Oppo Upcoming Phones: સ્માર્ટફોન માર્કેટમાં Oppo પોતાની નવી Find X10 Series રજૂ કરવા માટે તૈયાર છે. કંપનીએ આ સિરીઝની લોન્ચ તારીખ જાહેર કરી દીધી છે. સિરીઝમાં ત્રણ નવા સ્માર્ટફોન ઉપરાંત સ્માર્ટવોચ અને ઈયરફોન પણ રજૂ કરવામાં આવી શકે છે. લોન્ચ પહેલાં જ ફોનના કેમેરા, બેટરી, રેમ, સ્ટોરેજ અને ચિપસેટ સાથે જોડાયેલી ઘણી વિગતો સામે આવી છે.
આ તારીખે લોન્ચ થશે Oppo Find X10 Series
Oppo Find X10 Seriesને 22 સપ્ટેમ્બરે ચીનમાં લોન્ચ કરવામાં આવશે. કંપનીના જણાવ્યા અનુસાર લોન્ચ ઇવેન્ટ સ્થાનિક સમય પ્રમાણે સાંજે 7 વાગ્યે શરૂ થશે, જ્યારે ભારતમાં આ ઇવેન્ટ સાંજે લગભગ 4:30 વાગ્યે શરૂ થશે. આ સિરીઝમાં Find X10, Find X10 Pro Max અને Find X10E ત્રણ મોડલ સામેલ હોવાનું જણાવવામાં આવ્યું છે.
સ્માર્ટફોનની સાથે કંપની Oppo Watch S2 અને Enco X4 પણ રજૂ કરી શકે છે. ચીનમાં Find X10 Series માટે પ્રી-રિઝર્વેશન પણ શરૂ થઈ ચૂક્યું છે. Find X10 Pro Maxને Warm Orange, Moon White અને Light Titanium જેવા કલર વિકલ્પોમાં રજૂ કરવામાં આવી શકે છે. જ્યારે Find X10માં Light Titanium, Ice Blue અને Kingcheng Orange ફિનિશ જોવા મળશે.
1TB સુધીનું સ્ટોરેજ મળશે
Find X10 અને Find X10 Pro Maxમાં ગ્રાહકોને અલગ-અલગ રેમ અને સ્ટોરેજ વિકલ્પો મળી શકે છે. બંને ફોનમાં 12GB RAM સાથે 256GB અથવા 512GB સ્ટોરેજ, જ્યારે 16GB RAM સાથે 512GB અને 1TB સ્ટોરેજનો વિકલ્પ હોવાની માહિતી છે. Find X10Eમાં 12GB+256GB અને 16GB+512GB વેરિઅન્ટ મળી શકે છે.
ડિઝાઇનની વાત કરીએ તો Find X10 અને Find X10Eમાં પાછળની તરફ ત્રણ કેમેરા સાથે અલગ આકારનું કેમેરા મોડ્યુલ જોવા મળશે. બીજી તરફ Pro Max મોડલમાં ત્રણ કેમેરા માટે મોટું રેક્ટેન્ગ્યુલર મોડ્યુલ આપવામાં આવી શકે છે. ત્રણેય ફોનમાં ફ્લેટ ફ્રેમ અને ગોળ કિનારીવાળી ડિઝાઇન જોવા મળી શકે છે.
200MP કેમેરા સાથે 8000mAh બેટરી
Find X10 Seriesનું સૌથી મોટું આકર્ષણ તેનો કેમેરા સેટઅપ અને બેટરી હોઈ શકે છે. સામે આવેલી માહિતી પ્રમાણે Find X10માં બે 200MP રિયર કેમેરા, જ્યારે Find X10 Pro Maxમાં ત્રણ 200MP કેમેરા આપવામાં આવી શકે છે. આ કેમેરા સિસ્ટમ Oppo અને Hasselbladના સહયોગથી તૈયાર કરવામાં આવી હોવાનું કહેવાય છે.
કેમેરામાં ફોટોની ક્વોલિટી સુધારવા ઉપરાંત ઈમેજમાં વધુ નેચરલ ટેક્સચર જાળવવા પર ધ્યાન આપવામાં આવ્યું છે. ફોનમાં બીજી પેઢીની Danxia Color System ટેક્નોલોજી પણ મળી શકે છે. Find X10માં Tianma સાથે મળીને તૈયાર કરાયેલ TianGong Screen 2.0 OLED ડિસ્પ્લે આપવામાં આવી શકે છે, જે ખાસ કરીને ઓછી લાઇટમાં સારી વિઝિબિલિટી અને બ્લૂ લાઇટ ઘટાડવા માટે ડિઝાઇન કરવામાં આવ્યું છે.
બેટરીની વાત કરીએ તો Find X10 અને Find X10 Pro Maxમાં 8000mAh સુધીની બેટરી મળવાની શક્યતા છે. કંપની બેટરીની લાંબી લાઇફ પર પણ ભાર મૂકી રહી છે અને લગભગ પાંચ વર્ષ સુધી બેટરીની ઉપયોગી ક્ષમતા જાળવવાનો દાવો કરવામાં આવી રહ્યો છે.
નવા MediaTek ચિપસેટથી મળશે પાવર
પરફોર્મન્સ માટે Find X10માં 3nm MediaTek Dimensity 9600M ચિપસેટ મળવાની માહિતી સામે આવી છે. આ ચિપસેટ Dimensity 9500 પર આધારિત હોવાનું કહેવાય છે, જેમાં કેટલાક ફેરફારો કરવામાં આવ્યા છે. બીજી તરફ Find X10 Pro Maxમાં 2nm MediaTek Dimensity 9600 Pro ચિપસેટ મળવાની ચર્ચા છે. જો આ માહિતી સાચી સાબિત થાય છે તો Pro Max મોડલ પરફોર્મન્સની દ્રષ્ટિએ સિરીઝનું સૌથી શક્તિશાળી મોડલ બની શકે છે. જોકે Find X10Eમાં કયો પ્રોસેસર આપવામાં આવશે તેની માહિતી હજુ સ્પષ્ટ થઈ નથી.