Health News: આજકાલની દોડધામભરી જીવનશૈલીમાં ઊંઘ સાથે સમજૂતી કરવી સામાન્ય બાબત બની ગઈ છે. કેટલાક લોકો દિવસમાં માત્ર 4 થી 5 કલાક ઊંઘે છે, તો વળી કેટલાક 10 થી 12 કલાક સુધી ઊંઘતા રહે છે. પરંતુ શું તમે જાણો છો કે જરૂરિયાત કરતાં ઓછી કે વધુ ઊંઘ લેવી તમારી બાયોલોજિકલ ઉંમરને ઝડપથી વધારી શકે છે અને અકાળ મૃત્યુનું જોખમ ઊભું કરી શકે છે?
લગભગ 5 લાખ લોકો પર કરવામાં આવેલા એક વ્યાપક અભ્યાસમાં સામે આવ્યું છે કે, જરૂરિયાત કરતાં વધુ કે ઓછી ઊંઘ લેવી એ શરીરમાં બાયોલોજિકલ એજિંગ ઝડપી બનાવવા અને સમય પહેલાં મૃત્યુના જોખમ સાથે સીધી રીતે જોડાયેલી છે.
ઓછી કે વધુ ઊંઘથી મૃત્યુનું જોખમ કેટલું?
સંશોધન મુજબ, 6 કલાક કરતાં ઓછી ઊંઘ લેતા લોકોમાં કોઈપણ કારણસર અકાળ મૃત્યુનું જોખમ 50% જેટલું વધુ જોવા મળ્યું હતું. બીજી તરફ, 6 થી 8 કલાક ઊંઘ લેનારાઓની સરખામણીમાં 8 કલાક કરતાં વધુ ઊંઘતા લોકોમાં આ જોખમ 40% જેટલું જોવા મળ્યું હતું.
અંગો અને લિંગના આધારે શરીરની બાયોલોજિકલ એજમાં સૌથી ઓછો તફાવત 6.4 થી 7.8 કલાકની ઊંઘ વચ્ચે નોંધાયો હતો.
મહિલાઓ અને પુરુષો માટે કેટલી ઊંઘ શ્રેષ્ઠ? (How many hours of sleep are enough?)
આ સ્ટડી અનુસાર:
- મહિલાઓ માટે: 6.5 થી 7.8 કલાકની ઊંઘ સૌથી શ્રેષ્ઠ માનવામાં આવી છે.
- પુરુષો માટે: 6.4 થી 7.7 કલાકની ઊંઘ સૌથી ઉત્તમ માનવામાં આવી છે.
યોગ્ય પ્રમાણમાં ઊંઘ લેવાથી હૃદય, મગજ, લીવર, ઇમ્યુન સિસ્ટમ, સ્કીન, એન્ડોક્રાઇન સિસ્ટમ, ફેટ ટિશ્યુ અને પેનક્રિયાઝ પર અત્યંત સકારાત્મક અસર જોવા મળે છે.
દક્ષિણ એશિયાના શહેરો અને દિલ્હીનો ચોંકાવનારો અહેવાલ
દિલ્હી, ચેન્નઈ અને કરાચી જેવા દક્ષિણ એશિયાના શહેરોના 16,287 પુખ્ત વયના લોકો પર કરવામાં આવેલા એક અલગ અભ્યાસમાં સ્લીપ પેટર્નને લઈને ચોંકાવનારા આંકડા સામે આવ્યા છે:
- એક પુખ્ત વ્યક્તિને સરેરાશ 7.3 કલાકની ઊંઘની જરૂર હોય છે.
- 5.5% લોકો દિવસમાં 5 કલાક કરતાં પણ ઓછી ઊંઘ લે છે.
- 12.4% લોકો 9 કલાક કરતાં વધુ સમય ઊંઘે છે.
- 12% લોકો અનિદ્રાની સમસ્યાથી પીડાઈ રહ્યા છે.
- 14.5% લોકોને નસકોરાં બોલવાની ફરિયાદ છે.
ઊંઘના કલાક જ નહીં, ગુણવત્તા પણ મહત્વની
માત્ર કેટલા કલાક ઊંઘો છો તે જ નહીં, પરંતુ તમારી ઊંઘ કેટલી ઊંડી છે અને તેમાં કેટલી સાતત્યતા છે તે પણ એટલું જ મહત્વનું છે. સતત 6 કલાક કરતાં ઓછી ઊંઘ લેવી કે અતિશય વધુ ઊંઘવું એ એ વાતનો સંકેત હોઈ શકે છે કે, તમારી ઊંઘની ક્વોલિટી સારી નથી અથવા શરીરમાં કોઈ આંતરિક બીમારી હોઈ શકે છે. ખરાબ સ્લીપ સાયકલ અને ઓછી ઊંઘને કારણે હૃદય રોગ, મેટાબોલિઝમ, ફેફસાં અને પાચન સંબંધિત બીમારીઓ તેમજ શરીરમાં સોજો અને હોર્મોનલ અસંતુલનનું જોખમ વધી જાય છે.