OnePlus 16 price: OnePlus ટૂંક સમયમાં પોતાનો નવો ફ્લેગશિપ સ્માર્ટફોન OnePlus 16 લોન્ચ કરી શકે છે. કંપનીએ હજુ સુધી ફોન વિશે કોઈ સત્તાવાર જાહેરાત કરી નથી, પરંતુ લીક્સ અને રિપોર્ટ્સમાં તેના ઘણા મહત્વના ફીચર્સ સામે આવ્યા છે. OnePlus 15ના અનુગામી તરીકે આવનારો આ સ્માર્ટફોન વધુ મોટી બેટરી, શક્તિશાળી પ્રોસેસર અને અપગ્રેડેડ કેમેરા સાથે બજારમાં એન્ટ્રી કરી શકે છે. ટેક જગતમાં OnePlus 16ને લઈને ભારે ઉત્સુકતા જોવા મળી રહી છે.
OnePlus 16માં મળશે બેટરી, કેમેરા અને પરફોર્મન્સમાં મોટું અપગ્રેડ
ચીની ટિપ્સ્ટર Digital Chat Station દ્વારા શેર કરવામાં આવેલી માહિતી અનુસાર OnePlus 16માં 9000mAhની વિશાળ બેટરી આપવામાં આવી શકે છે, જે OnePlus 15ની 7300mAh બેટરીની સરખામણીએ મોટું અપગ્રેડ ગણાય છે. મોટી બેટરીને કારણે ફોન લાંબા સમય સુધી બેકઅપ આપશે અને હેવી યુઝર્સ માટે વધુ ઉપયોગી સાબિત થઈ શકે છે.
રિપોર્ટ્સમાં એવો પણ દાવો કરવામાં આવ્યો છે કે ફોનમાં Oppoની એનર્જી-એફિશિયન્ટ ચિપનો ઉપયોગ કરવામાં આવશે, જે લો-વોલ્ટેજ ડિસ્ચાર્જ સપોર્ટ કરશે અને બેટરી કાર્યક્ષમતામાં વધારો કરશે. ડિસ્પ્લેની વાત કરીએ તો OnePlus 16માં 185Hz રિફ્રેશ રેટવાળી સ્ક્રીન મળી શકે છે, જ્યારે અગાઉના મોડેલમાં 165Hz AMOLED ડિસ્પ્લે આપવામાં આવી હતી. વધુ રિફ્રેશ રેટના કારણે ગેમિંગ અને સ્ક્રોલિંગનો અનુભવ વધુ સ્મૂથ બનશે.
પરફોર્મન્સ માટે આ સ્માર્ટફોનમાં Qualcommનું આગામી Snapdragon 8 Elite Gen 6 Pro પ્રોસેસર આપવામાં આવી શકે છે. આ ચિપસેટ ફ્લેગશિપ લેવલની સ્પીડ અને AI આધારિત નવી સુવિધાઓ સાથે આવશે તેવી અપેક્ષા છે. કેમેરા વિભાગમાં પણ કંપની મોટો બદલાવ લાવી શકે છે. લીક્સ અનુસાર OnePlus 16માં 200 મેગાપિક્સલનો પ્રાઈમરી કેમેરા આપવામાં આવશે, જ્યારે OnePlus 15માં 50MPનો મુખ્ય કેમેરો હતો. આ અપગ્રેડ ફોટોગ્રાફી અને વિડિયોગ્રાફીના અનુભવને વધુ પ્રીમિયમ બનાવી શકે છે.
ફોનમાં 6.78 ઇંચની Custom BOE Oriental Screen 4.0 ડિસ્પ્લે મળવાની પણ ચર્ચા છે. જોકે કંપનીએ હજુ સુધી લોન્ચ તારીખ જાહેર કરી નથી, પરંતુ અહેવાલો મુજબ OnePlus 16ને ઓક્ટોબર મહિનામાં ચીનમાં રજૂ કરવામાં આવી શકે છે. કિંમતની વાત કરીએ તો તેને CNY 4,999 (આશરે ₹71,000)ની શરૂઆતની કિંમતે લોન્ચ કરવામાં આવી શકે છે. જો આ તમામ લીક્સ સાચા સાબિત થાય, તો OnePlus 16 કંપનીનો અત્યાર સુધીનો સૌથી શક્તિશાળી ફ્લેગશિપ સ્માર્ટફોન બની શકે છે.