપ્પાને ઢોલ-નગારાં સાથે વિદાય આપી 'અગલે બરસ તૂ જલ્દી આ' ની કામના કરે છે.