WhatsApp Recent Media Suggestions Feature: WhatsApp પોતાના યુઝર્સના અનુભવને વધુ સરળ બનાવવા માટે નવા ફીચર્સ પર કામ કરી રહ્યું છે. હવે કંપની Recent Media Suggestions નામનું નવું ફીચર લાવી રહી છે, જેની મદદથી યુઝર્સ ગેલેરી ખોલ્યા વગર જ ચેટમાં ફોટો અને વીડિયો શેર કરી શકશે. આ ફીચર Android અને iOS બંને યુઝર્સ માટે રજૂ કરવામાં આવી રહ્યું છે.
WhatsAppનું નવું Recent Media Suggestions ફીચર શું છે અને કેવી રીતે કરશે કામ?
WhatsAppનું Recent Media Suggestions ફીચર ફોટો અને વીડિયો શેર કરવાની પ્રક્રિયાને વધુ ઝડપી બનાવશે. WABetaInfoના રિપોર્ટ અનુસાર, આ ફીચર હાલમાં Android અને iOSના પસંદગીના યુઝર્સ માટે રોલઆઉટ કરવામાં આવી રહ્યું છે. તેની મદદથી યુઝર્સે ફોટો કે વીડિયો મોકલવા માટે વારંવાર ફોનની ગેલેરી ખોલવાની જરૂર નહીં પડે.
ચેટમાં જ દેખાશે તાજેતરના ફોટો અને વીડિયો
આ નવા ફીચર હેઠળ WhatsApp ચેટ ઇન્ટરફેસમાં જ ફોનની ગેલેરીમાં તાજેતરમાં ઉમેરવામાં આવેલા ફોટો અને વીડિયોના સૂચનો બતાવશે. કંપની તેના બે અલગ-અલગ વર્ઝનનું ટેસ્ટિંગ કરી રહી છે. પહેલા વર્ઝનમાં ચેટ બારની ઉપર લેટેસ્ટ ફોટો કે વીડિયોનું થંબનેલ દેખાઈ શકે છે. જ્યારે બીજા વર્ઝનમાં ચેટ બાર પર રહેલા કેમેરા આઇકનની જગ્યાએ સૂચવેલા મીડિયાનું થંબનેલ જોવા મળી શકે છે.
ફોટો મોકલતા પહેલાં એડિટ પણ કરી શકશો
યુઝર્સ આ સૂચનો પર ટેપ કરશે ત્યારે WhatsAppનું ડ્રોઇંગ એડિટર ખુલશે. અહીં ફોટો કે વીડિયોનું પ્રિવ્યૂ જોઈ શકાશે. ત્યારબાદ તેમાં કેપ્શન, સ્ટિકર્સ અને અન્ય ફેરફાર કરીને શેર કરી શકાશે. ખાસ વાત એ છે કે માત્ર સૂચન દેખાવાથી ફોટો કે વીડિયો આપમેળે મોકલાશે નહીં. યુઝરે પોતાની રીતે શેર કરવાની પ્રક્રિયા પૂરી કરવી પડશે.
WhatsAppનું નવું ફીચર પસંદ ન હોય તો કેવી રીતે કરો બંધ કરવું
આ ફીચર લાયક યુઝર્સ માટે આપમેળે ઇનેબલ થઈ શકે છે. જોકે, જે યુઝર્સને ચેટમાં વારંવાર ફોટો અને વીડિયોના સૂચનો નથી જોઈતા તેઓ તેને બંધ પણ કરી શકશે. આ માટે WhatsAppની Settingsમાં જઈને Chats વિકલ્પ પસંદ કરવો પડશે. ત્યારબાદ Recent media suggestions વિકલ્પ પર જઈને તેને ડિસેબલ કરી શકાશે. એકવાર આ સેટિંગ બંધ કર્યા પછી ચેટમાં તાજેતરના મીડિયાનાં સૂચનો દેખાશે નહીં.
Android અને iOS યુઝર્સને ક્યારે મળશે આ ફીચર?
હાલમાં WhatsAppનું Recent Media Suggestions ફીચર Android અને iOSના લેટેસ્ટ વર્ઝન વાપરતા પસંદગીના યુઝર્સ માટે ધીમે-ધીમે રોલઆઉટ થઈ રહ્યું છે. આથી દરેક યુઝરને એકસાથે આ સુવિધા નહીં મળે. તમામ યુઝર્સ સુધી આ ફીચર પહોંચતા થોડો સમય લાગી શકે છે. આ ફીચર ઉપલબ્ધ થયા બાદ ફોટો અને વીડિયો શેર કરવા માટે ગેલેરી ખોલવાની ઝંઝટ ઓછી થશે.