Dashama Visarjan Date 2026: અષાઢ વદ અમાસના પવિત્ર દિવસે શ્રદ્ધા અને ભક્તિભાવપૂર્વક સ્થાપિત કરવામાં આવેલા મા દશામાના 10 દિવસીય વ્રતની પૂર્ણાહુતિ થવા જઈ રહી છે. આ 10 દિવસ દરમિયાન ભક્તો નિત્ય પૂજા-અર્ચના, આરતી, થાળ અને ગરબા દ્વારા માતાજીની વિશેષ આરાધના કરે છે. વ્રત પૂર્ણ થયા બાદ ઉજવણું, ઉત્થાપન, રાત્રિ જાગરણ તેમજ મૂર્તિ વિસર્જનની શાસ્ત્રોક્ત વિધિ અને ચોક્કસ સમય અંગે ભક્તોમાં ઉત્સુકતા રહેતી હોય છે. વર્ષ 2026 માટે દશામા વ્રતના ઉજવણા, જાગરણ અને વિસર્જનના શુભ મુહૂર્ત સહિતની તમામ વિગતો આ લેખમાં આપવામાં આવી છે.
દશામા વ્રત જાગરણ અને વિસર્જન કઈ તારીખે છે?
વર્ષ 2026 માં દશામા વ્રતની પૂર્ણાહુતિ 21 ઓગસ્ટ 2026 (શુક્રવાર) ના રોજ થશે. આ દિવસે વ્રતનું ઉજવણું અને આખી રાતનું ભક્તિમય જાગરણ કરવામાં આવશે. ત્યારબાદ બીજા દિવસે વહેલી સવારે એટલે કે 22 ઓગસ્ટ 2026 (શનિવાર) ના રોજ સૂર્યોદય પૂર્વે મા દશામાની મૂર્તિનું પવિત્ર જળમાં વિસર્જન કરવામાં આવશે.
વિસર્જન માટે શુભ મુહૂર્ત (22 ઓગસ્ટ 2026)
- બ્રહ્મ મુહૂર્ત: સવારે 04:49 થી 05:34 વાગ્યા સુધી
- પ્રાતઃ સંધ્યા: સવારે 05:11 થી 06:18 વાગ્યા સુધી
દશામા વ્રત ઉજવણું (ઉત્થાપન) કેવી રીતે કરવું?
જે ભક્તોએ 5 વર્ષ કે 10 વર્ષ માટે દશામાનું વ્રત લીધું હોય અને આ વર્ષે તેનું ઉજવણું કરવા માંગતા હોય, તેમણે 21 ઓગસ્ટ 2026 ના રોજ નીચે મુજબ વિધિ કરવી:
- સવારે સ્નાન-ધ્યાનથી નિવૃત્ત થઈને નિત્ય નિયમ મુજબ માતાજીની પૂજા, આરતી, થાળ અને વ્રતકથાનું શ્રવણ કરવું.
- દશામાનું વ્રત પૂર્ણ કરનારી સ્ત્રીઓ (ગોયણીઓ)ને આદરપૂર્વક ભોજન માટે આમંત્રિત કરવી.
- શ્રદ્ધાળુઓ પોતાની યથાશક્તિ ભોજન તૈયાર કરી શકે છે, પરંતુ તેમાં ઓછામાં ઓછું 1 મિષ્ઠાન (મીઠાઈ) અવશ્ય સામેલ કરવું.
- ભોજન બાદ દરેક ગોયણીને દશામા વ્રતની ચોપડી ભેટ આપવી, જેથી માતાજીના વ્રતનો મહિમા વિસ્તરે.
ગોયણી ન મળે તો કયા વૈકલ્પિક ઉપાયો કરી શકાય?
જો ઉજવણાના દિવસે ગોયણીઓ ઉપલબ્ધ ન થઈ શકે, તો શાસ્ત્રોક્ત નિયમો અનુસાર નીચે મુજબના વૈકલ્પિક ઉપાયો કરી શકાય છે:
- યથાશક્તિ ચાંદીની સાંઢણી (ઊંટડી) બનાવીને પવિત્ર જળમાં પધરાવી શકાય અથવા વિદ્વાન બ્રાહ્મણને દાનમાં આપી શકાય.
- ચાંદીની સાંઢણી શક્ય ન હોય તો માટી અથવા અન્ય ધાતુની સાંઢણી બનાવીને તેનું દાન કરવું.
- બ્રાહ્મણોને ભોજન કરાવી વસ્ત્રદાન કરવું અથવા જરૂરિયાતમંદ બાળકોને ભોજન કરાવી પુણ્ય મેળવવું.
રાત્રિ જાગરણનું શું મહત્વ છે?
21 ઓગસ્ટ 2026 (શુક્રવાર) ની સાંજે નિયમાનુસાર માતાજીની મહાઆરતી, થાળ અને ગરબાનું આયોજન કરવામાં આવે છે. આખી રાત દરમિયાન શ્રદ્ધાળુઓએ દશામાના નામ-સ્મરણ, જાપ, ભજન અને કીર્તનમાં લીન રહીને જાગરણ કરવાનું રહે છે.
દશામા મૂર્તિ વિસર્જન વિધિ
22 ઓગસ્ટ 2026 (શનિવાર) ના રોજ સૂર્યોદય પૂર્વે મૂર્તિ વિસર્જન વખતે આ બાબતોનું ધ્યાન રાખવું:
- વિસર્જન માટે પ્રસ્થાન કરતાં પહેલાં ઘરે માતાજીની અંતિમ આરતી કરવી અને થાળ ધરાવવો. 10 દિવસની પૂજા દરમિયાન જાણે-અજાણે થયેલી કોઈપણ ભૂલ માટે માતાજી સમક્ષ ક્ષમા માંગવી.
- નજીકના પવિત્ર જળાશય કે નદીમાં મૂર્તિ અને સાંઢણીનું ભાવપૂર્વક વિસર્જન કરવું. પ્રાર્થના કરવી કે માતાજી હંમેશા ઘરમાં સુખ-સમૃદ્ધિ જાળવી રાખે અને આગામી વર્ષે ફરી પધારે.