Power Bank Safety Tips: આજના ડિજિટલ યુગમાં સ્માર્ટફોન અને અન્ય ઈલેક્ટ્રોનિક ગેજેટ્સ આપણા જીવનનો મહત્વનો હિસ્સો બની ગયા છે. મુસાફરી દરમિયાન કે ઈમરજન્સીના સમયે ફોનની બેટરી ડિસ્ચાર્જ ન થઈ જાય તે માટે લોકો પાવર બેંકનો બહોળા પ્રમાણમાં ઉપયોગ કરે છે. પરંતુ યોગ્ય કાળજી અને માહિતીના અભાવે પાવર બેંકમાં બ્લાસ્ટ કે શોર્ટ સર્કિટ જેવા અકસ્માતો સર્જાવાનું જોખમ પણ રહેલું છે. સુરક્ષિત ઉપયોગ માટે અહીં પાવર બેંક સંબંધિત 7 અત્યંત મહત્વપૂર્ણ ટિપ્સ આપવામાં આવી છે.
1) ગરમ જગ્યા પર ન રાખો
આ પણ વાંચો
પાવર બેંકને ક્યારેય સીધા તડકામાં, બંધ કારમાં, હીટર કે સ્ટવ જેવી ગરમ વસ્તુઓથી દૂર રાખવી જોઈએ. આ ઉપરાંત, જ્યારે તમે તેને ચાર્જિંગમાં મૂકો છો ત્યારે તેને પથારી, સોફા કે કપડાં પર રાખવાને બદલે ખુલ્લી અને સપાટ જગ્યાએ રાખવી હિતાવહ છે.
2) 100% થતાં જ ચાર્જિંગ બંધ કરો
પાવર બેંકને આખી રાત કે દેખરેખ વિના ચાર્જિંગમાં છોડી દેવાની ભૂલ ન કરો. 100% ચાર્જ થઈ જાય એટલે પ્લગ કાઢી લેવો જોઈએ. જો પાવર બેંકનો લાંબા સમય સુધી ઉપયોગ ન કરવાનો હોય, તો તેને 40% થી 50% જેટલી ચાર્જ રાખીને મૂકવી જોઈએ.
3) યોગ્ય ચાર્જર અને કેબલનો ઉપયોગ કરો
ચાર્જિંગ માટે હંમેશા ઓરિજિનલ અથવા ભરોસાપાત્ર બ્રાન્ડના ચાર્જર અને કેબલનો જ ઉપયોગ કરવો. સસ્તા કે નકલી ચાર્જરનો ઉપયોગ કરવાથી શોર્ટ સર્કિટ થવાનો અને ડિવાઈસ બગડવાનો ખતરો વધી જાય છે.
4) ડેમેજ પાવર બેંકનો ઉપયોગ ન કરો
જો તમારી પાવર બેંક ફૂલી ગઈ હોય, તેમાંથી કોઈ કેમિકલ લીક થતું હોય અથવા ચાર્જિંગ વખતે જરૂર કરતાં વધુ ગરમ થતી હોય, તો તરત જ તેનો ઉપયોગ બંધ કરી દેવો. તેને ઘરે જાતે રિપેર કરવાનો પ્રયાસ ક્યારેય ન કરવો.
5) ધાતુની વસ્તુઓથી દૂર રાખો
ચાવી, સિક્કા અને પેપર ક્લિપ જેવી ધાતુ (મેટલ) ની વસ્તુઓથી પાવર બેંકને અલગ રાખવી જોઈએ. તેને બેગમાં રાખતી વખતે હંમેશાં અલગ પાઉચ કે કેસનો ઉપયોગ કરવો, જેથી પોર્ટ શોર્ટ ન થાય.
6) ભરોસાપાત્ર બ્રાન્ડ જ પસંદ કરો
નવી પાવર બેંક ખરીદતી વખતે સુરક્ષા પ્રમાણપત્ર અને બ્રાન્ડની વિશ્વસનીયતા ચોક્કસ તપાસવી. માત્ર સસ્તી હોવાને કારણે કોઈ અજાણી કે સેકન્ડ હેન્ડ પાવર બેંક ખરીદવાનું ટાળવું જોઈએ.
7) પાસ-થ્રૂ ચાર્જિંગ ટાળો
જ્યારે પાવર બેંક પોતે ચાર્જ થઈ રહી હોય, તે જ સમયે તેમાંથી ફોન ચાર્જ કરવાનો (પાસ-થ્રૂ ચાર્જિંગ) પ્રયાસ ન કરવો. ચાર્જિંગ દરમિયાન જો અસામાન્ય ગરમી અનુભવાય, તો તરત જ પ્લગ કાઢી નાખવો.