Smartphone Price Hike: જો તમે આગામી દિવસોમાં નવો સ્માર્ટફોન ખરીદવાનું વિચારી રહ્યા છો, તો તમારા બજેટ પર તેની અસર પડી શકે છે. મેમરી, ચિપસેટ અને અન્ય પાર્ટ્સની વધતી કિંમતને કારણે સ્માર્ટફોન કંપનીઓ પર ખર્ચનું દબાણ વધી રહ્યું છે. જેના કારણે Realme, Oppo, Vivo, Samsung અને OnePlus જેવી કંપનીઓએ કેટલાક મોડલ્સની કિંમતોમાં વધારો કર્યો છે.
સ્માર્ટફોન ખરીદવો હવે કેમ મોંઘો થઈ રહ્યો?
આ પણ વાંચો
-1793616684622_t.webp){kind=small}
સ્માર્ટફોન બનાવવામાં ઉપયોગમાં લેવાતી મેમરી અને ચિપસેટ સહિતના કોમ્પોનન્ટ્સની કિંમતમાં વધારો થયો છે. આ વધતા ઉત્પાદન ખર્ચને કારણે કંપનીઓનું માર્જિન ઘટી રહ્યું છે. પરિણામે કંપનીઓ હવે વધેલા ખર્ચનો કેટલોક હિસ્સો ગ્રાહકો પર નાખી રહી છે.
Counterpoint Researchના India Weekly Smartphone Sellout Tracker મુજબ, એપ્રિલથી જુલાઈ 2026 દરમિયાન સ્માર્ટફોનનું વેચાણ મોટાભાગે ગયા વર્ષની સરખામણીમાં નીચું રહ્યું હતું. મોટી ઓનલાઈન સેલ દરમિયાન વેચાણમાં થોડો વધારો જોવા મળ્યો હતો, પરંતુ ઓફર પૂરી થયા બાદ ફરીથી ઘટાડો નોંધાયો હતો.
Realme, Oppo, Vivo, Samsung અને OnePlusના ફોન મોંઘા
18 ઓગસ્ટથી Realmeએ પોતાના કેટલાક સ્માર્ટફોન મોડલ્સની કિંમતમાં આશરે ₹1,000થી ₹4,000 સુધીનો વધારો કર્યો છે. Oppoએ Reno અને A-Seriesના કેટલાક મોડલ્સની કિંમતમાં ₹5,000 સુધીનો વધારો કર્યો હોવાનું સામે આવ્યું છે. Vivoએ પણ કેટલાક વિસ્તારોમાં પસંદગીના મોડલ્સની કિંમતમાં આશરે ₹500થી ₹4,000 સુધીનો વધારો કર્યો છે. Samsungએ S-Series, M-Series અને F-Seriesના કેટલાક સ્માર્ટફોન મોંઘા કર્યા છે. Galaxy S25ના એક વેરિઅન્ટની કિંમતમાં ₹12,000 સુધીનો વધારો થયો છે.
આ સિવાય OnePlusએ પણ કેટલાક મોડલ્સની કિંમતમાં ₹2,000થી ₹4,000 સુધીનો વધારો કર્યો છે. કંપની તરફથી જણાવવામાં આવ્યું છે કે આ ભાવવધારો ખાસ કરીને મેમરીની વધતી કિંમત સહિત સમગ્ર ઈન્ડસ્ટ્રીમાં વધી રહેલા કોસ્ટ પ્રેશરને કારણે થયો છે.
આગામી સમયમાં ફોનની કિંમત 7થી 10 ટકા વધી શકે
સ્માર્ટફોનની કિંમતમાં વધારો અહીં અટકે તેવી શક્યતા નથી. 2026ની બીજી ત્રિમાસિકના અંત સુધીમાં મેમરીની વધતી કિંમતને કારણે સ્માર્ટફોનની સરેરાશ કિંમતમાં આશરે 15 ટકાનો વધારો થઈ ચૂક્યો હતો. આગામી મહિનાઓમાં મેમરી અને અન્ય કોમ્પોનન્ટ્સની કિંમતમાં વધારો ચાલુ રહેશે તો સ્માર્ટફોનની કિંમતોમાં વધુ 7થી 10 ટકાનો વધારો થઈ શકે છે.
ગ્રાહકો હવે ડિસ્કાઉન્ટ અને સેલની રાહ જોઈ રહ્યા છે
સ્માર્ટફોનની વધતી કિંમતોની સીધી અસર ગ્રાહકોના ખરીદીના નિર્ણય પર પણ જોવા મળી રહી છે. ગ્રાહકો હવે ફોન ખરીદતા પહેલા કિંમતની વધુ સરખામણી કરી રહ્યા છે અને મોટા ડિસ્કાઉન્ટ તથા પ્રમોશનલ ઓફરની રાહ જોઈ રહ્યા છે. એપ્રિલથી જુલાઈ દરમિયાન સ્માર્ટફોનનું વેચાણ મોટાભાગે ગયા વર્ષના સ્તરથી નીચે રહ્યું હતું. જુલાઈમાં Amazon Prime Day અને Flipkart GOAT Sale જેવી મોટી ઓનલાઈન સેલ દરમિયાન વેચાણમાં થોડો વધારો થયો હતો. જોકે સેલ પૂરી થયા બાદ ફરીથી વેચાણમાં ઘટાડો નોંધાયો હતો. Counterpoint Researchના જણાવ્યા અનુસાર, એપ્રિલથી જુલાઈ 2026 દરમિયાન અસરગ્રસ્ત મોડલ્સની કિંમતમાં સરેરાશ આશરે ₹3,200નો વધારો થયો હતો.
તહેવારોની સેલમાં મળી શકે છે રાહત
આગામી તહેવારી સિઝન સ્માર્ટફોન ખરીદનારાઓ માટે થોડી રાહત લાવી શકે છે. કંપનીઓ તહેવારો દરમિયાન ડિસ્કાઉન્ટ, ફાઇનાન્સિંગ સ્કીમ અને નવા સ્માર્ટફોન લોન્ચ વધારી શકે છે. આ કારણે ગ્રાહકોને કેટલીક ઓફર અને ડિસ્કાઉન્ટનો લાભ મળી શકે છે. જોકે સ્માર્ટફોનની વધતી કિંમત હજુ પણ માર્કેટ માટે મોટો પડકાર રહેશે.
Counterpoint Researchના અનુમાન મુજબ, 2026માં ભારતીય સ્માર્ટફોન માર્કેટમાં વાર્ષિક ધોરણે આશરે 13 ટકાનો ઘટાડો થઈ શકે છે. જોકે વર્ષના બીજા ભાગમાં તહેવારી માંગને કારણે માર્કેટનું પ્રદર્શન પ્રથમ છ મહિનાની સરખામણીમાં સારું રહેવાની શક્યતા છે.
ફોન ખરીદવો હોય તો શું કરવું?
જો તમને અત્યારે ફોન ખરીદવાની જરૂર હોય તો માત્ર ભાવવધારાના ડરથી ખરીદી મુલતવી રાખવી જરૂરી નથી. પરંતુ જો ખરીદી તાત્કાલિક ન હોય તો તહેવારી સેલ દરમિયાન મળતી ઓફર, બેંક ડિસ્કાઉન્ટ, એક્સચેન્જ બોનસ અને નો-કોસ્ટ EMI જેવી સ્કીમની રાહ જોવી ફાયદાકારક બની શકે છે. ખાસ કરીને જે મોડલની કિંમતમાં તાજેતરમાં વધારો થયો છે, તેની જૂની કિંમત અને આગામી સેલ દરમિયાન મળતી ઓફરની સરખામણી કરીને ખરીદી કરવી વધુ યોગ્ય રહેશે.